අපි ඔබගේ පෞද්ගලිකත්වය අගය කරමු
"හරි" ක්ලික් කිරීමෙන්, ඔබ පහත සඳහන් දේට එකඟ වේ:
2021-08-06
පුවත් කාණ්ඩ : කාරක සභා පුවත්
පවතින කොවිඩ් තත්ත්වය මත ප්‍රමාදවී ඇති කොරියානු රැකියා අවස්ථා සඳහා ශ්‍රී ලාංකිකයන් යැවීම කඩිනම් කිරීම සඳහා සියලු පියවර ගෙන ඇති බව විදේශ අමාත්‍ය දිනේෂ් ගුණවර්ධන මහතා පසුගියදා (04) පාර්ලිමේන්න්තුවේ පැවති විදේශ කටයුතු පිළිබඳ අමාත්‍යාංශයීය උපදේශක කාරක සභා රැස්වීමේදී පැවසීය.
මේ සම්බන්ධයෙන් දැනටමත් රාජ්‍ය තාන්ත්‍රික මට්ටමෙන් සාකච්ඡා කළ බවත් ශ්‍රී ලාංකිකයන්හට කොරියාවේ කෘෂිකර්ම ක්ෂේත්‍රයේ රැකියා අවස්ථා ලබා දීම සඳහා කොරියානු තානාපතිවරයා විශේෂ යෝජනාවක් කළ බවත් අමාත්‍යවරයා පැවසීය. එහෙත් පවතින කොවිඩ් තත්ත්වය තුළ මේ කටයුතු ප්‍රමාද වී ඇති බැවින් මේ සඳහා දැනටමත් අදාළ සියලු පියවර ගනිමින් සිටින බවත් අමාත්‍යවරයා අවධාරණය කළේය.
පාර්ලිමේන්තු මන්ත්‍රී ගාමිණි වලේබොඩ මහතා විසින් කොරියාවේ සේවය සඳහා මේ වන විට ශ්‍රී ලාංකිකයන් සඳහා අවස්ථාව ඇති බැවින් මේ සඳහා වැඩපිළිවෙලක් සකස් විය යුතු බවට කරුණු ඉදිරිපත් කළ අවස්ථාවේදී අමාත්‍යවරයා මේ බව පැවසීය.
කාරක සභාවේ අදහස් දක්වමින් පාර්ලිමේන්තු මන්ත්‍රී ගෙවිදු කුමාරතුංග මහතා පෙන්වා දුන්නේ බ්‍රිතාන්‍ය පාර්ලිමේන්තුව තුළ දැනට සම්මත වී ඇති විදේශ මෙහෙයුම් පනත මගින් එරට යුධ සෙබලුන් විදේශ ර‍ටවලදී වසර 05කට ඉහතදී සිදුකරන ලද යුධ අපරාධවලින් නිදහස්කොට ඇති බවයි. එවැනි පසුබිමක ශ්‍රී ලාංකේය හමුදාව සිය මවුබිමේ ආරක්ෂාව වෙනුවෙන් පෙනී සිටියදී පවා මානව හිමිකම් සම්බන්ධව චෝදනා නැගීම යුක්ති සහගත නොවන බැවින් මෙරට හමුදාව සම්බන්ධයෙන් මෙවැනි තත්ත්වයක් පිළිබඳ සළකා බලන ලෙස මන්ත්‍රීවරයා ඉල්ලා සිටියේය. මානව හිමිකම් යන කාරණය ජාතික රාජ්‍යයන්ගේ ස්වාධීනත්වයට එරෙහිව යොදා ගැනීමට එරෙහිව හඬ නැගිය යුතු බවත් පෙන්වා දුන් ඔහු මානුෂීය මෙහෙයු‍ම දියත් කරමින් ලෝකයටම ආදර්ශයක් සැපයූ මෙරට හමුදාව පිළිබඳවත් ස්ථාවරයක් ලෝකයට ප්‍රකාශ කිරීමට කටයුතු කරන ලෙස ඉල්ලා සිටියේය.
මෙහිදී අදහස් දක්වමින් විදේශ අමාත්‍යාංශ ලේකම් ජයනාත් කොළඹගේ මහතා ප්‍රකාශකර සිටියේ මේ පිළිබඳ කරුණු අධ්‍යයනය කරමින් යන බවයි. මෙරට උතුරු නැගෙනහිර ජනතාවට ඔවුන්ගේ ඉඩම් නැවත පවරා දීම ඇතුළු කටයුතු හැකි උපරිමයෙන් සිදුකරන බැවින් මේ සියලු කාරණා පිළිබඳව ජාත්‍යන්තර ප්‍රජාව දැනුවත් කිරීමටද කටයුතු කරන බව අමාත්‍යාංශ ලේකම්වරයා පැවසීය.
මෙහිදී අදහස් දක්වමින් විදේශ අමාත්‍ය දිනේෂ් ගුණවර්ධන මහතා පවසා සිටියේ මේ පිළිබඳව පසුගිය ජිනීවා මානව හිමිකම් සැසියේදී ද ශ්‍රී ලංකාව පාර්ශවයෙන් අදහස් දැක්වූ බවයි. එසේම ශ්‍රේෂ්ඨාධිකරණ විනිසුරු නවාස් මහතාගේ ප්‍රධානත්වයෙන් විශේෂ ජනාධිපති කොමිසමක්ද පත්කළ බවත් එමගින් මේ පිළිබඳව සාක්ෂි එක්රැස් කිරීම සිදුකරන බවත් අමාත්‍යවරයා පෙන්වා දුන්නේය. එහි අතුරු වාර්තාවක් මේ වන විට ජනාධිපතිවරයාට භාර දී ඇති බවත් මේ පිළිබඳව මෙරට සිටින බ්‍රිතාන්‍ය මහ කොමසාරිස්වරයා දැනුවත් කිරීමටද පියවර ගෙන ඇති බවත් අමාත්‍යවරයා පැවසීය.
