2021-08-04
පුවත් කාණ්ඩ : කාරක සභා පුවත්
අධිකරණ පද්ධතිය තුළ මේවන විට ඇති තදබදය අවම කොට කඩිනමින් නඩු විසදීම සඳහා විශේෂ තුන් අවුරුදු සැලැස්මක් ක්‍රියාත්මක කරන බව අධිකරණ අමාත්‍ය අලි සබ්‍රි මහතා මහතා ඊයේ (03) පැවති අධිකරණ කටයුතු පිළිබද අමාත්‍යාංශයීය උපදේශක කාරක සභා රැස්වීමේදී පැවසීය.
බස්නාහිර පළාත තුළ නව අධිකරණ පිහිටුවීම සහ පවතින අධිකරණවල යටිතල පහසුකම් සංවර්ධනය පිළිබද වූ තුන් අවුරුදු සැලැස්ම පිළිබදව සාකච්ඡා කෙරුණු මෙම රැස්වීමට රාජ්‍ය අමාත්‍යවරුන් වන ලොහාන් රත්වත්තේ , සුසිල් ප්‍රේමජයන්ත, පියල් නිශාන්ත සහ පාර්ලිමේන්තු මන්ත්‍රීවරයන් වන මහාචාර්ය තිස්ස විතාරණ, සාගර කාරියවසම්, ජනාධිපති නීතිඥ ජයන්ත වීරසිංහ, මර්ජාන් ෆලීල්, චන්දිම වීරක්කොඩි සහ කෝකිලා ගුණවර්ධන යන මහත්ම මහත්මීහු සහභාගී වූහ.
ලෝකයේ දියුණු රටවල ජනගහනයෙන් මිලියනයකට විනිසුරුවරුන් 200 කට වැඩි සංඛ්‍යාවක් සිටියද ශ්‍රී ලංකාවේ මේවන විට එම අගය 15 ක් බව ද අමාත්‍යවරයා මෙහිදී පෙන්වා දුන්නේය. මේ අනුව විනිසුරුවරුන් සංඛ්‍යාව 218 ක් දක්වාත් අධිකරණ සංඛ්‍යාව 245 දක්වාත් වැඩි කිරීමට අපේක්ෂා කරන බවද අමාත්‍යවරයා පැවසීය. එසේම එම විනිසුරුවරුන්ට අවශ්‍ය යටිතල පහසුකම් සංවර්ධනය කිරීම මෙම ඉදිරි තෙවසරක සැලැස්ම යටතේ කඩිනමින් සිදු කරන බවද ඒ මහතා පැවසීය.
තාක්ෂණයෙන් පිරිපුන් අධිකරණ පද්ධතියක් පිහිටුවීම යටතේ අධිකරණ පද්ධතිය ඩිජිටල්කරණය කිරීම මේ වන විටත් අරඹා ඇති බවත් “E-Filing” ක්‍රමය සහ වීඩියෝ තාක්ෂණය හරහා අධිකරණ රැස්වීම් පැවැත්වීමට අදාළ තාක්ෂණික සැපයුම් ආයතන සමග මේ වන විට ගිවිසුම්ගතව ඇති බවද මෙහිදී අනාවරණය විය.
සමථ මණ්ඩලය ශක්තිමත් කිරීමත් විසඳන ආරවුල් ප්‍රමාණය ලබන වසර වන විට දෙගුණ කිරීමටත් බලාපොරොත්තු වේ. එසේම ඉඩම් ආරවුල් විසදීම සඳහා ඉඩම් සමථ කිරීමේ සමථ මණ්ඩල යාපනය, අනුරාධපුරය, ත්‍රිකුණාමලය, මඩකලපුව, කිලිනොච්චිය ඇතුළු ප්‍රදේශ රැසක ස්ථාපිත කිරීමට කටයුතු කොට ඇති බවද මෙහිදී අනාවරණය විය.
අධිකරණ ක්ෂේත්‍රයේ ප්‍රතිසංස්කරණ සඳහා විද්වතුන්ගෙන් සැදුම්ලත් කමිටු කිහිපයක් පිහිටුවා ඇති බවත් ශ්‍රේෂ්ඨාධිකරණ විනිසුරු සමයවර්ධන මහතාගේ ප්‍රධානත්වයෙන් පිහිටවනු ලැබූ කමිටුවේ වාර්තාව මේ වන ලැබී ඇති බැවින් ඊට අනුව නව අධිකරණ පිහිටුවීම ඇතුළු යටිතල පහසුකම් වැඩි දියුණු කිරීමේ කටයුතු සිදු කරන බව ද අමාත්‍යවරයා පෙන්වා දුන්නේය.
