2025-09-10
පුවත් කාණ්ඩ : පුවත්
සියළුම විශ්වවිද්‍යාලවල ක්‍රීඩක ක්‍රීඩිකාවන්ගේ සහභාගීත්වයෙන් 15 වන විශ්වවිද්‍යාල ක්‍රීඩා උළෙල පසුගිය 04 වැනිදා රජරට විශ්වවිද්‍යාලයේ දී ගරු කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් ආරම්භ විය.
මේ සදහා අධ්‍යාපන ගරු නියෝජ්ය අමාත්‍ය මධුර සෙනවිරත්න මහතා සහ අනුරාධපුර දිස්ත්‍රීකයේ පාර්ලිමේන්තු මන්ත්‍රීවරයන්, විශ්වවිද්‍යාල උපකුලපතිවරුන්, ආචාර්යවරුන්, ප්‍රදේශයේ රාජ්‍ය නිලධාරීන් ඇතුළු පිරිසක් සහභාගී වූහ.
2025-09-12
පිළියන්දල මධ්‍ය විද්‍යාලයීය ශිෂ්‍ය පාර්ලිමේන්තුවේ මංගල සභාවාරය ජනාධිපති ලේකම් කාර්යාලයේ පැරණි පාර්ලිමේන්තු සභා ගර්භයේදී පසුගිය සැප්. 04 වැනිදා පැවැත්විණි. ඒ පාර්ලිමේන්තු මහ ලේකම් කුෂානි රෝහණදීර මහත්මියගේ ප්‍රධානත්වයෙනි.පිළියන්දල මධ්‍ය විද්‍යාලයීය ශිෂ්‍ය, ශිෂ්‍යාවන් සඳහා පාර්ලිමේන්තු ක්‍රමවේදය පිළිබඳ ප්‍රායෝගික අත්දැකීම් ලබාදීම අරමුණු කොටගෙන එම විද්‍යාලය හා ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව එක්ව මෙම වැඩසටහන සංවිධානය කර තිබුණි.මේ අවස්ථාව සඳහා ජනාධිපති ජ්‍යෙෂ්ඨ අතිරේක ලේකම් සුභාෂ් රොෂාන් ගමගේ, ජනාධිපති මහජන සම්බන්ධතා අධ්‍යක්ෂ ජනරාල් ධර්මසිරි ගමගේ, පාර්ලිමේන්තුවේ අධ්‍යක්ෂ (ව්‍යවස්ථාදායක සේවා) හා වැඩ බලන අධ්‍යක්ෂ (සන්නිවේදන) එම්. ජයලත් පෙරේරා යන මහත්වරුන්ද සහභාගීවූහ.මෙහිදී පාර්ලිමේන්තුවේ මහලේකම් කුෂානි රෝහණදීර මහත්මිය විසින් පාර්ලිමේන්තු ක්‍රියාවලිය හා එහි කාර්යභාරය පිළිබඳව පැහැදිලි කරමින්, පාර්ලිමේන්තුව ක්‍රියාත්මක වන ආකාරය පිළිබඳව දැනුවත් කළාය.තවද මේ අවස්ථාව සමගින් එක්වූ පාර්ලිමේන්තුවේ අධ්‍යක්ෂ (ව්‍යවස්ථාදායක සේවා) හා වැඩ බලන අධ්‍යක්ෂ (සන්නිවේදන) එම්. ජයලත් පෙරේරා මහතාද අදහස් දක්වමින් පාර්ලිමේන්තුවේ කාර්යභාරය හා සංයුතිය පිළිබඳව සිසුදරුවන් දැනුවත් කළේය.ඒ අනුව මෙහිදී පිළියන්දල මධ්‍ය විද්‍යාලයේ ශිෂ්‍ය පාර්ලිමේන්තුවේ මංගල සභාවාරය අරඹමින් කථානායකවරයා තෝරා පත්කර ගැනීම සිදුවුණි. අනතුරුව අග්‍රාමත්‍යවරයා ඇතුළු අමාත්‍ය මණ්ඩලය හා මන්ත්‍රී කණ්ඩායම දිවුරුම් දීම සිදුවිය. පසුව ශිෂ්‍ය පාර්ලිමේන්තුවේ එක් එක් ආමත්‍යවරයන් විසින් තම අමාත්‍යාංශ මගින් ක්‍රියාත්මක කිරීමට යෝජිත සැළසුම් පිළිබඳව සභාව දැනුවත් කරන ලදී.මෙහිදී ශිෂ්‍ය පාර්ලිමේන්තුව නියෝජනය කරන සිසු සිසුවියන් සඳහා සහතිකපත්‍ර ලබාදීම ද පාර්ලිමේන්තු මහ ලේකම්වරිය ප්‍රමුඛ ආරාධිතයින්ගේ ප්‍රධානත්වයෙන් සිදුවිය.මෙම වැඩසටහන සඳහා ජනාධිපති ලේකම් කාර්යාලයේ සහකාර අධ්‍යක්ෂ මේජර් නදීක දංගොල්ල, පිළියන්දල මධ්‍ය විද්‍යාලයේ විදුහල්පති එච්. මහේෂිකා විජයරත්න, පිළියන්දල මධ්‍ය විද්‍යාලයේ ආචාර්ය මණ්ඩලයේ සාමාජිකයින් හා පාර්ලිමේන්තුවේ සන්නිවේදන දෙපාර්තමේන්තුවේ නිලධාරීහු පිරිසක්ද එක්ව සිටියහ.
2025-09-12
පොළොන්නරුව වෘක්කවේද රෝහල චීන-ශ්‍රී ලංකා දිගු කාලීන මිත්‍රත්වය නිසා ශ්‍රී ලංකාවට ලැබුනු වටිනාම ත්‍යාගයක් බව පාර්ලිමේන්තුවේ ගරු කථානායක වෛද්‍ය ජගත් වික්‍රමරත්න මහතා පැවසීය. ඒ මහතා මේ බව සඳහන් කළේ පසුගියදා (සැප්. 05) කථානායක ජගත් වික්‍රමරත්න මහතාගේ සහ චීන තනාපතිවරයාගේ ප්‍රධානත්වයෙන් පොළොන්නරුව නගර සභා කාර්යාල පරිශ්‍රයේ දී පැවති චීන රජයේ ආධාර මත පොළොන්නරුව දිස්ත්‍රීකයේ අඩු ආදායම්ලාභී පවුල් නගා සිටුවීම සදහා ජීවනෝපාය වර්ධනය කිරීමේ උපකරණ ලබාදීමේ අවස්ථාවකට එක්වෙමිනි.මෙම අවස්ථාවේදී රුපියල් මිලියන පහළොවක් පමණ වන වටිනාකමකින් යුත් මහන මැශින් සහ ජල මෝටර් ප්‍රතිලාභීන් වෙත ලබාදීමට කටයුතු කෙරෙණි.එයට අමතරව චීන රජයේ ආධාර මත ඉදිකරන ලද පොළොන්නරුව විශේෂිත ජාතික වෘක්කවේද රෝහලේ සෞඛ්‍ය කටයුතු හා ඉදිරි සංවර්ධන කටයුතු සිදුවිය යුතු ආකාරය පිළිබඳව සොයා බැලීමටද චීන තානාපතිවරයා එක්වූ අතර චීන රජය විසින් ශ්‍රී ලංකාවට දක්වන සහයෝගය හා චීන ශ්‍රී ලංකා මිත්‍රත්ව රෝහල සදහා සිදුකරනු ලබන දායකත්වය අගයමින් චීන තානාපතිවරයාට විශේෂ සමරු තිළිණයක්ද ප්‍රධානය කිරීම මෙහිදී සිදුවිය.මෙම අවස්ථාව සදහා සෞඛ්‍ය ගරු නියෝජ්ය අමාත්‍ය හංසක විජේමුණි මහතා, නිවාස ගරු නියෝජ්ය අමාත්‍ය ටී.බී. සරත් මහතා, පොළොන්නරුව දිස්ත්‍රීක් ලේකම් සුජන්ත ඒකනායක මහතා, පොළොන්නරුව චීන ශ්‍රී ලංකා මිත්‍රත්ව ජාතික වෘක්කවේද රෝහලේ අධ්‍යක්ෂ විශේෂඥ වෛද්‍ය ඩිල්කා සමරසිංහ මහත්මිය සහ චීන නියෝජිතයින් ඇතුළු සෞඛ්‍ය නිළධාරීන් පිරිසක්ද සහභාගීවී සිටියහ.
2025-09-12
අයවැය පළමුවර කියවීම සැප්තැම්බර් 26අයවැය කථාව නොවැම්බර් 7 2026 වර්ෂයට අදාළ විසර්ජන පනත් කෙටුම්පත දෙවැනිවර කියවීම (අයවැය කථාව/අයවැය යෝජනා ඉදිරිපත් කිරීම) 2025 නොවැම්බර් 7 වැනිදා සිදු කිරීමටත් අනතුරුව නොවැම්බර් 8 සිට දෙසැම්බර් 5 දක්වා විවාදය පැවැත්වීමටත් අද (සැප්. 11) පැවැති පාර්ලිමේන්තු කටයුතු පිළිබඳ කාරක සභාවේදී තීරණය විය. ගරු කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් අද (11) පැවති පාර්ලිමේන්තු කටයුතු පිළිබඳ කාරක සභාවේදී මේ බව තීරණය වී තිබේ. මේ අනුව විසර්ජන පනත් කෙටුම්පත පළමුවර කියවීම සඳහා සැප්තැම්බර් 26 දින පාර්ලිමේන්තුවට ඉදිරිපත් කිරීමට නියමිත බවත් මහලේකම්වරිය පැවසුවාය. මුදල් විෂය භාර අමාත්‍යවරයා ලෙස ගරු ජනාධිපතිවරයා විසින් 2025 නොවැම්බර් 7 වැනිදා විසර්ජන පනත් කෙටුම්පත දෙවැනිවර කියවීම (අයවැය කථාව) සිදු කිරීමටත්, අනතුරුව නොවැම්බර් 8 සිට නොවැම්බර් 14 දක්වා දින 6ක් දෙවනවර කියවීමේ විවාදය පැවැත්වීමට මෙහිදී තීරණය වී ඇත. ඒ අනුව නොවැම්බර් 14 ප.ව. 6.00ට දෙවනවර කියවීමේ ඡන්ද විමසීම පැවැත්වේ.ඉන්පසු නොවැම්බර් 15 සිට දෙසැම්බර් 5 දක්වා දින 17ක් කාරක සභා අවස්ථාවේ විවාදය පැවැත්වීමටත් දෙසැම්බර් 5 ප.ව. 6.00 ට අයවැය තෙවනවර කියවීමේ ඡන්ද විමසීම පැවැත්වීමටත් මෙහිදී එකඟත්වය පළ වී ඇත.මෙම කාලසීමාව තුළ රජයේ නිවාඩු දින සහ ඉරිදා දින හැර සෙනසුරාදා දින ඇතුළුව සෑම දිනකම අයවැය විවාදය පැවැත්වේ. එසේම කාරක සභා අවස්ථාවේ විවාද කාලසීමාව තුළ පාර්ලිමේන්තුව සදුදා දිනවල පෙ.ව. 9.30 ටත්, අන් සෑම දිනකම පෙ.ව. 9.00 ට රැස්වීමටත් මෙහිදී තීරණය වී තිබේ. ඒ අනුව මෙම කාලසීමාව තුළ සෑම දිනකම ස්ථාවර නියෝග 22(1) සිට (6) පරිදි වැඩකටයුතුවලට අමතරව වාචික පිළිතුරු අපේක්ෂා කරන ප්‍රශ්න 5 කට සහ ස්ථාවර නියෝග 27(2) යටතේ ප්‍රශ්න 1ක් සඳහා කාලය වෙන් කිරීමටත් මෙහිදී එකඟත්වය පළ වී ඇත. එසේම මෙම කාල සීමාව තුළ ප.ව. 6.00 දක්වා අයවැය විවාදය පැවැත්වීමටත් ඡන්ද විමසීම් පැවැත්වෙන දිනයන් හැර අන් සෑම දිනකම ප.ව. 6.00 සිට ප.ව. 6.30 දක්වා රජයට සහ විපක්ෂයට 50:50 අනුපාතය මත පදනම්ව සභාව කල්තබන අවස්ථාවේ යෝජනා විවාදයට ගැනීමටත් මෙහිදී තීරණය විය.
