2023-03-03
පුවත් කාණ්ඩ : කාරක සභා පුවත්
මෙරට ව්‍යාපාර සහ ආයෝජන ආරම්භ කිරීමේදී ප්‍රාදේශීය ලේකම් කාර්යාල ඇතුළු රාජ්‍ය පරිපාලන ව්‍යුහයේ ඵලදායිතාව සහ කාර්යක්ෂමතාව වැඩි කිරීමට අදාළව ගත හැකි ක්‍රියාමාර්ග පිළිබද යෝජනාවලියක් ඉදිරිපත් කරන ලෙස ‘ශ්‍රී ලංකාවේ ව්‍යාපාර පහසු කිරීමේ දර්ශකයේ අගය ඉහළ නැංවීම සම්බන්ධයෙන් පැන නැගී ඇති ප්‍රායෝගික ගැටලු හා දුෂ්කරතා අධ්‍යයනය කිරීමටත්, ඒ පිළිබඳ සිය යෝජනා හා නිර්දේශ ඉදිරිපත් කිරීමටත් වන පාර්ලිමේන්තු විශේෂ කාරක සභාව ශ්‍රී ලංකා පරිපාලන සේවා සංගමයට පසුගියදා (පෙබ. 28) දැනුම් දුන්නේය.
පාර්ලිමේන්තු මන්ත්‍රී ගරු (නීතීඥ) මධුර විතානගේ මහතාගේ සභාපතීත්වයෙන් පසුගියදා (28) පාර්ලිමේන්තුවේදී රැස් වූ මෙම කාරක සභාවට ශ්‍රී ලංකා පරිපාලන සේවා සංගමය, ශ්‍රී ලංකා ගණකාධිකාරි සේවා සංගමය, ශ්‍රී ලංකා ක්‍රම සම්පාදන සේවා සංගමය ඇතුළු සංගම් නියෝජනය කරන නිලධාරීහු පිරිසක් කැදවා තිබිණි. මේ අනුව මෙරට නව ව්‍යාපාර සහ ආයෝජන අවස්ථා ආරම්භ කිරීමේදී රාජ්‍ය පරිපාලන ව්‍යුහයේ කාර්යක්ෂමතාව වැඩිකිරීම සම්බන්ධයෙන් දීර්ඝ ලෙස මෙහිදී සාකච්ඡා කෙරිණි.
වර්තමානයේ පවතින පරිපාලන ව්‍යුහය තුළ ආයෝජන හෝ ව්‍යාපාර ඇරඹීම සදහා සිදු කළ යුතු ක්‍රියාවලිය කාර්යක්ෂම නොවන බැවින් බොහෝ ආයෝජන හා ව්‍යාපාර අවස්ථා රටට අහිමි වන බව කාරක සභාව පෙන්වා දුන්නේය. දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල ඇතුළු පරිපාලන ව්‍යුහයන්හි කළමනාකරණ ප්‍රතිපත්තීන් වර්තමානයට ගැළපෙන පරිදි සකස්විය යුතු බව කාරක සභාව විසින් අවධාරණය කරන ලදී.
මේ අනුව රාජ්‍ය ප්‍රතිපත්ති සම්පාදනයේදී මේ සම්බන්ධයෙන් ස්ථිරසාර නව ප්‍රතිපත්ති සැකසීමේ අවශ්‍යතාව මෙහිදී අවධාරණය කෙරිණි.
මේ වන විට මෙරට ප්‍රාදේශීය ලේකම් කාර්යාල 332 ක් පවතින බවත් ඒවායේ ක්‍රියාකාරීත්වය අධීක්ෂණය කිරීමේ නිසි ක්‍රමවේදයක් නොමැතිකම බලවත් අඩුපාඩුවක් බවත් මෙහිදී සාකච්ඡා විය. ආයෝජකයන්ගේ පහසුව සදහා සෑම දිස්ත්‍රික් ලේකම් කාර්යාලයකටම ආයෝජකයන් සම්බන්ධීකරණය කරමින් කඩිනම් සේවයක් ලබා දීම සදහා වෙනම කාර්යාලයක් ස්ථාපිත කිරීමට මෙහිදී යෝජනා විය. එසේම එම නිලධාරීන්ට නිසි පුහුණු වැඩසටහන් ක්‍රියාත්මක වීමේ අවශ්‍යතාවද මෙහිදී සාකච්ඡා විය.
රාජ්‍ය පරිපාලන ව්‍යුහයන්හි ප්‍රතිසංස්කරණයන් සිදු කිරීමේ අවශ්‍යතාව පෙන්වා දුන් පරිපාලන සංගමය, ඉදිරියේදී පරිපාලන ප්‍රතිසංස්කරණ සදහා වෙනම අමාත්‍යාංශයක් පිහිටුවීමට පියවර ගන්නා ලෙසද යෝජනා කරන ලදී.