එම කමිටු නිර්දේශයන්ට අනුව බස්නාහිර පළාතේ මහර දිසා අධිකරණයක් ද , මීරිගම දිසා සහ මහේස්ත්‍රාත් අධිකරණ ද , වැලිසර දිසා අධිකරණයක්ද , බේරුවල මහේස්ත්‍රාත් අධිකරණයක්ද කළුතර මීගහතැන්න මහේස්ත්‍රාත් අධිකරණයක්ද අලුතින් ඉදිකිරීමට පියවර ගන්නා බව අනාවරණය විය.
මෙහිදී දැනට අධිකරණ ශාලාවල පවතින අඩුපාඩු පිළිබද මන්ත්‍රීවරු කරුණු පෙන්වා දුන් අතර ඒවා ඉතා කඩිනමින් ප්‍රතිසංස්කරණය කිරීමටත් මෙම තුන් අවුරුදු සැලැස්ම යටතේ පියවර ගන්නා බව අමාත්‍යවරයා පැවසූ අතර නිලධාරීන්ට අවශ්‍ය උපදෙස් ලබා දුන්නේය.
විශාල මූල්‍ය අපරාධ නඩු හා කුඩා මූල්‍ය වංචා නඩු එකම අධිකරණයක විභාග කිරීමෙන් ඇතිවන ප්‍රමාදය වැළැක්වීමට මූල්‍ය අපරාධවලට අදාළ නඩු විසදීමේදී රු. මිලියන 1.5ට නඩුවලට වෙනම අධිකරණ පිහිටුවන බවද අමාත්‍යවරයා පැවසීය.
දඩුවම් ලබා දීමට වෙනුවට ක්‍රියාත්මක කරන ප්‍රජා විශෝධන ක්‍රියාවලියෙහි වැදගත්කම අවධාරණය කළ අමාත්‍යවරයා ප්‍රජා විශෝධනය වැඩි දියුණු කිරීම සඳහා හැකි සෑම පියවරක්ම ගන්නා බවද පැවසීය.
අධිකරණ රැසක් එකම නිවහනකට ගෙන එමින් මේ වන විට කොළඹ අලුත්කඩේ ප්‍රදේශයේ ඉදිකරමින් පවතින අධිකරණ පියස කඩිනමින් නිම කරන බවද මෙහිදී අමාත්‍යවරයා පැවසීය. අක්කර 6.5 ක වපසරියකින් යුත් භූමියක ඉදිවන මෙමගින් අධිකරණ විශාල ප්‍රමාණයක් එකම ස්ථානයක රැගෙන එන අධිකරණ සංකීර්ණයක් පිහිටුවනු ලැබේ. අධිකරණ අමාත්‍යාංශයද මෙම සංකීර්ණයේ ස්ථාපිත කරනු ලබන අතර විනිසුරුවරුන්ට නිවාස 50ක්ද ඉදිකෙරේ. අදියර හතරකින් ක්‍රියාත්මක වන මෙහි ඉදිකිරීම් කටයුතු පිළිබද තමා පෞද්ගලිකව නිරීක්ෂණය කරන බවත් එම කටයුතු කඩිනමින් නිමකරන බවත් අමාත්‍යවරයා පැවසීය.
එසේම අලුත් කඩේ උසාවි සංකීර්ණය අලුත්වැඩියා කිරීමේ කටයුතු මේ වන විට කඩිනමින් සිදුකරන බවද ඔහු පවසා සිටියේය. මේ සඳහා චීන රජයෙන් යුවාන් මිලියන 500 ක පමණ ප්‍රදානයක් ලැබී තිබුණද 2010 වසරේ සිට ප්‍රමාද වූ එම කාර්ය සිදු කිරීමට හැකිවූ බවද අමාත්‍යවරයා පැවසීය.
ළමා අපචාර සම්බන්ධ නඩු කටයුතු කඩිනම් කිරීමට ඇති හැකියාව පිළිබද මෙහිදී රාජ්‍ය අමාත්‍ය පියල් නිශාන්ත මහතා විමසීය. ගරු අගවිනිසුරුතුමා පසුගියදා මේ පිළිබදව විශේෂ චක්‍රලේඛයක් නිකුත් කර ඇති බවත් මේ අනුව ළමා අපචාර සිද්ධීන්ට අදාළ නඩු කඩිනමින් අසා නිමකරන බවද අමාත්‍යවරයා පැවසීය.
අධිකරණ අමාත්‍යාංශයේ ලේකම් එම්.පී.කේ. මායාදුන්නේ මහතා ඇතුළු නිලධාරීහූ මෙම අවස්ථාවට එක්ව සිටියහ.
2025-02-16
පළාත් පාලන ආයතන ජන්ද විමසීම් (විශේෂ විධිවිධාන) පනත් කෙටුම්පතට රාජ්‍ය පරිපාලන, පළාත් සභා සහ පළාත් පාලන කටයුතු පිළිබඳ අමාත්‍යාංශයීය උපදේශක කාරක සභාවේ අනුමතිය හිමි විය.මේ සඳහා අනුමතිය හිමි වූයේ රාජ්‍ය පරිපාලන, පළාත් සභා සහ පළාත් පාලන කටයුතු පිළිබඳ අමාත්‍යාංශයීය උපදේශක කාරක සභාව එහි සභාපති ගරු අමාත්‍ය (මහාචාර්ය) ඒ.එච්.එම්.එච්. අබයරත්න මහතාගේ සභාපතිත්වයෙන් අද (පෙබ. 14) පාර්ලිමේන්තුවේ දී රැස්වූ අවස්ථාවේදී ය.එසේම මෙහිදී 2021 සහ 2022 යන වර්ෂ සඳහා දුරස්ථ ඉගෙනුම් මධ්‍යස්ථානයේ වාර්ෂික වාර්තාවද කාරක සභාවේ සලකා බැලීමෙන් අනතුරුව අනුමතිය හිමි විය.මෙම කාරක සභාව සඳහා ගරු නියෝජ්ය අමාත්‍ය රුවන් සෙනරත් මහතා ඇතුළු නියෝජ්ය අමාත්‍යවරු, ගරු විපක්ෂ නායක සජිත් ප්‍රේමදාස මහතා සහ කාරක සභාවේ සාමාජික මන්ත්‍රීවරු ඇතුළු රාජ්‍ය නිලධාරීහු සහභාගී වූහ.
2025-02-13
සතොස වෙළඳසැල් ජාලය ඔස්සේ මාළු අලෙවි කිරීම සඳහා ධීවර සහ වෙළඳ අමාත්‍යාංශ එක්ව ඒකාබද්ධ වැඩපිළිවෙළක්...උතුරු හා නැගෙනහිර පළාත්වල පවතින වරායවල් ප්‍රතිසංස්කරණය සම්බන්ධයෙන් ධීවර අමාත්‍යාංශයෙන් වැඩි අවධානයක් - කාරක සභා සභාපති ඉන්දීය ධීවරයින් නීති විරෝධීව මෙරට මුහුදු සීමාවට ඇතුළුවීම වැළැක්වීම සඳහා අවශ්‍ය ක්‍රියාමාර්ග ගනිමින් සිටින බව ධීවර, ජලජ සහ සාගර සම්පත් කටයුතු පිළිබඳ ගරු අමාත්‍ය රාමලිංගම් චන්ද්‍රසේකර් මහතා පැවසුවේය.එම අදහස් පළවූයේ ධීවර, ජලජ සහ සාගර සම්පත් කටයුතු පිළිබඳ අමාත්‍යාංශයීය උපදේශක කාරක සභාවේ පළමු රැස්වීම ඒ මහතාගේ සභාපතිත්වයෙන් පසුගිය පෙබ. 07 වනදා පාර්ලිමේන්තුවේදී රැස්වූ අවස්ථාවේදී ය. මේ අවස්ථාව සඳහා ධීවර, ජලජ සහ සාගර සම්පත් කටයුතු පිළිබඳ ගරු නියෝජ්ය අමාත්‍ය රත්න ගමගේ මහතාද එක්ව සිටියේය.ඒ අනුව මෙම ඉන්දීය ධීවරයින්ගේ ගැටලුව විසඳීම සඳහා තමිල්නාඩුව සහ ඉන්දීය මහ කොමසාරිස්වරයා සමග අවශ්‍ය සාකච්ඡා මේ වන විට සිදුකෙරෙමින් පවතින බව ගරු අමාත්‍ය රාමලිංගම් චන්ද්‍රසේකර් මහතා පැවසුවේය. ගැටුම් මාර්ගයෙන් තොරව මෙරට ධීවරයින්ට බලපා ඇති මෙම ගැටලුව සඳහා කඩිනමින් විසඳුම් ලබාදෙන බවද අමාත්‍යවරයා මෙහිදී වැඩි දුරටත් අදහස් දක්වමින් පැවසුවේය.