2025-09-10
මන්ත්‍රීවරුන් යනු රටේ අයිතිකරුවන් නොව ජනතාව නීයෝජනය කරන්නා වූ තාවකාලික භාරකරුවන් බැවින් ඔවුන්ද රටේ නීතියට යටත් වන බව පාර්ලිමේන්තුවේ ගරු කථානායක වෛද්‍ය ජගත් වික්‍රමරත්න මහතා පැවසීය. ඒ් මහතා මේ අදහස් පළ කළේ කොළඹ ආනන්ද විද්‍යාලයේ ශිෂ්‍ය පාර්ලිමේන්තුවේ සිව්වන සභාවාරය පසුගියදා (සැප්. 3) පාර්ලිමේන්තුවේ ගරු කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් කොළඹ ආනන්ද විද්‍යාලයීය ඕල්කට් ශාලාවේදී පැවැත්වූ අවස්ථාවේදීය. මෙහිදී තවදුරටත් අදහස් දැක්වූ කථානායකවරයා දේශපාලනය අයහපත් දෙයක් නොවන බවත් දේශපාලනය තුළින් ජනතාවගේ පරමාධිපත්‍ය නීයෝජනය කරමින් ජනතාව වෙනුවෙන්, සමාජයේ ප්‍රගමනය වෙනුවෙන් නායකත්වය දීමත් සිදු කරන බව සඳහන් කළේය. ඒ නිසා අනාගත ශ්‍රි ලංකාවට දැනුම බුද්ධිය මෙන්ම යහපත් ආකල්ප ද දියුණු කරගත් නායකයින් තව තවත් අවශ්‍ය බැවින් තම දැනුම කුසලතා ආකල්ප වර්ධනය කරගැනීම සඳහා ශිෂ්‍ය පාර්ලිමේන්තුව කදිම අවස්ථාවක් කර ගන්නා ලෙස පැවසූ කථානායකවරයා සියළුදෙනා අවංක සහ නීතිගරුක පුරවැසියන් බවට පත්වීමේ වීමේ වැදගත්කමද අවධාරණය කළේය.තවද, මෙම අවස්ථාවට එක්වෙමින් අදහස් දැක්වූ පාර්ලිමේන්තුවේ අධ්‍යක්ෂ (ව්‍යවස්ථාදායක සේවා) සහ වැඩබලන අධ්‍යක්ෂ (සන්නිවේදන) එම්. ජයලත් පෙරේරා මහතා දරුවන්ගේ පෞරුෂ වර්ධනය සහ කුසලතා වැඩි දියුණු කිරීම සඳහා ශිෂ්‍ය පාර්ලිමේන්තු මහඟු පිලිවහලක් වන බව පෙන්වා දුන්නේය. තවද ඒ මහතා විසින් ව්‍යවස්ථාදායක ක්‍රියාවලිය සහ කාර්යයන් පිළිබඳවද සිසු දරුවන් දැනුවත් කළේය.සිසු දරුවන්ගේ නායකත්ව කුසලතා වර්ධනය සඳහා මෙම වැඩසටහන ඉතා වැදගත් මෙහෙයක් ඉටුකරන බවත් සිසුන්ට ලබා දී ඇති අවස්ථාව පිළිබඳව සිය කෘතඥතාව පලකරන බවත් කොළඹ ආනන්ද විද්‍යාලයේ විදුහල්පති ඩී.එම්.සී.පී දිසානායක තිලකරත්න මහතා අදහස් දක්වමින් පැවසුවේය.අනතුරුව ශිෂ්‍ය පාර්ලිමේන්තුවේ මංගල සභාවාරය ආරම්භ කිරීමෙන් පසු කථානායකවරයා පත් කිරීම හා දිවුරුම් දීම, මන්ත්‍රීවරුන් දිවුරුම් දීම ද සිදුවිය. අනතුරුව ශිෂ්‍ය පාර්ලිමේන්තු අග්‍රාමාත්‍යවරයා හා අනෙකුත් අමාත්‍යවරු අදහස් දැක්වීමෙන් පසු ශිෂ්‍ය පාර්ලිමේන්තුව කල් තැබිණි.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