එසේම පාර්ලිමේන්තු මන්ත්‍රී චන්දිම වීරක්කොඩි මහතා පෙන්වා දුන්නේ කොවිඩ් තත්ත්වය තුළ බොහෝ රටවල් ලංකාව “රතු රටක්“ ලෙස හදුන්වා ඇති බැවින් ලංකාව කෙරෙහි මෙම ආකල්පය වෙනස් කිරීමට වෙන වෙනම අදාළ රටවල් සමග සම්බන්ධතා පැවැත්විය යුතු බවයි. එසේම ඉන්දියාවේ ශ්‍රී ලාංකේය මහ කොමසාරිස්වරයෙක් පත් කිරීම වසර දෙකක සිට ප්‍රමාදවී ඇති බවත් මන්ත්‍රීවරයා පෙන්වා දුන්නේය. මෙහිදී රාජ්‍ය අමාත්‍ය තාරක බාලසූරිය මහතා පවසා සිටියේ මේ සඳහා උපායමාර්ගික වැඩපිළිවෙලක් අදාළ පාර්ශවයන් සමග සකස්කර ඇති බවයි. ඇතැම් රටවල පවතින තත්ත්වය සමග මෙය ප්‍රායෝගිකව අසීරු වුවද මේ සඳහා සියලු පියවර ගනිමින් සිටින බවද රාජ්‍ය අමාත්‍යවරයා පැහැදිළි කළේය. එසේම ඉන්දියාව සඳහා මහ කොමසාරිස්වරයෙකු මෙම මස 15 වනදා වැඩ බාර ගන්නා බවද මෙහිදී අනාවරණය විය.
මෙහිදී අදහස් දැක්වූ පාර්ලිමේන්තු මන්ත්‍රී එස්. රාසමානික්කම් මහතා පෙන්වා දුන්නේ විදේශ කටයුතුවලට අදාළ මහජනතාවගේ ගැටලු බොහෝමයක් මහජන නියෝජිතයන්ට පැමිණෙන බැවින් අමාත්‍යාංශ මට්ටමින් ඒ සඳහා සම්බන්ධීකරණ නිලධාරි‍වරයෙක් පත් කරන ලෙසයි. ඒ සඳහා අවශ්‍ය පියවර ගන්නා බව විදේශ අමාත්‍යාංශ ලේකම්වරයා මෙහිදී පැවසීය.
තමිල්නාඩුවේ රාමේශ්වරන් සහ තලෙයි මන්නාරම අතර තොටුපළ සේවාවක් ආරම්භ කිරීම පිළිබඳවද රාසමානික්කම් මහතා විමසා සිටි අතර මෙහිදී විදේශ අමාත්‍යාංශ ලේකම්වරයා පවසා සිටියේ ඉන්දියාව පාර්ශවයෙන් මීට කැමැත්ත පළවී තිබුණද ආරක්ෂක අමාත්යාංශය සහ වරාය අමාත්යාංශය මේ පිළිබඳව අවසාන තීරණයකට නොපැමිණ ඇති බවයි.
තවද විදේශ සේවා විභාග පැවැත්වීම ප්‍රමාදවී ඇති බැවින් ඒ පිළිබඳව අවධානය යොමු කරන ලෙස පාර්ලිමේන්තු මන්ත්‍රී ආචාර්ය සුරේන් රාඝවන් මහතා පෙන්වා දුන්නේය. පවතින කොවිඩ් තත්ත්වය තුළ විභාගය පැවැත්වීම ප්‍රමාද වී ඇති බවත් විභාග දෙපාර්තමේන්තුව ඉදිරියේදී මේ සඳහා කඩිනමින් කටයුතු කරන බවත් අමාත්‍යාංශ ලේකම්වරයා පැවසීය. අවසන් වරට මෙම විභාගය පවත්වා ඇත්තේ 2018 වසරේදී බවත් මේ වන විට නිලධාරීන්ගේද පුරප්පාඩු පවතින බවත් මෙහිදී අනාවරණය විය. එබැවින් විභාග දෙපාර්තමේන්තුව මගින් විභාගය පැවැත්වීමට මේ වන විට කටයුතු සූදානම් කොට ඇති බවත් ඉන් අනතුරුව සම්මුඛ පරීක්ෂණ පවත්වා අදාළ පුරප්පාඩු පිරවීමට කටයුතු කරන බවත් අමාත්‍යාංශ ලේකම්වරයා පැවසීය.
රාජ්‍ය අමාත්‍ය තාරක බාලසූරිය, පාර්ලිමේන්තු මන්ත්‍රීවරුන් වන එස් රාසමානික්කම්, ගාමිණී වලේබොඩ, ආචාර්ය සුරේන් රාඝවන්, ඩිලාන් පෙරේරා , යදාමිණි ගුණවර්ධන සහ සුදත් මංජුල යන මහත්වරුද විදේශ අමාත්‍යාංශයේ ලේකම් මහාචාර්ය ජයනාත් කොළඹගේ මහතා ද මේ අවස්ථාවට සහභාගී වූ අතර අනෙකුත් නිලධාරීහු මාර්ගගත තාක්ෂණය ඔස්සේ මෙම අවස්ථාවට සම්බන්ධ විය.