එසේම සියලු ප්‍රාදේශීය ලේකම්වරුන් කැඳවා ඔවුන්ට මේ සම්බන්ධ දැනුවත් කිරීමේ වැඩසටහනක් පැවත්වීමටද මෙහිදී යෝජනා විය.
ප්‍රාදේශීය ලේකම් කාර්යාල හරහා ආයෝජන සදහා අවශ්‍ය ඉඩම් ලබා ගැනීමේ අපහසුව පිළිබදවද මෙහිදී සාකච්ඡා විය. විශේෂයෙන් උතුරු නැගෙනහිර පළාත්වල විශාල වශයෙන් ඉඩම් අක්‍රමිකතාවයන් සිදුවන බවත් ඒ සදහා කඩිනමින් මැදිහත්වීමේ අවශ්‍යතාවත් මෙහිදී සාකච්ඡා විය.
එසේම ප්‍රමුඛත්වයක් ලබා දිය යුතු ආයෝජන පිළිබඳව ද ආයෝජන ක්ෂේත්‍ර කෙරෙහි මෙරට පවතින විභවයන් මොනවාද යන්න හදුනා ගැනීමටත් අවධානය යොමු කිරීමේ අවශ්‍යතාව ශ්‍රී ලංකා ගණකාධිකාරි සේවා සංගමය විිසින් මෙහිදී පෙන්වා දෙන ලදී.
පාර්ලිමේන්තු මන්ත්‍රීවරයන් වන ගරු අනුර ප්‍රියදර්ශන යාපා, ගරු මොහොමඩ් මුසම්මිල්, ගරු කෝකිලා ගුණවර්ධන, ගරු සංජීව එදිරිමාන්න සහ ගරු ලලිත් වර්ණ කුමාර යන මහත්ම මහත්මීහුද මෙම අවස්ථාවට එක්ව සිටියහ.
2025-11-08
පාර්ලිමේන්තු මන්ත්‍රීවරියන්ගේ සංසදය සහ එක්සත් ජාතීන්ගේ සංවර්ධන වැඩසටහන (UNDP) එක්ව සංවිධානය කරයි ශ්‍රී ලංකාව පුරා කාන්තා නායිකාවන් සම්බන්ධ කරන සබඳතා ජාලයක් ගොඩනගමින් කාන්තා නායකත්වය ප්‍රාදේශීය මට්ටමෙන් ශක්තිමත් කිරීම සඳහා විශේෂ වැඩසටහනක් පසුගියදා යාපනයේදී පැවැත්විණි. කාන්තා නායකත්වය ශක්තිමත් කිරීමේ නව පියවරක් සනිටුහන් කළ මෙම වැඩසටහන පාර්ලිමේන්තු මන්ත්‍රීවරියන්ගේ සංසදය සහ එක්සත් ජාතීන්ගේ සංවර්ධන වැඩසටහන (UNDP) ඒකාබද්ධව සංවිධානය කර තිබිණි.මෙහිදී පාර්ලිමේන්තු, පළාත් පාලන, අධ්‍යාපන සහ ව්‍යාපාරික වැනි අංශ කිහිපයක් නියෝජනය කරන ජාතික සහ ප්‍රාදේශීය නායිකාවන් එක්ව සිය අත්දැකීම් බෙදා ගැනීම සිදුවිය. ඒ අනුව එහිදී ඔවුන්ට පවතින බාධක, අභියෝග සාකච්ඡා කිරීම සහ කාන්තා නායකත්වය ශක්තිමත් කිරීම සඳහා ප්‍රායෝගික විසඳුම් හඳුනා ගැනීම සිදුවිය.මෙම වැඩසටහනට කාන්තා හා ළමා කටයුතු ගරු අමාත්‍ය සහ පාර්ලිමේන්තු මන්ත්‍රීවරියන්ගේ සංසදයේ සභාපතිනිය වන සරෝජා සාවිත්‍රි පෝල්රාජ් මහත්මිය, සංසදයේ සාමාජික මන්ත්‍රීවරියන් වන ගරු නියෝජ්ය කාරක සභා සභාපතිනි හේමාලි වීරසේකර, ගරු පාර්ලිමේන්තු මන්ත්‍රීනී හසාරා ලියනගේ, තුෂාරි ජයසිංහ, අනුෂ්කා තිලකරත්න සහ එම්.ඒ.සී.එස්. චතුරි ගංගානි යන මහත්මීහු සහභාගී වූහ. එසේම එක්සත් ජාතීන්ගේ සංවර්ධන වැඩසටහනේ (UNDP) ශ්‍රී ලංකා නේවාසික නියෝජිත අසූසා කුබෝටා මහත්මිය, එක්සත් ජාතීන්ගේ සංවර්ධන වැඩසටහනේ පාර්ලිමේන්තු සහ මාධ්‍ය විශේෂඥ චතුරංග හපුආරච්චි මහතා, උතුරු පළාතේ ජ්‍යේෂ්ඨ රජයේ නිලධාරීන් පිරිසක් මෙන්ම යාපනය විශ්ව විද්‍යාලයේ නියෝජිත පිරිසක් ද මෙම අවස්ථාවට එක්ව සිටියහ.මෙම වැඩසටහනේ ප්‍රතිඵලයක් ලෙස තිරසාර උපදේශක ජාලයක් නිර්මාණය කිරීම සහ උතුරේ කාන්තා නායිකාවන්ගේ අදහස් සහ නිර්දේශ අන්තර්ගත කරමින් වාර්තාවක් සකස් කිරීමට තීරණය විය. නායකත්වයේදී කාන්තාවන් මුහුණ දෙන අභියෝග ජය ගැනීමටත් ශ්‍රී ලංකාව තුළ අන්තර්කරණය ශක්තිමත් කරමින් ප්‍රතිපත්තිමය තීරණ ඉදිරියට ගෙන යාම සඳහා කාන්තා පාර්ලිමේන්තු මන්ත්‍රීවරියන්ගේ සංසදයට මෙම වාර්තාව සහාය වනු ඇත.
2025-11-08
රුහුණු විශ්වවිද්‍යාලයේ සම සෞඛ්‍ය පීඨයේ 17 වන කාණ්ඩායමේ සිසුන්ගේ අධ්‍යයන කටයුතු, තාවකාලික පදනමින් හෝ අවශ්‍ය මානව සම්පත ලබාගෙන ආරම්භ කිරීමට අවශ්‍ය කටයුතු සිදු කරන ලෙස අධ්‍යාපනය, ශ්‍රම බලකාය සහ මානව ප්‍රාග්ධනය පිළිබඳ ආංශික අධීක්ෂණ කාරක සභාව විසින් රුහුණු විශ්වවිද්‍යාලයේ වැඩබලන උපකුලපතිවරයා ඇතුළු අධ්‍යාපන අමාත්‍යාංශ නිලධාරීන්ට උපදෙස් ලබාදෙන ලදී.2023 අ.පො.ස. (උසස් පෙළ) විභාගයට පෙනී සිට විශ්වවිද්‍යාල වරම් ලැබූ ශිෂ්‍යයන්, රුහුණ සම සෞඛ්‍ය පීඨයට තේරී පත්වී වසරකට අධික කාලයක් ගත වී තිබෙන නමුත් සම සෞඛ්‍ය පීඨයේ පවතින මානව සම්පත් හිඟය හේතුවෙන් මේ දක්වා එකී ශිෂ්‍ය කණ්ඩායම වෙනුවෙන් අධ්‍යයන කටයුතු ආරම්භ කිරීමට අපොහොසත් වී ඇති බවද විශ්වවිද්‍යාල බලධාරීහු පැවැසුහ.මේ පිළිබඳ කරුණු සාකච්ඡා වූයේ අධ්‍යාපනය, ශ්‍රම බලකාය සහ මානව ප්‍රාග්ධනය පිළිබඳ ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී හේෂා විතානගේ මහතාගේ සභාපතිත්වයෙන් 30.10.2025 වන දින පාර්ලිමේතුන්වේදී රැස්වූ අවස්ථාවේදීය. මෙම රැස්වීම සඳහා ගරු විපක්ෂනායක සජිත් ප්‍රේමදාස මහතාද එක්ව සිටියේය. මෙහිදී අදහස් දක්වමින් විශ්වවිද්‍යාල බලධාරීහු රුහුණ සම සෞඛ්‍ය පීඨයේ පවතින මානව සම්පත් හිඟය පිළිබඳව කාරක සභාවට කරුණු ඉදිරිපත් කළහ.කෙසේ වෙතත් තමන්ට අවශ්‍ය මානව සම්පත ලබාදීමට මේ වනවිට අවශ්‍ය කටයුතු සිදුවෙමින් පවතින බවත් එම නිලධාරීහු පැවසුහ.මෙහිදී අදහස් දක්වමින් ගරු විපක්ෂනායක සජිත් ප්‍රේමදාස මහතා උද්ගතවී ඇති ගැටලුව හේතුවෙන් සිසුන් 250 ක පිරිසක් දැඩි පීඩාවකට පත්ව ඇති බවත් එම ගැටලුව නිරාකරණය කිරීමට තාවකාලික පදනමින් හෝ අවශ්‍ය මානව සම්පත ලබාගෙන අධ්‍යන කටයුතු ආරම්භ කිරීමේ වැදගත්කම අවධාරණය කළේය.ඒ අනුව අධ්‍යාපන අමාත්‍යාංශය සමග සාකච්ඡා කර අදාළ පියවරයන් කඩිනමින් ක්‍රියාත්මක කර සම සෞඛ්‍ය පීඨයේ 17 වන කාණ්ඩයේ සිසුන්ගේ අධ්‍යයන කටයුතු ආරම්භ කිරීමට අපේක්ෂා කරන බව විශ්වවිද්‍යාලයේ නිලධාරීහු පැවසුහ.මේ අතර 2025 වර්ෂය සඳහා අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය, යෞවන කටයුතු සහ ක්‍රීඩා යන අමාත්‍යාංශ වල අයවැය යෝජනාවල මූල්‍ය හා භෞතික ප්‍රගතිය සහ 2025.12.31 දක්වා අපේක්ෂිත ප්‍රගතිය ද මෙදින කාරක සභාවේදී සලකා බලන ලදී. එහිදී අදාළ අමාත්‍යාංශවල මූල්‍ය හා භෞතික ප්‍රගතිය පොදුවේ බලපාන ගැටලු කාරී තත්ත්වයන් කිහිපයක් හේතුවෙන් අපේක්ෂිත මට්ටමට ළඟා කරගැනීමට නොහැකි වූ බව අමාත්‍යාංශ ලේකම්වරු පෙන්වා දුන්හ. ප්‍රසම්පාදන ක්‍රියාවලිය සහ ගොඩනැගිලි ඉදිකිරිමේදී පවතින ගැටලු හේතුවෙන් අදාළ ප්‍රගතිය ලබාගැනීමට අපොහොසත් වී ඇති බවත් මේ වසරේ තවත් කෙටි කාලයක් පවතින බැවින් අදාළ ප්‍රගතීන් වැඩි කරගැනීමට අපේක්ෂා කරන බවත් පැවැසුහ.මේ අවස්ථාව සඳහා ගරු පාර්ලිමේන්තු මන්ත්‍රීවරුන් වන සුගත් වසන්ත ද සිල්වා, සුනිල් රාජපක්‍ෂ, චානක මාදුගොඩ යන මහත්වරුන්, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය, යෞවන කටයුතු සහ ක්‍රීඩා යන අමාත්‍යාංශවල ලේකම්වරුන් ඇතුළු නිලධාරීන්, විශ්වවිද්‍යාල ප්‍රතිපාදන කොමිෂන් සභාවේ සභාපති, රුහුණු විශ්වවිද්‍යාලයේ වැඩබලන උපකුලපති, සම සෞඛ්‍ය පීඨයේ පීඨාධිපති හා ආචාර්ය මණ්ඩලයේ සමාජිකයින් ඇතුළු පිරිසක් සහභාගී වූහ.
2025-11-08
ආබාධ සහිත පුද්ගලයන්ට ඔබ ලබාදෙන සේවාවෙන් ඔවුන් තෘප්තිමත් නම් සේවාව සපයන ඔබටත් තෘප්තිමත් විය හැකියි - ගරු පාර්ලිමේන්තු මන්ත්‍රී සුගත් වසන්ත ද සිල්වා මහතා ආබාධ සහිත පුද්ගලයන් සඳහා සේවා සැපයීම වැඩිදියුණු කිරීම පිළිබඳ දිස්ත්‍රික් මට්ටමේ උපදෙස් ලබාගැනීම සඳහා වූ විශේෂ වැඩසටහනක් ආබාධ සහිත වූවන් සඳහා වන පාර්ලිමේන්තු සංසදයේ මූලිකත්වයෙන් පසුගියදා (නොවැ. 04) කිලිනොච්චි දිස්ත්‍රික් ලේකම් කාර්යාලයේ හැකියා වර්ධන මධ්‍යස්ථානයේදී පැවැත්විණි. දසවැනි පාර්ලිමේන්තුවේ ආබාධ සහිත වූවන් සඳහා වන පාර්ලිමේන්තු සංසදයේ, “ආබාධිතභාවයට සංවේදී පාර්ලිමේන්තුවක්” යන අභිලාෂයට අනුව දිවයින පුරා ආබාධ සහිත පුද්ගලයින්ගෙන් සෘජු අදහස් ලබා ගැනීමේ වැඩසටහන් මාලාවක් සංවිධානය කළ අතර එහි පළමු අදියර මෙලෙස කිලිනොච්චි සහ මුලතිව් දිස්ත්‍රික්ක කේන්ද්‍ර කරගනිමින් පැවැත්විණි.ආබාධ සහිත වූවන් සඳහා වන පාර්ලිමේන්තු සංසදයේ සභාපති ගරු පාර්ලිමේන්තු මන්ත්‍රී සුගත් වසන්ත ද සිල්වා මහතාගේ ප්‍රධානත්වයෙන් පැවති මෙම විශේෂ වැඩසටහන සඳහා එම සංසදයේ නියෝජ්ය සම-සභාපති ගරු පාර්ලිමේන්තු මන්ත්‍රී (වෛද්‍ය) පත්මනාදන් සත්‍යලිංගම් මහතා ද සහභාගී විය. මේ අතර, කිලිනොච්චි දිස්ත්‍රික් ලේකම් එස්. මුරලිදරන්, මුලතිව් අතිරේක දිස්ත්‍රික් ලේකම් සතීසන් මන්ජුලාදේවි යන මහත්ම මහත්මීන්, පළාත්පාලන ආයතනවල මහජන නියෝජිතයන්, ප්‍රාදේශීය ලේකම් කොට්ඨාසයන්හි ප්‍රාදේශීය ලේකම්වරුන් ඇතුළු ප්‍රාදේශීය රාජ්‍ය ආයතන නියෝජනය කරන නිලධාරීන්, සෞඛ්‍ය අංශ නියෝජනය කරන නිලධාරීන්, පොලිස් නිලධාරීන්, කිලිනොච්චි සහ මුලතිව් දිස්ත්‍රික්කවල ආබාධ සහිත වූවන් නියෝජයන කරන සංවිධානවල නියෝජිත පිරිස් සහ අබාධ සහිත පුද්ගලයන් ඇතුළු 100 කට ආසන්න පිරිසක් මෙම වැඩසහටනට සහභාගී වූහ. ඕස්ට්‍රේලියානු රජයේ සහයෝගයෙන් කිලිනොච්චි සහ මුලතිව් දිස්ත්‍රික් ලේකම් කාර්යාල සමඟ ඒකාබද්ධව මැතිවරණ ක්‍රමය සඳහා වූ ජාත්‍යන්තර පදනමේ (IFES) අනුග්‍රහයෙන් මෙම වැඩසටහන පැවති අතර, එම පදනමේ වැඩසටහන් නිලධාරිනී අනෝජිතා සිවාස්කරන් මෙනවියද මෙම අවස්ථාවට එක්ව සිටියාය. මෙහිදී අදහස් දක්වමින් සංසදයේ සභාපති ගරු පාර්ලිමේන්තු මන්ත්‍රී සුගත් වසන්ත ද සිල්වා මහතා පැවසුවේ සේවාවන් ලබාගැනීම සඳහා තමන් ඉදිරියට පැමිණෙන අබාධ සහිත පුද්ගලයන්ට මානුෂීයව සලකා ඔවුන්ට අවශ්‍ය සේවාවන් ලබාදෙන ලෙස සියලුම රාජ්‍ය නිලධාරීන්ගෙන් ඉල්ලා සිටියේය. අබාධ සහිත පුද්ගලයන්ගේ අවශ්‍යතා හඳුනාගැනීමට ඔවුන්ගේ ස්ථානයේ සිට බැලීමෙන් ඔවුන්ට සැබැවින්ම අවශ්‍ය වන්නේ කුමක්දැයි නිවැරදිව හඳුනාගත හැකි බවත්, එලෙස සේවාවන් ලබාගැනීමට පැමිණෙන අබාධ සහිත පුද්ගලයන්ගේ සිනහවෙන් ඔබගේ රැකියාවේ තෘප්තිය දැකගත හැකි බවත් හෙතෙම සඳහන් කළේය. මේ අතර, දැනට පවතින අබාධ සහිත තැනැත්තන්ගේ අයිතිවාසිකම් ආරක්ෂා කිරීමේ පනත සංශෝධනය කිරීම සඳහා පියවර ගෙන ඇති බවත්, එයට පසුගිය දශක දෙකක පමණ වෙනස්කම් සැලකිල්ලට ගෙන ඇති බවත් සංසදයේ සභාපතිවරයා පැවසීය. තවද, මෙම පනත් කෙටුම්පත සඳහා ආබාධ සහිත පුද්ගලයින්ගේ අයිතිවාසිකම් පිළිබඳ එක්සත් ජාතීන්ගේ සම්මුතියේ (UNCRPD) පවතින 25 කට අධික අයිතිවාසිකම් ඇතුළත් කිරීමට කටයුතු කරන බවත්, එයට සමගාමීව ආබාධ සහිත පුද්ගලයින් පිළිබඳ ජාතික ප්‍රතිපත්තිය සහ ජාතික ක්‍රියාකාරී සැලැස්ම ද කෙටුම්පත් කිරීමට පියවර ගෙන ඇති බවත් හතෙම පෙන්වා දුන්නේය. මෙහිදී අදහස් දැක්වූ සංසදයේ නියෝජ්ය සම සභාපති ගරු පාර්ලිමේන්තු මන්ත්‍රී (වෛද්‍ය) පත්මනාදන් සත්‍යලිංගම් මහතා, ආබාධ සහිත පුද්ගලයන්ගේ අවශ්‍යතා වැඩි වශයෙන් පවතින උතුරු පළාතේ මෙවැනි වැඩසටහනක් පැවැත්වීම ඉතා වැදගත් බවත් දසවැනි පාර්ලිමේන්තුවේ ආබාධ සහිත වූවන් සඳහා වන පාර්ලිමේන්තු සංසදය දේශපාලන භේදයකින් තොරව ආබාධ සහිත ප්‍රජාවන්ට අදාළ නීතිමය සහ ප්‍රතිපත්තිමය ප්‍රතිසංස්කරණයන් වෙනුවෙන් පෙනී සිටින බවත් සඳහන් කළේය. ආබාධ සහිත පුද්ගලයන් පිළිබඳ ජාත්‍යන්තර දිනයට අදාළ ජාතික වැඩසටහන මෙවර යාපනය දිස්ත්‍රික්කයේ පැවැත්වීමටද අවශ්‍ය කටයුතු සලසා ඇති බවද ඒ මහතා පෙන්වා දුන්නේය. එසේම මාර්ග අනතුරු අවම කිරීමට සහ මාර්ග නීති පිළිපැදීමේදී, මාර්ග නීතිය ක්‍රියාත්මක කිරීමේදී පොලිසියේ සහයෝගය තවදුරටත් අවශ්‍යවීමේ වැදගත්කමද හෙතෙම පෙන්වා දුන්නේය. මේ අතර කිලිනොච්චි දිස්ත්‍රික් ලේකම් එස්. මුරලිදරන් සහ මුලතිව් අතිරේක දිස්ත්‍රික් ලේකම් සතීසන් මන්ජුලාදේවි යන මහත්ම මහත්මීන් ද අදහස් දැක්වූ අතර, ආබාධ සහිත තැනැත්තන් සඳහා රජයෙන් ලබාදෙන ප්‍රතිලාභ ඔවුන්ගේ අවශ්‍යතාවයන් සම්පූර්ණයෙන් ඉටු කිරීමට ප්‍රමාණවත් නොවන බවත්, ඉදිරියේදී එම ප්‍රතිලාභයන් වැඩි කිරීම සඳහා ප්‍රතිපත්තිමය තීරණය ගැනීමේ අවශ්‍යතාවයත් ඔවුහු පෙන්වා දුන්හ.ඒ අනුව කිලිනොච්චි සහ මුලතිව් දිස්ත්‍රික්කවල අබාධ සහිත පුද්ගලයන් මුහුණ දෙන අභියෝග සහ ගැටලු නිරාකරණය කර ගැනීමට අදාළ ප්‍රාදේශීය මට්ටමේ රාජ්‍ය ආයතනවලින් සැපයිය හැකි සේවාවන් සහ ඒවා වැඩිදියුණු කිරීමට අදාළ යෝජනා පිළිබඳ මෙහිදී දීර්ඝ ලෙස සාකච්ඡා කිරීම සිදුවිය. එසේම, සමාජ සේවා නිලධාරීන් නොමැතිකම, ආබාධ සහිත පුද්ගලයින් සඳහා ජාතික වශයෙන් පිළිගත් හැඳුනුම්පතක් තිබීමේ අවශ්‍යතාවය, රැකියා අවස්ථා සුරක්ෂිත කිරීම, ආබාධ සහිත පුද්ගලයින් සෞඛ්‍ය සහ ප්‍රවාහන සේවාවන් ලබාගැනීමේ ඇති අභියෝග, ස්වයං රැකියාවල නියැලීමට හැකි ආබාධ සහිත පුද්ගලයින් සඳහා ඉඩම් අවශ්‍යතා සපුරාලීම, සංඥා භාෂා පරිවර්තන අවශ්‍යතා, ආබාධ සහිත පුද්ගලයින් සඳහා වාහන බලපත්‍ර නිකුත් කිරීමේදී පවතින ගැටලු, ආබාධ සහිත සිසුන් සඳහා පුහුණු ගුරුවරුන්ගේ අවශ්‍යතා සහ වඩා හොඳ පහසුකම් සහිත පාසල් ඇතුළු දිස්ත්‍රික්ක තුළ පවතින ප්‍රතිපත්තිමය සහ ප්‍රායෝගික අභියෝග කෙරෙහි මෙහිදී දීර්ඝ වශයෙන් සාකච්ඡා කෙරිණි.මෙහිදී ඉදිරිපත් වූ කරුණුවලට අදාළව සංසදය විසින් නිර්දේශ සහ විසඳුම් ඉදිරිපත් කිරීමද සිදු විය. මෙම අදහස් ලබාගැනීමෙන් අනතුරුව, අවශ්‍ය ප්‍රතිපත්තිමය වෙනස්කම් සඳහා පාර්ලිමේන්තු සංසදය විසින් අදාළ අමාත්‍යාංශ සහ පාර්ලිමේන්තුව සමඟ කටයුතු කරන බව සංසදයේ ගරු සභාපතිවරයා පැවසූ අතර දිස්ත්‍රික් මට්ටමේ සේවා සැපයීමේදී ඒවා නිවැරදිව ක්‍රියාත්මක වීම සහතික කිරීම වැනි කටයුතු පිළිබඳව දිස්ත්‍රික් ලේකම් කාර්යාලය පසු විපරම් කිරීම කෙරෙහි මැදිහත් වන බව පැමිණි නිලධාරීහු පැවසූහ.
2025-11-06
චීන මහජන දේශපාලන උපදේශන සමුළුවේ (CPPCC) ජාතික කමිටුවේ සාමාජික සහ එහි ආර්ථික කටයුතු කමිටුවේ අධ්‍යක්ෂ ගරු වැන්ග් ගුෂෙන්ග් (Hon. Wang Guosheng) මහතාගේ නායකත්වයෙන් යුත් ඉහළ පෙළේ චීන නියෝජිත පිරිසක් අද (නොවැ. 06) ශ්‍රී ලංකා පාර්ලිමේන්තුවේ කාරක සභා කිහිපයක සාමාජිකයන් හමුවී සාකච්ඡා පැවැත්වූහ.ඒ අනුව, නියෝජිත පිරිස පාර්ලිමේන්තු පරිශ්‍රයේදී ක්‍රම සහ විධි පිළිබඳ කාරක සභාවේ සහ ආර්ථික සංවර්ධනය සහ ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සාමාජිකයින් ඇතුළු පාර්ලිමේන්තු මන්ත්‍රීවරු පිරිසක් හමුවූහ.ගරු නියෝජ්ය කථානායක වෛද්‍ය රිස්වි සාලි මහතා සමග දිවා භෝජන සංග්‍රහයකට ද නියෝජිත පිරිස එක් වූ අතර දෙරට අතර ද්විපාර්ශ්වික සබඳතා තවදුරටත් වැඩිදියුණු කිරීම පිළිබඳව මෙහිදි සාකච්ඡා විය.මෙම සාකච්ඡාවලදී ද්විපාර්ශ්වික සහයෝගීතාව ශක්තිමත් කිරීම සඳහා චීනයේ කැපවීම නියෝජිත පිරිස නැවත තහවුරු කළ අතර බහුවිධ අංශ හරහා ශ්‍රී ලංකාව තුළ චීන ආයෝජන දිරිමත් කිරීමේ සිය අපේක්ෂාව පිළිබඳව ද සඳහන් කළහ.ක්‍රම සහ විධි පිළිබඳ කාරක සභාවේ සභාපති ගරු පාර්ලිමේන්තු මන්ත්‍රී විජේසිරි බස්නායක, ආර්ථික සංවර්ධනය සහ ජාත්‍යන්තර සබඳතා පිළිබඳ ආංශික අධීක්ෂණ කමිටුවේ සභාපති ගරු පාර්ලිමේන්තු මන්ත්‍රිනි (නීතිඥ) ලක්මාලි හේමචන්ද්‍ර, ගරු පාර්ලිමේන්තු මන්ත්‍රීවරුන් වන රවී කරුණානායක, (නීතිඥ) සුජීව සේනසිංහ, සුජිත් සංජය පෙරේරා, රුවන් මාපලගම සහ චතුර ගලප්පත්ති යන මහත්ම මහත්මීහු මෙම සාකච්ඡාව සඳහා සහභාගී වූහ. එසේම පාර්ලිමේන්තුවේ මහලේකම් කුෂානි රෝහණධීර, ව්‍යවස්ථාදායක සේවා අධ්‍යක්ෂ හා සන්නිවේදන අධ්‍යක්ෂ (වැඩ බලන) එම්. ජයලත් පෙරේරා යන මහත්ම මහත්මීහු ද පාර්ලිමේන්තු නිලධාරීන් පිරිසක් ද මෙම රැස්වීමට සහභාගී වූහ.මෙහිදී ක්‍රම සහ විධි පිළිබඳ කාරක සභාවේ සභාපති ගරු පාර්ලිමේන්තු මන්ත්‍රී විජේසිරි බස්නායක මහතා, ශ්‍රී ලංකාව සහ චීනය අතර පවතින දිගුකාලීන මිත්‍රත්වය අවධාරණය කළ අතර, මෙම සංචාරය එම ද්විපාර්ශ්වික සබඳතා තවදුරටත් ශක්තිමත් කරන බව සඳහන් කළේය. විවිධ ක්ෂේත්‍ර ඔස්සේ චීනය ලබා දෙන අඛණ්ඩ සහයෝගයට ඔහු කෘතඥතාව පළ කළ අතර, ගරු ජනාධිපති අනුර කුමාර දිසානායක මහතාගේ මෑත කාලීන චීන සංචාරය මෙම සබඳතා තවදුරටත් වැඩිදියුණු කළ බව ඔහු පෙන්වා දුන්නේය.