මේ අතර සතොස වෙළඳසැල් ජාලය ඔස්සේ මාළු අලෙවි කිරීම සඳහා ධීවර සහ වෙළඳ අමාත්‍යාංශ ඒකාබද්ධව වැඩසටහනක් ආරම්භ කිරීම පිළිබඳව ද මෙහිදී දීර්ඝ ලෙස සාකච්ජා විය. මෙහිදී අදහස් දක්වමින් වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන ගරු අමාත්‍ය වසන්ත සමරසිංහ මහතා, සතොස වෙළඳසැල් ජාලය ඉදිරියේදී පුළුල් කිරීමට සැලසුම් කර ඇති බවත්, ඒ අනුව එම වෙළඳසැල් ඔස්සේ මාළු අලෙවි කිරීම සඳහා අවශ්‍ය කටයුතු සම්පාදනය කිරීමට හැකි බව පැවසුවේය. ලංකා ධීවර සංස්ථාවේ නිලධාරීහු මෙහිදී අදහස් දක්වමින් සතොස වෙළඳසැල් ජාලය හරහා මාළු අලෙවි කිරීමට අවශ්‍ය ඉදිරි ක්‍රියාමාර්ග කඩිනමින් ගැනීමට බලාපොත්තු වන බව පැවසුහ. ඒ අනුව පරිභෝගිකයාට වඩාත් පහසුවෙන් පිසීමට හැකිවන පරිදි අදාළ මාළු වර්ග ඇසුරුම් කර ලබාදීමට ද සැලසුම් කරන බව එම නිලධාරීහු වැඩි දුරටත් අදහස් දක්වමින් පැවසුහ.මෙම රැස්වීමේදී දිවයිනපුරා ධීවර කර්මාන්තය ආශ්‍රිතව පවතින විවිධ ගැටලු පිළිබඳව ගරු මන්ත්‍රීවරයන් විසින් අදාළ නිලධාරීන්ගේ අවධානයට යොමු කළහ. තහනම් දැල් හා ඩයිනමයිට් භාවිතයෙන් මසුන් ඇල්ලීම , මිරිදිය මත්ස්‍ය කර්මාන්තය ආශ්‍රිත පවතින ගැටලු, මෙරට වරායන් සම්බන්ධව පවතින ගැටලු පිළිබඳවද දීර්ඝ ලෙස කාරක සභාව තුළ සාකච්ඡා විය. මෙහිදී අදහස් දක්වමින් කාරක සභා සභාපතිවරයා එම ගැටලු සම්බන්ධයෙන් අවශ්‍ය ක්‍රියාමාර්ග ගැනීමට අදාළ නිලධාරීන්ට උපදෙස් ලබාදුන්නේය. එමෙන්ම උතුරු හා නැගෙනහිර පළාතේ පවතින වරායවල් ප්‍රතිසංස්කරණය සම්බන්ධයෙන් අමාත්‍යාංශයෙන් වැඩි අවධානයක් යොමුකරමින් අවශ්‍ය ගැටලු විසඳීමට කටයුතු කරන බවත් මෙහිදී වැඩි දුරටත් අදහස් දක්වමින් කාරක සභා සභාපතිවරයා පැවසුවේය.මේ අතර 2021 වර්ෂය සඳහා ධීවර වරාය නීතිගත සංස්ථාවේ වාර්ෂික වාර්තාව සහ 2023 වර්ෂය සඳහා ධීවර හා ජලජ සම්පත් දෙපාර්තමේන්තුවේ වාර්ෂික කාර්ය සාධන වාර්තාව ද කාරක සභාව තුළ සලකා බලා අනුමත කරන ලදී.මෙම කාරක සභා රැස්වීම සඳහා ගරු අමාත්‍යවරුන්, ගරු නියෝජ්ය අමාත්‍යවරුන්, කාරක සභා සාමාජික ගරු මන්ත්‍රීවරයන් ඇතුළු අනෙකුත් මන්ත්‍රීවරයන්, ධීවර, ජලජ සහ සාගර සම්පත් කටයුතු පිළිබඳ අමාත්‍යංශයේ නිලධාරීන් ඇතුළු පිරිසක් සහභාගී වූහ.
2025-02-13
පාර්ලිමේන්තු මන්ත්‍රීවරියන්ගේ සංසදයේ ඉදිරි ක්‍රියාකාරී සැලැස්ම පිළිබඳ සාකච්ඡා කිරීමේ රැස්වීමක් ආචාර්ය හරිනි අමරසූරිය ගරු අග්රාමාත්යවරියගේ සහ සංසදයේ සභාපතිනිය වන කාන්තා සහ ළමා කටයුතු ගරු අමාත්‍ය සරෝජා සාවිත්‍රි පෝල්රාජ් මහත්මියගේ ප්‍රධානත්වයෙන් 2025.02.07 දින පාර්ලිමේන්තුවේදී පැවැත්විණි.මෙහිදී පළාත් මට්ටමින් 25% ක කාන්තා නියෝජනයක් ලැබෙන ආකාරයෙන් කාන්තා නියෝජනය වැඩි කිරීමේ හැකියාව පිළිබඳව සංසදය විසින් සාකච්ඡා කරන ලදි. ඒ අනුව, ඉදිරි මැතිවරණයේදී එම යෝජනාව ක්‍රියාත්මක කිරීමට පවතින නීති සඳහා අවශ්‍ය සංශෝධන ගෙන ඒමේ අවශ්‍යතාවය පිළිබඳවද සංසදයේ අවධානය යොමු විය.එසේම පළාත් සභා සහ පළාත් පාලන ආයතනවලට කාන්තාවන් පත් කිරීම සම්බන්ධයෙන් සහ කාන්තා නියෝජනය වැඩි කිරීම සම්බන්ධයෙන් ඉල්ලා සිටීමට දේශපාලන පක්ෂ සහ පක්ෂ ලේකම්වරුන් හමුවීමට ද පාර්ලිමේන්තු මන්ත්‍රීවරියන්ගේ සංසදය තීරණය කළේය.තවද රැකියා ස්ථානයේ ලිංගික හිංසන තුරන් කිරීම සහ ලිංගික හා ස්ත්‍රී පුරුෂ භාවය මත පදනම් වූ ප්‍රචණ්ඩත්වය (SGBV) තුරන් කිරීම වැනි කරුණු පිළිබඳවද මෙහිදී සාකච්ඡා විය.මීට අමතරව මාර්තු 8 වන දිනට යෙදෙන ජාත්‍යන්තර කාන්තා දිනය සැමරීමේ සැලසුම් පිළිබඳව ද සංසදයේ අවධානය යොමු විය.මේ අවස්ථාව සඳහා සංසදයේ නියෝජ්ය සම සභාපතිනියන් වන ගරු පාර්ලිමේන්තු මන්ත්‍රීනි නීතිඥ චමීන්ද්‍රානි කිරිඇල්ල සහ ගරු පාර්ලිමේන්තු මන්ත්‍රීනි සමන්මලිී ගුණසිංහ, ගරු පාර්ලිමේන්තු මන්ත්‍රීවරියන් වන නීතිඥ සාගරිකා අතාවුද, (ආචාර්ය) කෞශල්‍යා ආරියරත්න, ඔෂානි උමංගා, ක්‍රිෂ්ණන් කලෙයිචෙල්වී, නීතිඥ නිලන්ති කොට්ටහච්චි, එම්.ඒ.සී. එස්. චතුරි ගංගානි, නිලුෂා ලක්මාලි ගමගේ, නීතිඥ තුෂාරි ජයසිංහ, ඒ. එම්. එම්. එම්. රත්වත්තේ, දීප්ති වාසලගේ, නීතිඥ හිරුණි විජේසිංහ, අම්බිකා සාමිවේල් සහ නීතිඥ ලක්මාලි හේමවන්ද්‍ර යන මහත්මීහු ඇතුළු පිරිසක් එක්ව සිටියහ.
2025-02-07
අනු කමිටුවේ ප්‍රධානත්වය ගරු නියෝජ්ය අමාත්‍ය පී. රුවන් සෙනරත් මහතාට රාජ්‍ය සේවය සම්බන්ධයෙන් අවශ්‍ය වන ප්‍රතිපත්තිමය වෙනස්කම් හඳුනාගැනීම සඳහා රාජ්‍ය පරිපාලන, පළාත් සභා සහ පළාත් පාලන කටයුතු පිළිබඳ අමාත්‍යාංශයීය උපදේශක කාරක සභාව යටතේ සාමාජිකයින් 08 දෙනෙකුගෙන් සමන්විත විශේෂ අනු කාරක සභාවක් පත් කිරීමට කාරක සභාවේ සභාපති ගරු අමාත්‍ය (මහාචාර්ය) ඒ.එච්.එම්.එච්. අබයරත්න මහතා නිර්දේශ කළේය.රාජ්‍ය පරිපාලන, පළාත් සභා සහ පළාත් පාලන කටයුතු පිළිබඳ අමාත්‍යාංශයීය උපදේශක කාරක සභාව ගරු අමාත්‍ය (මහාචාර්ය) ඒ.එච්.එම්.එච්. අබයරත්න මහතාගේ සභාපතිත්වයෙන් පසුගියදා (පෙබ. 05) පාර්ලිමේන්තුවේදී රැස්වූ අවස්ථාවේදී මෙම අනු කාරක සභාව පත්කිරීම සිදු විය.ගරු නියෝජ්ය අමාත්‍ය පී. රුවන් සෙනරත් මහතාගේ ප්‍රධානත්වයෙන් යුතුව මෙම අනු කාරක සභාව පත්කිරීම සිදු වූ අතර ගරු පාර්ලිමේන්තු මන්ත්‍රීවරුන් වන චන්දන සූරියආරච්චි, අජන්ත ගම්මැද්දෙගේ, ධර්මප්‍රිය දිසානායක, දිනිඳු සමන්, (නීතීඥ) ගීතා හේරත්, ලාල් ප්‍රේමනාත් සහ මුහම්මද් ෆයිසාල් යන මහත්ම මහත්මීන් මෙම අනු කාරක සභාවේ අනෙකුත් සාමාජිකයින් ලෙස පත්කරන ලදී.මෙම අනු කාරක සභාව මගින් රාජ්‍ය සේවයේ පත්කිරීම්, තරඟ විභාග පැවැත්වීම, විශ්‍රාම යෑම සහ පුරප්පාඩු ඇතුළු රාජ්‍ය සේවයේ අවශ්‍ය අංශ සම්බන්ධයෙන් සිදුකළ යුතු ප්‍රතිපත්තිමය වෙනස්කම් සම්බන්ධයෙන් අවශ්‍ය විමර්ශනයන් සිදුකොට, හඳුනාගන්නා යෝජනා අමාත්‍යාංශයීය උපදේශක කාරක සභාවට ලබාදීමට නියමිතය.මෙවැනි අනු කාරක සභාවක් පත්කිරීමේ අවශ්‍යතාව ගරු පාර්ලිමේන්තු මන්ත්‍රී චන්දන සූරියආරච්චි මහතා විසින් යෝජනා කළ අතර ඒ අනුව ගරු සභාපතිතුමා විසින් මෙම පත්කිරීම සිදු කරන ලදි.එසේම ප්‍රාදේශීය ලේකම් කාර්යාලවල සහ පළාත් පාලන ආයතනවල පවතින පුරප්පාඩු සම්බන්ධයෙන් ද මෙහිදී සාකච්ඡා විය. මෙහිදී පැමිණි නිලධාරීන් පෙන්වා දුන්නේ 2024 වර්ෂයේ පළාත් පාලන ආයතනවල 8,435 දෙනෙකුගේ සේවය ස්ථිර කළ බවයි. එසේම මේ වන විට සියලුම පළාත් පාලන ආයතනවල කාර්ය මණ්ඩල සමාලෝචනයක් කරන බවත් ඒ අනුව ඊට අදාළ අවසන් වාර්තාව 2025 මාර්තු 31 දින ලැබීමට නියමිත බවයි. ඉන්පසු පත්කිරීම් සඳහා අවශ්‍ය වන දත්ත කළමනාකරණ සේවා දෙපාර්තමේන්තුවට ලබාදීමට කටයුතු කරන බව එම නිලධාරීහු පැවසූහ. එසේම යම් යම් ව්‍යාපෘති සඳහා බඳවාගත් සේවකයින්ගේ සේවය ස්ථිර කිරීම සිදුනොකරන බවත් මෙහිදී නිලධාරීහු පෙන්වා දුන්හ.තවද ග්‍රාම නිලධාරීන් පත් කිරීම සම්බන්ධයෙන් වන තරඟ විභාගය පිළිබඳව ද මෙහිදී සාකච්ඡා විය.මෙම කාරක සභාව සඳහා කාරක සභාවේ සාමාජික මන්ත්‍රීවරු ඇතුළු පාර්ලිමේන්තු මන්ත්‍රීවරු සහ රාජ්‍ය නිලධාරීහු සහභාගී වූහ.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