2025-04-23
ආබාධිත ප්‍රජාවගේ ප්‍රවාහන අවශ්‍යතා පිළිබඳව ප්‍රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්‍යාංශයීය උපදේශක කාරක සභාවේ ප්‍රවාහන ක්ෂේත්රය හා සම්බන්ධ නීතිමය රාමුව ශක්තිමත් කීරීම තුළින් සාධනීය දිශානතියක් කරා ප්‍රවාහන ක්ෂේත්රය යොමු කරවීම සඳහා වන දෙවැනි අනු කාරක සභා රැස්වීමේදී සාකච්ඡා විය. ඒ එම අනු කාරක සභාව එහි සභාපති ගරු පාර්ලිමේන්තු මන්ත්‍රී නීතිඥ ලක්මාලි හේමචන්ද්‍ර මෙනෙවියගේ ප්‍රධානත්වයෙන් පසුගිය අප්‍රේල් 10 වනදා පාර්ලිමේන්තුවේදී රැස්වූ අවස්ථාවේදීය.මෙම රැස්වීම සඳහා ආබාධ සහිත වූවන් සඳහා වන පාර්ලිමේන්තු සංසදයේ සභාපති,අනුකමිටු සාමාජික ගරු පාර්ලිමේන්තු මන්ත්‍රී සුගත් වසන්ත ද සිල්වා මහතා ද එක්ව සිටියේය. තවද, විවිධ ආබාධ සහිත ප්‍රජාව නියෝජනය කරමින් සංවිධාන සහ ආයතන ප්‍රධානීන් ඇතුළු නියෝජිතයින් පිරිසක්ද ද සහභාගී වී සිටියහ.ඒ අනුව ආබාධිත ප්‍රජාවගේ ප්‍රවාහන අවශ්‍යතා සපුරා ගැනීමේදී මතුවන ගැටලු සහ එම ගැටලු නිරාකරණය කිරීම සඳහා වූ යෝජනාවන් ද අනු කාරක සභාවේදී දීර්ඝලෙස සාකච්ඡා කෙරිණි.ප්‍රවාහන මාධ්‍ය භාවිතා කිරීමේදී ආබාධ සහිත ප්‍රජාවට ඒවාට නිසි ලෙස ප්‍රවේශ වීමේ පහසුකම් නොමැතිකම එම ප්‍රජාවට පවතින ප්‍රමුඛතම ගැටලුවක් බව මෙහිදී හඳුනාගැනිණි. බස්රථ සහ දුම්රිය සඳහා නිසි ප්‍රවේශ පහසුකම් නොමැති කම හේතුවෙන් එම ආබාධ සහිත පිරිස් කුලී පදනම මත ලබාගත් වාහන වලින් තම ප්‍රවාහන පහසු කම ලබා ගන්නා බවත් ඒ වෙනුවෙන් අති විශාල මුදලක් ඔවුනට වැය කිරීමට සිදුවන බව පැමිණි සිටි පිරිස කාරක සභාවට අවධාරණය කරන ලදී.2006 අංක 1 දරන ආබාධ සහිත තැනැත්තන් පිළිබඳ ප්‍රවේශ නියෝගය පිළිබඳ නිකුත් කර ඇති ගැසට් නිවේදනය මගින් එම ප්‍රජාවන්ට නිසි පහසුකම ලබාදියයුතු බව දක්වා තිබුණද එම නියෝග අදාළ ආයතන හෝ පුද්ගලයින් පිළිනොපදින බවද ඔවූහු පෙන්වා දුන්හ. ඒ අනුව එම නීති ප්‍රයෝගිකව ක්‍රියත්මක වීම තුළ ආබාධ සහිත ප්‍රජාවට ලැබෙන සහනය පිළිබදව ද ඔවුහු කාරක සභාවේ අවධානයට යොමු කළහ.බස්රථවල ඇතැම් කොන්දොස්තරවරුන්ගේ ක්‍රියාකලාපයන් හේතුවෙන් ආබාධ සහිත පිරිස් බොහෝ අපහසුතාවන්ට ලක්වන බව මෙම සංවිධනවල නියෝජිත පිරිස කාරක සභාවට පෙන්වා දුන්හ. මෙවැනි ගැටලු නිරාකරණය කිරීම සඳහා නීති සම්පාදනය කිරීම මෙන්ම ආබාධ සහිත පිරිස් පිළිබඳ දක්වන ආකල්ප යහපත් මට්ටමටකට ගෙන ඒමේ අවශ්‍යතාවයද එම නියෝජිත පිරිස අවධාරණය කළහ.බස්රථවල සහ දුම්රියවල ආසන, නීතියක් මඟින්ම ආබාධිත පුද්ගලයින් සඳහා වෙන්කිරීම, කොන්ද්සි විරහිතව ආබාධිත පුද්ගලයින් බස්රථ සඳහා නංවා ගැනීමේ අවශ්‍යතාවය, දුම්රිය ස්ථානවල ආබාධ සහිත පිරිස් වෙනුවෙන් සන්නිවේදන පහසුව උදෙසා සකස් වියයුතු දේ පිළිබඳව මෙන්ම ඔවුන්ට බලපා ඇති තවත් බොහෝ ගැටලු පිළිබඳව මෙහිදී සාකච්ජා කෙරිණි. එමෙන්ම ශ්‍රවනාබාධිත ප්‍රජාව සඳහා රියදුරු බලපත්‍ර ලබාදීම මේ වන විට නතර කර ඇති බවත් එය නැවත එම පිරිස වෙත ලබාගැනීමට අවශ්‍ය මැදිහත් වීම් සිදුකරන ලෙසත් එම නියෝජිත පිරිස කාරක සභාවෙන් ඉල්ලා සිටියහ.ඒ අනුව මෙම ආබාධ සහිත පිරිසගේ ගැටලු හා යෝජනා ලිඛිතව මෙම කාරක සභාව වෙත සති දෙකක් තුළ යොමු කරන ලෙසත් එලෙස ලැබෙන ගැටලු හා යෝජනා සළකා බලා අවසන් වාර්තාවක් ප්‍රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්‍යාංශයීය උපදේශක කාරක සභාව වෙත ලබාදීමට කටයුතු කරන බවත් ගරු සභාපතිතුමිය පැවසුවාය.
