2023-01-20
පුවත් කාණ්ඩ : කාරක සභා පුවත්
• ලබන බදාදා අමාත්‍යාංශ ලේකම්වරයාට නැවත කැදවීමක්
• පාරිභෝගික අයිතිය ආරක්ෂා කිරීමට අවශ්‍ය නිර්දේශ කරන ලෙස යෝජනාවක්
• භාණ්ඩ මිල පාලනය කිරීමට සම්ප්‍රදායික ක්‍රමෝපයාන්ගෙන් ඔබ්බට ගිය වැඩ පිළිවෙලක්
• බිත්තර මිල තීරණය කිරීම සම්බන්ධයෙන් පවතින ගැටලු නිරාකරණයට යෝජනා
පාරිභෝගික කටයුතු පිළිබඳ අධිකාරියේ වත්මන් කාර්ය සාධනය පිළිබඳ විමර්ශනය සදහා ගරු මහාචාර්ය රංජිත් බණ්ඩාර මහතාගේ සභාපතීත්වයෙන් පොදු ව්‍යාපාර පිළිබඳ කාරක සභාව (කෝප් කමිටුව) 2023.01.19 වන දින රැස්විය. එහිදි පහත සදහන් කරුණු කෙරෙහි අවධානය යොමුවිය.
1 – පාරිභෝගික අයිතිය ආරක්ෂා කිරීමට අවශ්‍ය නිර්දේශ ඉදිරිපත් කරන ලෙසට යෝජනාවක්
පාරිභෝගික කටයුතු පිළිබඳ අධිකාරියේ වගකීම පිළිබඳව මෙහිදී කමිටුව ප්‍රශ්න කරන ලදී. පාරිභෝගියන් බලගැන්වීම, වෙළදාම විධිමත් කිරීම සහ යහපත් ප්‍රවර්ධන තුළින් පාර්භෝගික අයිතිවාසිකම් සුරැකීම කමිටුවේ ප්‍රධාන වගකීම් වුවද එම දැක්මට අනුව අධිකාරිය කටයුතු නොකරන බව කමිටුවේ අදහස විය. ඒ අනුව වෙළද, වානිජ හා ආහාර සුරක්ෂිතා අමාත්‍යාංශයේ ලේකම්වරයාට කමිටුව නිර්දේශ කළේ පාරිභෝගික අයිතිවාසිකම් ආරක්ෂා වන ආකාරයට පාරිභෝගික කටයුතු පිළිබද අධිකාරියට කටයුතු හැක්කේ කෙසේදැයි සති දෙකක් තුළ කෝප් කමිටුවට වාර්තා කරන ලෙසයි.
2 – භාණ්ඩ මිල පාලනය කිරීමට සම්ප්‍රදායික ක්‍රමෝපායන්ගෙන් ඔබ්බට ගිය වැඩ පිළිවෙලක්
භාණ්ඩ මිල පාලනය කිරීමට සම්ප්‍රදායික මිල පාලනයෙන් ