2022-03-29
පුවත් කාණ්ඩ : කාරක සභා පුවත්
කොවිඩ් 19 - බූස්ටර් එන්නත ලබා ගැනීම සඳහා ජනතාව දැනුවත් කිරීම සහ උනන්දු කිරීම දිගටම සිදු කරන බව සෞඛ්‍ය අමාත්‍ය ගරු කෙහෙලිය රඹුක්වැල්ල මහතා පැවසීය. ඒ මහතා මේ බව සඳහන් කළේ පසුගියදා (22) පාර්ලිමේන්තුවේදී පැවති සෞඛ්‍ය කටයුතු පිළිබඳ අමාත්‍යාංශයීය උපදේශක කාරක සභාවේදී පාර්ලිමේන්තු මන්ත්‍රී ගරු වෛද්‍ය උපුල් ගලප්පත්ති මහතා විසින් කරන ලද යෝජනාවක් සඳහා අදහස් දක්වමිනි.
මෙහිදී තවදුරටත් අදහස් දැක්වූ අමාත්‍යවරයා සඳහන් කළේ පසුගිය කාලය පුරාම සෞඛ්‍ය අමාත්‍යාංශය විසින් බූස්ටර් එන්නත ලබා ගැනීම සඳහා ජනතාව දැනුවත් කිරීම සිදු කළ බවයි. මෙම එන්නත්කරණ ක්‍රියාවලිය සඳහා දේශපාලන අධිකාරීයේ මැදිහත්වීම නිසා මුල් කාලයේ යම් ගැටළු මතුවූ නමුත් මේ වන විට ඇතැම් ප්‍රදේශ වල දේශපාලන අධිකාරීයේ සහයෝගය නිසා එන්නත්කරණය ඉතා සාර්ථක ලෙස ක්‍රියාත්මක වී ඇති බවද පෙන්වා දුන්නේය.
එයට අමතරව යම් සංවිධානාත්මක පිරිස් විසින් බූස්ටර් එන්නත නොගන්නා ලෙසට ගෙන යන මතය හේතුවෙන් ද එන්නත්කරණයේ යම් පසුබෑමක් සිදුවී ඇති බවද කියා සිටියේය. සෞඛ්‍ය අමාත්‍යවරයා වැඩිදුරටත් සඳහන් කළේ සියලු මාධ්‍ය නාලිකා, රාජ්‍ය අංශය සහ දේශපාලන අධිකාරිය එකතු වී මේ පිළිබඳ කටයුතු කිරීමෙන් එන්නත්කරණය සාර්ථක කර ගත හැකි බවයි.
එක් නගර සභා බල ප්‍රදේශයක් තුළ සෞඛ්‍ය වෛද්‍ය නිලධාරී කොට්ඨාස කිහිපයක් පැවතීමේදී සෞඛ්‍ය වෛද්‍ය නිලධාරීන්ගේ ජ්‍යේෂ්ඨත්වය තීරණය කිරීම පිළිබඳ ගැටළුවක් පවතින බව මන්ත්‍රීවරයන් විසින් පෙන්වා දෙන ලදී. එමෙන්ම එක් නගර සභා බල ප්‍රදේශයක් තුළ සෞඛ්‍ය වෛද්‍ය නිලධාරීන් කිහිපදෙනෙකු සේවය කිරීමේදී
පොදු අවශ්‍යතාවන්හිදී තීරණ ගැනීමේ ගැටළුවක් පවතින බවද අවධාරණය විය.
බණ්ඩාරවෙල රෝහල මූලික රෝහලක් ලෙස සංවර්ධනය කිරිම පිළිබඳව මෙහිදී මන්ත්‍රීවරයන් විසින් අදහස් දැක්වූ අතර අමාත්‍යාංශ ලේකම්වරයා අවධාරණය කළේ දියතලාව සහ බදුල්ල රෝහල් දෙකක් තිබියදී බණ්ඩාරවෙල රෝහල මූලික රෝහලක් ලෙස සංවර්ධනය කිරීමේ ගැටළුවක් පවතින බවයි. ඒ වෙනුවට දියතලාව රෝහලේ පිහිටුවා නොමැති ඒකක පමණක් බණ්ඩාරවෙල රෝහලෙහි පිහිටුවීමට අවධානය යොමු වී ඇති බවද තවදුරටත් හෙතෙම සඳහන් කළේය. මෙහිදී අමාත්‍යවරයා කියා සිටියේ තමා බණ්ඩාරවෙල රෝහල වෙත ගොස් පරීක්ෂා කර බලා ඒ පිළිබඳ තීරණයක් ලබා දෙන බවයි.
මාතර මහ රෝහලේ සී.ටී. ස්කෑන් යන්ත්‍රය භාවිතයට ගත නොහැකි තත්ත්වයෙන් අබලන්ව පැවතීම සම්බන්ධවද මෙහිදී සාකච්ඡා කෙරිණි. එහිදී සෞඛ්‍ය අමාත්‍ය කෙහෙලිය රඹුක්වැල්ල මහතා සඳහන් කළේ ඒ පිළිබඳ කඩිනමින් කටයුතු කරන බවයි.
බණ්ඩාරගම ඔසුසලෙහි ඉහළ මාලය බණ්ඩාරගම රෝහල විසින් භාවිත කිරිම නිසා ඔසුසලෙහි ඖෂධ ගබඩා කිරීමේ ගැටළුවක් මතුවී ඇති බව මෙහිදී සාකච්ඡා විය. රෝහල විසින් නව ගොඩනැගිල්ලක් ඉදිකිරීමෙන් අනතුරුව නැවත භාරදෙන බවට එකඟ වී ලබා ගත් අදාළ ගොඩනැගිල්ලේ ඉහළ මාලය නැවත ඔසුසල වෙත ලබා දෙන ලෙස මන්ත්‍රීවරු අමාත්‍යවරයාගෙන් ඉල්ලා සිටියහ. මෙහිදී අමාත්‍යවරයා එකඟ වූයේ බස්නාහිර පළාත් ආණ්ඩුකාරතුමා සමග සාකච්ඡා කොට ඒ සඳහා විසඳුමක් ලබා දෙන බවයි.
යාපනේ ශික්ෂණ රෝහලේ හෙද කාර්ය මණ්ඩලයේ විශාල හිඟයක් පවතින බවද මෙහිදී සාකච්ඡා විය. හෙද කාර්ය මණ්ඩල සඳහා පුද්ගලයන් බඳවා ගැනීමේදී පවතින පුරප්පාඩු පිරවීම සහ නව පුරප්පාඩු ඇති කිරීම පිළිබඳවද මෙහිදී දීර්ඝ වශයෙන් සාකච්ඡා කෙරිණි.
මෙම රැස්වීමට ප්‍රාථමික සෞඛ්‍ය සේවා, වසංගත රෝග හා කොවිඩ් රෝග පාලන කටයුතු රාජ්‍ය අමාත්‍ය පාර්ලිමේන්තු මන්ත්‍රී වෛද්‍ය ගරු සුදර්ශනී ප්‍රනාන්දුපුල්ලේ, දේශීය වෙදකම් ප්‍රවර්ධන, ග්‍රාමීය හා ආයුර්වේද රෝහල් සංවර්ධන හා ප්‍රජා සෞඛ්‍ය රාජ්‍ය අමාත්‍ය ගරු සිසිර ජයකොඩි, ඖෂධ නිෂ්පාදනය, සැපයීම හා නියාමන රාජ්‍ය අමාත්‍ය (මහාචාර්ය) ගරු චන්න ජයසුමන ඇතුළු පාර්ලිමේන්තු මන්ත්‍රීවරයන් රැසක් මෙන්ම සෞඛ්‍ය අධ්‍යක්ෂ ජනරාල් අසේල ගුණවර්ධන ඇතුළු නිලධාරීහු පිරිසක්ද සහභාගී වූහ.
2025-02-16
පළාත් පාලන ආයතන ජන්ද විමසීම් (විශේෂ විධිවිධාන) පනත් කෙටුම්පතට රාජ්‍ය පරිපාලන, පළාත් සභා සහ පළාත් පාලන කටයුතු පිළිබඳ අමාත්‍යාංශයීය උපදේශක කාරක සභාවේ අනුමතිය හිමි විය.මේ සඳහා අනුමතිය හිමි වූයේ රාජ්‍ය පරිපාලන, පළාත් සභා සහ පළාත් පාලන කටයුතු පිළිබඳ අමාත්‍යාංශයීය උපදේශක කාරක සභාව එහි සභාපති ගරු අමාත්‍ය (මහාචාර්ය) ඒ.එච්.එම්.එච්. අබයරත්න මහතාගේ සභාපතිත්වයෙන් අද (පෙබ. 14) පාර්ලිමේන්තුවේ දී රැස්වූ අවස්ථාවේදී ය.එසේම මෙහිදී 2021 සහ 2022 යන වර්ෂ සඳහා දුරස්ථ ඉගෙනුම් මධ්‍යස්ථානයේ වාර්ෂික වාර්තාවද කාරක සභාවේ සලකා බැලීමෙන් අනතුරුව අනුමතිය හිමි විය.මෙම කාරක සභාව සඳහා ගරු නියෝජ්ය අමාත්‍ය රුවන් සෙනරත් මහතා ඇතුළු නියෝජ්ය අමාත්‍යවරු, ගරු විපක්ෂ නායක සජිත් ප්‍රේමදාස මහතා සහ කාරක සභාවේ සාමාජික මන්ත්‍රීවරු ඇතුළු රාජ්‍ය නිලධාරීහු සහභාගී වූහ.
2025-02-13
සතොස වෙළඳසැල් ජාලය ඔස්සේ මාළු අලෙවි කිරීම සඳහා ධීවර සහ වෙළඳ අමාත්‍යාංශ එක්ව ඒකාබද්ධ වැඩපිළිවෙළක්...උතුරු හා නැගෙනහිර පළාත්වල පවතින වරායවල් ප්‍රතිසංස්කරණය සම්බන්ධයෙන් ධීවර අමාත්‍යාංශයෙන් වැඩි අවධානයක් - කාරක සභා සභාපති ඉන්දීය ධීවරයින් නීති විරෝධීව මෙරට මුහුදු සීමාවට ඇතුළුවීම වැළැක්වීම සඳහා අවශ්‍ය ක්‍රියාමාර්ග ගනිමින් සිටින බව ධීවර, ජලජ සහ සාගර සම්පත් කටයුතු පිළිබඳ ගරු අමාත්‍ය රාමලිංගම් චන්ද්‍රසේකර් මහතා පැවසුවේය.එම අදහස් පළවූයේ ධීවර, ජලජ සහ සාගර සම්පත් කටයුතු පිළිබඳ අමාත්‍යාංශයීය උපදේශක කාරක සභාවේ පළමු රැස්වීම ඒ මහතාගේ සභාපතිත්වයෙන් පසුගිය පෙබ. 07 වනදා පාර්ලිමේන්තුවේදී රැස්වූ අවස්ථාවේදී ය. මේ අවස්ථාව සඳහා ධීවර, ජලජ සහ සාගර සම්පත් කටයුතු පිළිබඳ ගරු නියෝජ්ය අමාත්‍ය රත්න ගමගේ මහතාද එක්ව සිටියේය.ඒ අනුව මෙම ඉන්දීය ධීවරයින්ගේ ගැටලුව විසඳීම සඳහා තමිල්නාඩුව සහ ඉන්දීය මහ කොමසාරිස්වරයා සමග අවශ්‍ය සාකච්ඡා මේ වන විට සිදුකෙරෙමින් පවතින බව ගරු අමාත්‍ය රාමලිංගම් චන්ද්‍රසේකර් මහතා පැවසුවේය. ගැටුම් මාර්ගයෙන් තොරව මෙරට ධීවරයින්ට බලපා ඇති මෙම ගැටලුව සඳහා කඩිනමින් විසඳුම් ලබාදෙන බවද අමාත්‍යවරයා මෙහිදී වැඩි දුරටත් අදහස් දක්වමින් පැවසුවේය.මේ අතර සතොස වෙළඳසැල් ජාලය ඔස්සේ මාළු අලෙවි කිරීම සඳහා ධීවර සහ වෙළඳ අමාත්‍යාංශ ඒකාබද්ධව වැඩසටහනක් ආරම්භ කිරීම පිළිබඳව ද මෙහිදී දීර්ඝ ලෙස සාකච්ජා විය. මෙහිදී අදහස් දක්වමින් වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන ගරු අමාත්‍ය වසන්ත සමරසිංහ මහතා, සතොස වෙළඳසැල් ජාලය ඉදිරියේදී පුළුල් කිරීමට සැලසුම් කර ඇති බවත්, ඒ අනුව එම වෙළඳසැල් ඔස්සේ මාළු අලෙවි කිරීම සඳහා අවශ්‍ය කටයුතු සම්පාදනය කිරීමට හැකි බව පැවසුවේය. ලංකා ධීවර සංස්ථාවේ නිලධාරීහු මෙහිදී අදහස් දක්වමින් සතොස වෙළඳසැල් ජාලය හරහා මාළු අලෙවි කිරීමට අවශ්‍ය ඉදිරි ක්‍රියාමාර්ග කඩිනමින් ගැනීමට බලාපොත්තු වන බව පැවසුහ. ඒ අනුව පරිභෝගිකයාට වඩාත් පහසුවෙන් පිසීමට හැකිවන පරිදි අදාළ මාළු වර්ග ඇසුරුම් කර ලබාදීමට ද සැලසුම් කරන බව එම නිලධාරීහු වැඩි දුරටත් අදහස් දක්වමින් පැවසුහ.මෙම රැස්වීමේදී දිවයිනපුරා ධීවර කර්මාන්තය ආශ්‍රිතව පවතින විවිධ ගැටලු පිළිබඳව ගරු මන්ත්‍රීවරයන් විසින් අදාළ නිලධාරීන්ගේ අවධානයට යොමු කළහ. තහනම් දැල් හා ඩයිනමයිට් භාවිතයෙන් මසුන් ඇල්ලීම , මිරිදිය මත්ස්‍ය කර්මාන්තය ආශ්‍රිත පවතින ගැටලු, මෙරට වරායන් සම්බන්ධව පවතින ගැටලු පිළිබඳවද දීර්ඝ ලෙස කාරක සභාව තුළ සාකච්ඡා විය. මෙහිදී අදහස් දක්වමින් කාරක සභා සභාපතිවරයා එම ගැටලු සම්බන්ධයෙන් අවශ්‍ය ක්‍රියාමාර්ග ගැනීමට අදාළ නිලධාරීන්ට උපදෙස් ලබාදුන්නේය. එමෙන්ම උතුරු හා නැගෙනහිර පළාතේ පවතින වරායවල් ප්‍රතිසංස්කරණය සම්බන්ධයෙන් අමාත්‍යාංශයෙන් වැඩි අවධානයක් යොමුකරමින් අවශ්‍ය ගැටලු විසඳීමට කටයුතු කරන බවත් මෙහිදී වැඩි දුරටත් අදහස් දක්වමින් කාරක සභා සභාපතිවරයා පැවසුවේය.මේ අතර 2021 වර්ෂය සඳහා ධීවර වරාය නීතිගත සංස්ථාවේ වාර්ෂික වාර්තාව සහ 2023 වර්ෂය සඳහා ධීවර හා ජලජ සම්පත් දෙපාර්තමේන්තුවේ වාර්ෂික කාර්ය සාධන වාර්තාව ද කාරක සභාව තුළ සලකා බලා අනුමත කරන ලදී.මෙම කාරක සභා රැස්වීම සඳහා ගරු අමාත්‍යවරුන්, ගරු නියෝජ්ය අමාත්‍යවරුන්, කාරක සභා සාමාජික ගරු මන්ත්‍රීවරයන් ඇතුළු අනෙකුත් මන්ත්‍රීවරයන්, ධීවර, ජලජ සහ සාගර සම්පත් කටයුතු පිළිබඳ අමාත්‍යංශයේ නිලධාරීන් ඇතුළු පිරිසක් සහභාගී වූහ.
2025-02-13
පාර්ලිමේන්තු මන්ත්‍රීවරියන්ගේ සංසදයේ ඉදිරි ක්‍රියාකාරී සැලැස්ම පිළිබඳ සාකච්ඡා කිරීමේ රැස්වීමක් ආචාර්ය හරිනි අමරසූරිය ගරු අග්රාමාත්යවරියගේ සහ සංසදයේ සභාපතිනිය වන කාන්තා සහ ළමා කටයුතු ගරු අමාත්‍ය සරෝජා සාවිත්‍රි පෝල්රාජ් මහත්මියගේ ප්‍රධානත්වයෙන් 2025.02.07 දින පාර්ලිමේන්තුවේදී පැවැත්විණි.මෙහිදී පළාත් මට්ටමින් 25% ක කාන්තා නියෝජනයක් ලැබෙන ආකාරයෙන් කාන්තා නියෝජනය වැඩි කිරීමේ හැකියාව පිළිබඳව සංසදය විසින් සාකච්ඡා කරන ලදි. ඒ අනුව, ඉදිරි මැතිවරණයේදී එම යෝජනාව ක්‍රියාත්මක කිරීමට පවතින නීති සඳහා අවශ්‍ය සංශෝධන ගෙන ඒමේ අවශ්‍යතාවය පිළිබඳවද සංසදයේ අවධානය යොමු විය.එසේම පළාත් සභා සහ පළාත් පාලන ආයතනවලට කාන්තාවන් පත් කිරීම සම්බන්ධයෙන් සහ කාන්තා නියෝජනය වැඩි කිරීම සම්බන්ධයෙන් ඉල්ලා සිටීමට දේශපාලන පක්ෂ සහ පක්ෂ ලේකම්වරුන් හමුවීමට ද පාර්ලිමේන්තු මන්ත්‍රීවරියන්ගේ සංසදය තීරණය කළේය.තවද රැකියා ස්ථානයේ ලිංගික හිංසන තුරන් කිරීම සහ ලිංගික හා ස්ත්‍රී පුරුෂ භාවය මත පදනම් වූ ප්‍රචණ්ඩත්වය (SGBV) තුරන් කිරීම වැනි කරුණු පිළිබඳවද මෙහිදී සාකච්ඡා විය.මීට අමතරව මාර්තු 8 වන දිනට යෙදෙන ජාත්‍යන්තර කාන්තා දිනය සැමරීමේ සැලසුම් පිළිබඳව ද සංසදයේ අවධානය යොමු විය.මේ අවස්ථාව සඳහා සංසදයේ නියෝජ්ය සම සභාපතිනියන් වන ගරු පාර්ලිමේන්තු මන්ත්‍රීනි නීතිඥ චමීන්ද්‍රානි කිරිඇල්ල සහ ගරු පාර්ලිමේන්තු මන්ත්‍රීනි සමන්මලිී ගුණසිංහ, ගරු පාර්ලිමේන්තු මන්ත්‍රීවරියන් වන නීතිඥ සාගරිකා අතාවුද, (ආචාර්ය) කෞශල්‍යා ආරියරත්න, ඔෂානි උමංගා, ක්‍රිෂ්ණන් කලෙයිචෙල්වී, නීතිඥ නිලන්ති කොට්ටහච්චි, එම්.ඒ.සී. එස්. චතුරි ගංගානි, නිලුෂා ලක්මාලි ගමගේ, නීතිඥ තුෂාරි ජයසිංහ, ඒ. එම්. එම්. එම්. රත්වත්තේ, දීප්ති වාසලගේ, නීතිඥ හිරුණි විජේසිංහ, අම්බිකා සාමිවේල් සහ නීතිඥ ලක්මාලි හේමවන්ද්‍ර යන මහත්මීහු ඇතුළු පිරිසක් එක්ව සිටියහ.
2025-02-07
මහපොළ ශිෂ්‍යාධාර ප්‍රමාදයකින් තොරව විධිමත් ලෙස ලබාදීමට පියවර - ශිෂ්‍යාධාර මුදල වැඩිකිරීමටත් යෝජනා…මිලියන 1100 වැය කොට මහපොළ අරමුදලෙන් SLIIT ආයතන ඉදි කිරීම පිළිබඳව වෝහාරික විගණනයක් සිදුකරන බව ගරු අමාත්‍ය වසන්ත සමරසිංහ මහතා පවසයි ගරු වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍ය වසන්ත සමරසිංහ මහතාගේ සභාපතිත්වයෙන් පැවති දසවැනි පාර්ලිමේන්තුවේ පළමු සභාවාරයේ, වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන කටයුතු පිළිබඳ අමාත්‍යාංශයීය උපදේශක කාරක සභාවේ පළමු රැස්වීම, ගරු පාර්ලිමේන්තු මන්ත්‍රී (ආචාර්ය) හර්ෂ ද සිල්වා මහතාගේ සභාපතිත්වය යටතේ පවතින රජයේ මුදල් පිළිබඳ කාරක සභාව සමඟ ඒකාබද්ධ රැස්වීමක් ලෙස පසුගියදා (පෙබ. 05) පාර්ලිමේන්තුවේදී පැවැත්විණි.මෙහිදී 2003 අංක 36 දරන බුද්ධිමය දේපළ පනතේ 160අ, 162ආ, 161ඇ, 161ඈ, 161ඉ, 161ඊ, 161උ, 161එ, 161ඔ, සහ 161ඕ වගන්ති සමඟ කියවිය යුතු 204 වගන්තිය යටතේ එවකට වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යවරයා විසින් සාදන ලදුව, 2024 ඔක්තෝබර් 22 දිනැති අංක 2407/04 දරන අති විශේෂ ගැසට් පත්‍රයේ පළ කරන ලද නියෝග සලකා බලනු ලැබූ අතර කාරක සභා දෙකේම අනුමතිය ඒ සඳහා හිමි විය.තවද මෙහිදී 2023 වර්ෂය සඳහා මිනුම් ඒකක, ප්‍රමිති හා සේවා දෙපාර්තමේන්තුවේ කාර්ය සාධන වාර්තාව සලකා බලනු ලැබූ අතර කාර්ය සාධන වාර්තා ප්‍රමාදයකින් තොරව පාර්ලිමේන්තුවට ඉදිරිපත් කිරීම පිළිබඳව සැලකිලිමත් විය යුතු බව අමාත්‍යවරයා විසින් අවධාරණය කරමින් මෙම වාර්තාව අනුමත කරන ලදී.මහපොළ භාරකාර අරමුදල අවභාවිතා කොට SLIIT ආයතනය ඉදි කිරීම සම්බන්ධයෙන් මන්ත්‍රීවරුන් විසින් මෙහිදී කරුණු විමසන ලදි. මේ අනුව රු.මිලියන 1100 වැය කොට SLIIT ආයතනය ඉදි කොට ඇත්තේ මහපොළ භාරකාර අරමුදලට අයත් ඉඩමක බව ගරු අමාත්‍ය වසන්ත සමරසිංහ මහතා සඳහන් කළ අතර පසුගිය කාල වකවානුව තුළ වෝහාරික විගණනයක් කළ බවට සඳහන් වුවද එම වාර්තා සහ තොරතුරු සම්බන්ධයෙන් කිසිඳු සඳහනක් නොමැති බව පැවසීය. මේ නිසා මේ සම්බන්ධයෙන් නැවත වෝහාරික විගණනයක් සිදු කොට නිසි ක්‍රියාමාර්ග ගත යුතු බවට අමාත්‍යවරයා විසින් අවධාරණය කරන ලදී. තවද දේශපාලන තීන්දු තීරණ මත මහපොළ භාරකාර අරමුදලෙන් රුපියල් මිලියන 97ක් ලබාගෙන ඉන් රුපියල් මිලියන 37ක් නැවත භාරදී නොමැති බවත් ඒ පිළිබඳව ද විමර්ශන සිදු කරමින් පවතින බවත් අමාත්‍යවරයා පැවසීය.විශ්වවිද්යාල ශිෂ්යයන්ට ශිෂ්‍යාධාර ලබා දීමේදී රුපියල් 2650.00 ක මුදලක් මහපොළ භාරකාර අරමුදල මගින් ද රුපියල් 2450.00 ක මුදලක් විශ්ව විද්යාල ප්රතිපාදන කොමිෂන් සභාව මගින් ද ලබා දෙන බවත් මහපොළ භාරකාර අරමුදලේ සභාපතිවරයා මෙහිදී පැවසීය. එසේම විශ්වවිද්යාල ප්රතිපාදන කොමිෂන් සභාව හරහා මෙම මුදල් ලබා දෙන්නේ මහා භාණ්ඩාගාරයෙන් බවත්, රුපියල් මිලියන 563ක පමණ මුදලක් තවමත් ලැබීමට නියමිතව ඇති බවත් සභාපතිවරයා මෙහිදී තවදුරත් පැවසීය. ඉදිරි වර්ෂ 2-3 තුළදී මහපොළ අරමුදල මගින් ප්‍රතිලාභ ලබාදීමට නම් මහා භාණ්ඩාගාරය මගින් ලැබිය යුතු මූල්‍ය ප්රතිපාදන නිසි පරිදි ලැබීම අත්‍යවශ්‍ය බව මහපොළ භාරකාර අරමුදලේ සභාපතිවරයා මෙහිදී වැඩිදුරටත් පෙන්වා දෙන ලදි.තවද මෙහිදී ගරු අමාත්‍ය වසන්ත සමරසිංහ මහතා අවධාරණය කර සිටියේ ගෙවීමට ඇති මහපොළ ශිෂ්‍යධාර හිඟ මුදල් ඉදිරි මාස තුන ඇතුළත ගෙවීමට කඩිනම් පියවර ගෙන ඇති බවයි. එසේම අප්‍රේල් මස සිට මහපොළ ශිෂ්‍යාධාර ප්‍රමාදයකින් තොරව විධිමත් ලෙස ලබාදීමට පියවර ගන්නා බව ද අමාත්‍යවරයා පෙන්වා දුන්නේය. තවද මහපොළ ශිෂ්‍යාධාර මුදල් වැඩිකිරීමට ද මේ වන විට යෝජනා ඉදිරිපත් වී ඇති බවත් ඒ පිළිබඳව ගරු ජනාධිපතිවරයා ඉදිරි අයවැය තුළින් ප්‍රකාශයට පත් කිරීමට අපේක්ෂා කරන බවත් අමාත්‍යවරයා වැඩිදුරටත් පැවසීය.සතොස සහ සමුපකාර ව්‍යාපාරයට අදාළ ගැටලු සම්බන්ධයෙන්ද මෙහිදී විශේෂ අවධානයක් යොමු වූ අතර මහජනතාවට වඩාත් කාර්‍යක්ෂම සේවාවක් සැපයිමට සුදුසු තත්ත්වයකට සතොස සහ සමුපකාර ව්‍යාපාරය වැඩිදියුණු කිරීම පිළිබඳව ද මෙහිදී දීර්ඝ වශයෙන් සාකච්ඡා කෙරිණි.මෙම කාරක සභාව සඳහා ගරු සමූපකාර සංවර්ධන නියෝජ්ය අමාත්‍ය උපාලි සමරසිංහ මහතා ඇතුළු ගරු මන්ත්‍රීවරයන් ද වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යාංශයේ සහ මුදල්, ක්‍රමසම්පාදන සහ ආර්ථික සංවර්ධන අමාත්‍යාංශයේ නිලධාරීහු පිරිසක් ද සහභාගී වූහ.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