සාකච්ඡාවේදී අදහස් දැක්වූ ගරු වැන්ග් ගුෂෙන්ග් මහතා, ශ්‍රී ලංකාව චීනයේ සමීප මිතුරෙකු ලෙස සඳහන් කළ අතර සංචාරක, වෙළඳාම සහ ආයෝජන ඇතුළු විවිධ ක්ෂේත්‍රවල සහයෝගීතාව ඉදිරියට ගෙන යාම සඳහා චීනය කැපවන බව සඳහන් කළේය. ශ්‍රී ලංකාව තුළ තවත් චීන ආයෝජන දිරිමත් කිරීමට අපේක්ෂා කරන බව ද ඔහු පැවසීය.ආර්ථික සංවර්ධනය සහ ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සභාපති ගරු පාර්ලිමේන්තු මන්ත්‍රීනි (නීතිඥ) ලක්මාලි හේමචන්ද්‍ර මෙනවිය මෙහිදී අදහස් දක්වමින්, ශ්‍රී ලංකාවේ කර්මාන්ත අංශය ඉදිරියට ගෙන යාම සඳහා චීන සහාය අපේක්ෂා කරන බව සඳහන් කළ අතර, තිරසාර ආර්ථික සංවර්ධනය සහ තාක්‍ෂණය මත පදනම් වූ සංවර්ධනය සඳහා ශ්‍රී ලංකාව කටයුතු කරන බව අවධාරණය කළාය. මීට මාස කිහිපයකට පෙර චීනයේ සංචාරයක නිරත වූ ඇය ඇතුළු ශ්‍රී ලංකා නියෝජිත පිරිසට දැක්වූ ආගන්තුක සත්කාරය පිළිබඳව කෘතඥතාව ද ඇය මෙහිදී පළ කළාය.මෙහිදී අදහස් දැක්වූ ගරු පාර්ලිමේන්තු මන්ත්‍රීවරුන් වන රවී කරුණානායක සහ ගරු (නීතිඥ) සුජීව සේනසිංහ යන මහත්වරුන්, දෙරට අතර ආර්ථික සහයෝගීතාව වැඩිදියුණු කිරීමේ සහ ශ්‍රී ලංකාව තුළ නිෂ්පාදන කර්මාන්ත වැඩිදියුණු කිරීමේ අවශ්‍යතාවය අවධාරණය කළහ.චීන මහජන දේශපාලන උපදේශන සමුළුවේ (CPPCC) ජාතික කමිටුවේ සාමාජික සහ නියෝජ්ය අධ්‍යක්ෂ ගරු ෆු ෂිෆැන්ග්, CPPCC ආර්ථික කටයුතු කමිටුවේ සාමාජික ගරු මාඕ ඩිග්ෂි, CPPCC ආර්ථික කටයුතු කමිටුවේ කාර්යාලයේ අධ්‍යක්ෂ ලියු හුවාන්සිං සහ CPPCC ආර්ථික කටයුතු කමිටුවේ මූල්‍ය හා ආර්ථික අංශයේ අධ්‍යක්ෂ ෂැං ජින්ජි යන මහත්වරු චීන නියෝජිත පිරිසේ සාමාජිකයින් අතර වූහ. එසේම ශ්‍රී ලංකාවේ චීන තානාපති චී ෂෙන්හොං මහතා ද මෙම අවස්ථාවට එක්විය.ශ්‍රී ලංකාව සහ චීනය අතර සහයෝගීතාව වැඩිදියුණු කිරීම සඳහා දෙපාර්ශ්වයම තම කැපවීම නැවත තහවුරු කරමින් රැස්වීම අවසන් විය.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