2025-04-23
මාස දෙකක් තුළ ප්‍රවාහන අමාත්‍යාංශයේ යෝජනා ලබා දෙන ලෙසටත් දැනුම් දෙයිපොදු ප්‍රවාහන රථවල යෝග්‍යතාව පරීක්ෂා කිරීම සඳහා විධිමත් ක්‍රමවේදයක් සකස් කිරීම පිළිබඳවත් අවධානයපොදු ප්‍රවාහන රියදුරන්ගේ වෘත්තීයභාවය වැඩි කිරීම සඳහා වූ යෝජනා මාසයක් තුළ ලබා දෙන ලෙසට ජාතික ගමනාගමන කොමිෂන් සභාවට උපදෙස් බස්රථ මගීන්ගේ ආරක්ෂාව ඇතුළු පොදු ප්‍රවාහනයේ ආරක්ෂාව සහතික කිරීම සඳහා පවතින නෛතික රාමුව ශක්තිමත් කිරීමට අදාළ යෝජනා පිළිබඳව ප්‍රවාහන, මහාමාර්ග, වරාය සහ සිවිල් ගුවන්සේවා කටයුතු පිළිබඳ අමාත්‍යාංශයීය උපදේශක කාරක සභාව මගින් පිහිටුවන ලද “ප්‍රවාහන ක්ෂේත්රය හා සම්බන්ධ නීතිමය රාමුව ශක්තිමත් කිරීම තුළින් සාධනීය දිශානතියක් කරා ප්‍රවාහන ක්ෂේත්රය යොමු කරවීම” සම්බන්ධයෙන් වන පාර්ලිමේන්තු අනු කාරක සභාවේදී සාකච්ඡා විය.එම අනුකාරක සභාවේ සභාපතිනි ගරු පාර්ලිමේන්තු මන්ත්‍රීනි නීතීඥ ලක්මාලි හේමචන්ද්‍ර මෙනෙවියගේ සභාපතිත්වයෙන් 2025.03.09 වැනි දින එම කාරක සභාව පාර්ලිමේන්තුවේදී රැස්වූ අවස්ථාවේදී මේ පිළිබඳව අවධානය යොමු විය.මේ අනුව අනු කාරක සභා රැස්වීම සඳහා ප්‍රවාහන මහාමාර්ග, වරාය සහ සිවිල් ගුවන්සේවා කටයුතු පිළිබඳ අමාත්යාංශය සහ ඒ යටතේ ඇති ආයතන කිහිපයක් නියෝජනය කරමින් නිලධාරීන් සම්බන්ධ වූ අතර පොදු ප්‍රවාහනය භාවිතා කරන මගීන්ගේ ආරක්ෂාව සහතික කිරීමට අදාළ නීතිමය රාමුව ශක්තිමත් කිරීම සම්බන්ධයෙන් එම නිලධාරීන් සතු අදහස් අනු කාරක සභාව වෙත ලබා ගැනීම සිදු විය.පොදු ප්‍රවාහන බස් රථ සඳහා යෝග්‍යතා සහතික ලබා ගැනීමේ ක්‍රියාපාටිය විධිමත් කිරීමේ අවශ්‍යතාව කාරක සභාවේදී අවධාරණය කෙරිණි. මෝටර් වාහන පනතේ 29 වගන්තිය අනුව බස්රථ, ලොරි රථ සහ ගිලන්රථ සඳහා මෙම යෝග්‍යතා සහතික නිකුත් කරන බවත් එය මෝටර් රථ ප්‍රවාහන දෙපාර්තමේන්තුවේ නියාමනයෙන් තොරව පළාත් සභාවල ලියාපදිංචි ගරාජ මගින් සිදුවන බවත් නිලධාරීහු පැවසූහ. එම යෝග්‍යතා සහතික නිකුත් කරන ගරාජවල ප්‍රමිතිය, විශ්වසනීයත්වය ඇතුළු ගැටලු පවතින බැවින් ඒ සඳහා විධිමත් ක්‍රමවේදයක් සකස් කිරීමේ අවශ්‍යතාව අනුකාරක සභා සභාපතිවරිය මෙහිදී අවධාරණය කළාය.මෝටර් වාහන පනතේ 19 වගන්තිය යටතේ පවතින “තැනීම් නියෝග” ක්‍රියාත්මක කිරීමේ අවශ්‍යතාව මෙහිදී සාකච්ඡා විය. මේ අනුව නව බස්රථ ගෙන්වීමේදී මෙන්ම පවතින බස්රථ වල මගී ආරක්ෂාව සඳහා අසුන් අතර නියමිත පරතරය, අනවශ්‍ය උපාංග ඉවත් කිරීම, ආසන පටි පැළදීම ඇතුළු කරුණු පිළිබඳව දීර්ඝ ලෙස සාකච්ඡා විය.මේ අනුව අදාළ දත්ත සහ තොරතුරු මත පදනම්ව පොදු ප්‍රවාහනයේදී මගී ආරක්ෂාව සම්බන්ධයෙන් ක්‍රියාත්මක කළ යුතු පියවරයන්ට අදාළ යෝජනා සහිත වාර්තාවක් ප්‍රවාහන අමාත්යාංශය මගින් සකස් කොට මාස දෙකක් තුළ ප්‍රවාහන කටයුතු පිළිබඳ අමාත්‍යාංශයීය උපදේශක කාරක සභාවට ලබා දෙන ලෙස අනුකාරක සභා සභාපතිනිය නිලධාරීන්ට දැනුම් දුන්නාය.එසේම පොදු ප්‍රවාහන රථවල රියදුරන්ගේ වෘත්තීය භාවය වැඩි කිරීම සඳහා ගත යුතු ක්‍රියාමාර්ග පිළිබඳව ද අවධානය යොමුවිය. ඒ අනුව රියදුරු වෘත්තීය ප්‍රමිතිගත කිරීම සඳහා වූ යෝජනා මාසයක් තුළ මෙම අනුකාරක සභාවට ලබා දෙන ලෙසත් අනුකාරක සභාපතිනිය විසින් ජාතික ගමනාගමන කොමිෂන් සභාවට උපදෙස් ලබා දෙන ලදී. එසේම පසුගිය තෙමසක කාලය තුළ සිදුව ඇති මාර්ග අනතුරු පිළිබඳ දත්ත කාරක සභාවට කඩිනමින් යොමු කරන ලෙස ද කාරක සභාව විසින් දැනුම් දෙන ලදී. දත්ත මත පදනම්ව ඉදිරි නිර්දේශ සකස් කිරීමේ වැදගත්කම අනු කාරක සභා සභාපතිනිය අවධාරණය කළාය.එසේම බස්රථ රියදුරන් මත්ද්‍රව්‍ය භාවිතා කිරීමට එරෙහිව නීතිය ක්‍රියාත්මක කිරීම සඳහා අවශ්‍ය නෛතික ප්‍රතිපාදන ශක්තිමත් කිරීම සම්බන්ධයෙන්ද අවධානය යොමු විය. මෝටර් වාහන පනත යටතේ ඊට අදාළව රෙගුලාසි සකස් කර මේවන විට අවසාන අදියරේ පවතින බව මෙහිදී නිලධාරීහු පැවසූහ. මෙම රෙගුලාසි කඩිනමින් ක්‍රියාත්මක කළ යුතු බවත් රියදුරුගේ ශරීරයේ පවතින මත්ද්‍රව්‍ය අනාවරණය කර ගැනීම ඇතුළු තාක්ෂණික යාන්ත්‍රණය විධිමත්ව සකස්විය යුතු බවත් මෙහිදී අවධාරණය කෙරිණි.මෙම අනු කාරක සභාව මගින් මූලික වශයෙන් ප්‍රවාහන ක්ෂේත්රය හා සම්බන්ධව කෙටි කාලීනව මෙන්ම දිගු කාලීනව ක්‍රියාත්මක කළ හැකි නීති සහ රෙගුලාසිවල වෙනස්කම් සොයා බැලීම සිදු කරනු ලබන අතර ඉන් පසු අවශ්‍ය නිර්දේශ ඇතුළත් වාර්තාවක් සකස් කිරීමට නියමිතය.පාර්ලිමේන්තු මන්ත්‍රී සුගත් වසන්ත ද සිල්වා මහතා ද මෙම අනු කාරක සභා රැස්වීමට සහභාගී විය.
2025-04-10
සීමාසහිත ගුවන් තොටුපල හා ගුවන් සේවා (ශ්‍රී ලංකා) (පෞද්ගලික) සමාගමට (AASL) අදාළව 2022 සහ 2023 වර්ෂයේ විගණකාධිපති වාර්තා සහ වර්තමාන කාර්ය සාධනයට අදාළව, පසුගියදා (2025.04.02) පාර්ලිමේන්තුවේ පොදු ව්‍යාපාර පිළිබඳ කාරක සභාව බණ්ඩාරනායක ජාත්‍යන්තර ගුවන්තොටුපොළ සංවර්ධන ව්‍යාපෘතිය පසුවිපරමට ලක් කරනු ලැබීය.ඒ අනුව, ඊට අදාළ කරුණු සම්බන්ධයෙන් විමර්ශනය කිරිමට කෝප් සභාපති ගරු පාර්ලිමේන්තු මන්ත්‍රී (වෛද්‍ය) නිශාන්ත සමරවීර මහතාගේ මුලිකත්වයෙන් ඊයේ (2025.04.09) කෝප් කාරක සභාව බණ්ඩාරනායක ජාත්‍යන්තර ගුවන් තොටුපොලේ ස්ථානීය පරීක්ෂණයක නිරත විය.මෙහිදී බණ්ඩාරනායක ජාත්‍යන්තර ගුවන්තොටුපොළ සංවර්ධන ව්‍යාපෘතියට අදාළව දුරස්ථව පිහිටි ගුවන් යානා හැසිරවීමේ කොටස හා ටැක්සි මාර්ගය (Remote Apron and Taxiways) ඉදිකිරීමේ කටයුතු මගින් ගුවන් තොටුපොළ සතුව පවතින ගුවන්යානා නැවතුම් සංඛ්‍යාව වැඩි කිරීමට අපේක්ෂා කර තිබුණි.එහෙත් සැලසුම් හා උපදේශන සේවා ලබාගැනීම සඳහා ගුවන් තොටුපල හා ගුවන් සේවා (ශ්‍රී ලංකා) (පෞද්ගලික) සමාගම විසින් සේවා ලබා ගත් ජපන් හවුල් සමාගමත්, සීමාසහිත ගුවන් තොටුපල හා ගුවන් සේවා (ශ්‍රී ලංකා) (පෞද්ගලික) සමාගමත්, විසින් කිසිඳු තාක්ෂණික හෝ මෙහෙයුම් විග්‍රහයකින් තොරව මෙම කටයුතු සිදුකර තිබෙන බැවින්, අපේක්ෂිත අරමුණු ප්‍රායෝගිව සාක්ෂාත් කරගැනීම අභියෝගයක්ව තිබෙන බවට මෙහිදී නිරීක්ෂණය විය.මෙම ව්‍යාපෘතිය සැලසුම්කරණ අවධියේදීම දුර්වලතා සහ ප්‍රායෝගික ගැටලු රැසකින් යුක්තවූවද, එය එසේ තිබියදීම මෙහි වැඩකටයුතු අවසන් කිරීමට කටයුතු යොදා තිබු බවට කාරක සභාවට නිරීක්ෂණය විය. මතුව තිබෙන තත්ත්වය තුළ, මෙම ව්‍යාපෘතිය ඔස්සෙ අපේක්ෂිත අරමුණු සාක්ෂාත් කර ගැනීමට ගුවන් තොටුපල හා ගුවන් සේවා (ශ්‍රී ලංකා) (පෞද්ගලික) සමාගම මේ වන විටත් යෝජනා කොට ඇති විසදුම් නිරීක්ෂණය කිරීමද මෙහිදී සිදු විය.මෙහිදි කෝප් සාමාජිකයන් උක්ත ජපන් හවුල් සමාගමේ මෙරට නියෝජිතයන් සහ අදාළ ආයතනයන්හි ඉහළ නිලධාරීන් සමග මේ සම්බන්ධයෙන් දීර්ඝ වශයෙන් කරුණු විමසීමක නිරත විය.මෙම නොසැලකිලිමත් ක්‍රියාකලාපය හේතුවෙන් රජයට සිදුව ඇති පාඩුව සම්බන්ධයෙන් සිය අප්‍රසාදය පළ කළ කාරක සභා සමාජිකයින්, ඉදිරි සංවර්ධන කටයුතු සැලසුම් කිරිමේදී දැනට මතුව ඇති ගැටලු පිළිබඳව අවධානය යොමු නොකිරීමෙන් මහජන මුදල් තවදුරටත් අවභාවිතා විය හැකි බවත් එබැවින් ඒ සම්බන්ධයෙන් ගත හැකි ක්‍රියාමාර්ග සම්බන්ධයෙන් අවධානය යොමු කිරීමටත් නිලධාරීන්ට නිර්දේශ කරණු ලැබීය.මේ පිළිබඳව සාකච්ඡා කිරීමට ගුවන් තොටුපල හා ගුවන් සේවා (ශ්‍රී ලංකා) (පෞද්ගලික) සමාගම නුදුරු දිනක නැවතත් කෝප් කාරක සභාවට කැදවීමට තීරණය කරන ලදි.මෙම ස්ථානීය පරීක්ෂාව සඳහා ගරු පාර්ලිමේන්තු මන්ත්‍රීවරුන් වන එම්.කේ.එම්. අස්ලම්, සමන්මලී ගුණසිංහ, ලුතිනන් කොමාණ්ඩර් (විශ්‍රාමික) ප්‍රගීත් මධුරංග, රුවන් මාපලගම, සුනිල් රාජපක්ෂ, තිළිණ සමරකෝන්, චන්දිම හෙට්ටිආරච්චි යන මහත්ම මහත්මීහු, අදාළ ආයතන නියෝජනය කරමින් පැමිණි නිලධාරීන් සහ පාර්ලිමේන්තු නිලධාරීන් සහභාගී වූහ.
2025-04-10
ඔටිසම් රෝගී දරුවන්ගේ වර්ධනයක් - ලංකාවේ ළමුන් 9000කට අධික පිරිසක් මේ වනවිට හඳුනාගෙන තිබෙනවා - නිලධාරීහු කාරක සභාවට දන්වතිමුල් ළමාවිය සංවර්ධන අවධියේදීම ඔටිසම් රෝගී දරුවන් හඳුනාගැනීමේ යාන්ත්‍රණය සක්‍රීය කරන්න - කාන්තා සහ ළමා කටයුතු ගරු අමාත්‍ය සරෝජා සාවිත්‍රි පෝල්රාජ් විද්‍යාපීඨවල පුහුණුව ලබමින් සිටින ගුරුසිසුන් සඳහා ආබාධ සහිත දරුවන් හැසිරවීම පිළිබඳව මාස හයක පුහුණුවක් ලබාදීමට යෝජනා වී ඇතිබව අධ්‍යාපන අමාත්‍යාංශ නිලධාරීහු කාන්තා සහ ළමා කටයුතු පිළිබඳ අමාත්‍යාංශයීය උපදේශක කාරක සභාවට දැන්වූහ. ඒ ඔස්සේ ආබාධ සහිත දරුවන්, සාමාන්‍ය දරුවන් හා සමානව සලකා කටයුතු කිරීමට ගුරුවරුන්ට අවශ්‍ය දැනුම හා ආකල්ප ලබාදීමට අපේක්ෂා කරන බව එම නිලධාරීහු වැඩි දුරටත් අදහස් දක්වමින් පැවසුහ.මේ පිළිබඳ කරුණු සාකච්ඡා වුයේ කාන්තා සහ ළමා කටයුතු පිළිබඳ අමාත්‍යාංශයීය උපදේශක කාරක සභාව එහි සභාපති කාන්තා සහ ළමා කටයුතු ගරු අමාත්‍ය සරෝජා සාවිත්‍රි පෝල්රාජ් මහත්මියගේ ප්‍රධානත්වයෙන් පසුගිය අප්‍රේල් 8 වැනිදා පාර්ලිමේන්තුවේදී රැස්වූ අවස්ථාවේදීය. මේ අවස්ථාව සඳහා කාන්තා සහ ළමා කටයුතු ගරු නියෝජ්ය අමාත්‍ය වෛද්‍ය නාමල් සුදර්ශන මහතාද එක්ව සිටියේය.මෙහිදී අදහස් දක්වමින් නිලධාරීහු ශ්‍රී ලංකාවේ ඔටිසම් රෝගී දරුවන්ගේ වර්ධනයක් සිදුව ඇති බව පෙන්වා දුන්හ. ඒ අනුව ගණනය කිරීම් අනුව ළමුන් 9000කට අධික පිරිසක් මේ වනවිට හඳුනාගෙන ඇති බව වැඩි දුරටත් අදහස් දක්වමින් නිලධාරීහු කාරක සභාවට දැන්වූහ. ඒ අනුව නිසි හඳුනාගැනීමක් සිදු නොවීම හේතුවෙන් දරුවන් මෙ‍ෙලස ආබාධ තත්ත්වයන්ගෙන් පෙලෙන බව කාරක සභා සභාපතිනිය අවධාරණය කළාය.මුල් ළමාවිය සංවර්ධන අවධියේදීම ඔටිසම් රෝගී දරුවන් හඳුනාගත යුතු බවත් එලෙස හඳුනාගතහොත් පමණක් එම දරුවන් යහපත් සෞඛ්‍ය මට්ටමේ දරුවන් බවට පත් කළ හැකි බවත් සභාපතිවරිය මෙහිදී පැවසුවාය. ඒ අනුව දරුවෙකු බිහිවී, පවුල් සෞඛ්‍ය නිලධාරිනියගේ අධීක්ෂණ කාලසීමාවේ සිට මුල් ළමාවිය සංවර්ධන කාලසීමාව තුළ එම දරුවා පිළිබඳව අවධානය යොමු කරමින් කටයුතු කිරීමේ යාන්ත්‍රණය සක්‍රීය මට්ටමින් ක්‍රියාත්මක විය යුතු බව කාරක සභා සභාපතිනිය අවධාරණය කළාය.ඔටිසම් රෝගී දරුවන් වෙනුවෙන් හඳුනාගත් ප්‍රදේශවල ආදර්ශ දිවා සුරැකුම් මධ්‍යස්ථාන 3ක් ස්ථාපිත කිරීමට ද සැලසුම් කරන බව සභාපතිනිය පැවසුවාය. ඒ සඳහා අවශ්‍ය කටයුතු සම්පාදනය කිරීම සඳහා කමිටුවක් පත් කිරීමටද මෙහිදී යෝජනා විය. ඒ ඔස්සේ එම දරුවන්ට නිසි සංවර්ධන අවධිවලට යොමු කිරීමට ද අපේක්ෂිතයි.මේ අතර අවධානම් සහ ආර්ථික අපහසුතාවලින් පෙලෙන ළමා නිවාස හා ආයතන වල සිටින දරුවන් ජීව විද්‍යාත්මකව පවුලෙන් වෙන් නොකොට පවුල තුළම රැකවරණය ලබාදීමේ අවශ්‍යතාවය පිළිබඳවද කාරක සභාවේදී දීර්ඝ ලෙස සාකච්ඡා විය. දරුවෙකු පරිවාස භාරට පත්වන්නේ අධිකරණ ක්‍රියාවලියකින් අනතුරුව බව පරිවාස හා ළමාරක්ෂක දෙපාර්තමේන්තු නිලධාරීන් කාරක සභාවට දැන්වුහ. ඒ අනුව එලෙස දරුවෙකු ආයතන ගත නොකොට පවුල තුළම රැකවරණය ලබමින් සිටීමේ වැදගත්කම පිළිබඳව විනිසුරුවරුන් දැනුවත් කීරීමටද අවශ්‍ය කටයුතු සිදු කරන බව නිලධාරීහු පැවසුහ.තවද දිවයින පුරා විවිධාකාරව ක්‍රියාත්මක වෙන පෙර පාසල්, එකම ක්‍රමවේදයක් යටතේ ක්‍රියාත්මක වීමට අවශ්‍ය කටයුතු සම්පාදනය කරන බව කාරක සභා සභාපතිනිය පැවසුවාය. මේ අතර පෙර පාසල් අධ්‍යාපනය සම්බන්ධයෙන් ප්‍රතිපත්තියක් අධ්‍යාපන අමාත්‍යාංශයත් කාන්තා සහ ළමා කටයුතු අමාත්‍යාංශයත් ඒකාබද්ධව සකස් කරමින් පවතින බව නිලධාරීහු කාරක සභාවට දැන්වුහ. එමෙන්ම මේ වනවිට කෙටුම්පත් කර ඇති පෙර පාසල් විෂය මාලා රාමුවද ක්‍රියාත්මක කිරීමට අවශ්‍ය කටයුතු සම්පාදනය කිරීමේ වැදගත්කමද නිලධාරීහු අවධාරණය කළේය.මෙහිදී වතුකරයේ දරුවන් නීති විරෝධී මත්පැන් හා මත් ද්‍රව්‍ය භාවිතය සඳහා යොමුවීමේ ප්‍රවණතාව පිළිබඳවද කාරක සභාවේදී දීර්ඝ ලෙස සාකච්ඡා විය. තවද බාබුල් සහ පන් පාරාග් වැනි ශරීරයට අහිතකර ද්‍රව්‍ය වලට එම දරුවන් යොමු වීමේ ගැටලුව පිළිබඳවද සාකච්ඡා කෙරිණි . එහිදී අනාවරණය වුයේ බාබුල් සහ පන් පාරාග් වැනි ශරීරයට අහිතකර ද්‍රව්‍ය පරිභෝගික සේවා අධිකාරිය, තහනම් ආනයනික ද්‍රව්‍ය ලැයිස්තුවට එක් නොකොට ඇති බවයි. ඒ අනුව කාරක සභාවෙන් පරිභෝගික සේවා අධිකාරියට මෙම ද්‍රව්‍ය තහනම් ආනයනික ද්‍රව්‍ය ලැයිස්තුවට එක් කිරීමට අවශ්‍ය කටයුතු කිරීම සඳහා ඉල්ලීමක් යොමු කිරීමටද තීරණය විය.එමෙන්ම ප්‍රසූත නිවාඩු ලබාදීමේදී තෙවන දරු උපතේදී අදාළ නිවාඩු ලබාදීම ක්‍රියාත්මක නොවන අවස්ථා වාර්තාවී ඇති බව සභාපතිනිය පැවසුවාය. එහිදී අදහස් දක්වමින් නිලධාරීහු ප්‍රසූත නිවාඩු ලබාදීමේදී පළමු සහ දෙවන දරු උපත් වලදී ලබාදෙන වරප්‍රසාදයම තෙවන සහ සියලුම සජීවී දරු උපත් වලදී ලබා දිය යුතු බවට නීති සංශෝධනය වී තිබෙන බවත් එය නිසියාකාරව සමාජ ගත නොවී ඇති බවත් කාරක සභාවට දැන්වූවාය.තවද යාපනය දිස්ත්‍රික්කයේ පොලිස් ස්ථාන සඳහා දමිළ භාෂාවෙන් කටයුතු කළ හැකි කාන්තා නිලධාරීන් අනියුක්ත කිරීම පිළිබඳවද කාරක සභාවේදී සාකච්ඡා විය. මෙහිදී අදහස් දක්වමින් නියෝජ්ය පොලිස්පති රේණුකා ජයසුන්දර මහත්මිය දැනට යාපනයේ කාන්තා නිලධාරීන් 56 දෙනෙක් සේවය කරන බව පැවසුවයා. එම කාන්තා නිලධාරිනියන්ගෙන් 21 දෙනෙකු ළමා හා කාන්තා කාර්යාංශ වල රාජකාරි කටයුතු සිදුකරමින් සිටින බවත් ඉන් දමිල භාෂාවෙන් කටයුතු කළ හැකි කාන්තා නිලධාරිනියන් 8 දෙනෙකු පමණක් සිටින බව ඇය වැඩි දුරටත් අදහස් දක්වමින් පැවැසුවාය.මෙහිදී ළමා හා කන්තා කටයුතු සම්බන්ධ විෂය ප්‍රාදේශීය හා දිස්ත්‍රික් සම්බන්කධීරණ කමිටුවල න්‍යාය පත්‍රය තුළ සාකච්ඡා නොවීම සම්බන්ධයෙන් දිස්ත්‍රික් ලේකම්වරුන් දැනුවත් කර එම විෂය අදාළ කමිටු තුළ සාකච්ඡාවන්ට ලක් කිරීමේ ප්‍රගතිය පිළිබඳවද මෙහිදී විමසා බැලිනි. ඒ අනුව වර්තමානය වන විට ළමා හා කාන්තා කටයුතු සම්බන්ධ විෂය එම කමිටුවල න්‍යාය පත්‍රය තුළ සාකච්ඡා කරන බව නිලධාරීහු කාරක සභාවට දැන්වුහ.ප්‍රාදේශීය ලේකම් කාර්යාල මට්ටමින් පවත්වන ළමා හිමිකම් ප්‍රවර්ධන කමිටුව සඳහා ප්‍රාදේශීය සම්බන්ධීකරණ කමිටු සභාපතිවරයාගේ සහ කාන්තා සහ ළමා කටයුතු සම්බන්ධව ප්‍රදේශයේ සිටින සියලුම නිලධාරීන්ගේ සහභාගිත්වයේ වැදගත්කම මෙහිදී අවධාරණය කෙරිණි.මෙම කාරක සභා රැස්වීම සඳහා ගරු අමාත්‍යවරුන්, ගරු නියෝජ්ය අමාත්‍යවරුන්, කාරක සභා සාමාජික ගරු මන්ත්‍රීවරයන් සහ අනෙකුත් මන්ත්‍රීවරයන් ඇතුළු නිලධාරීහු පිරිසක් සහභාගී වී සිටියහ.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
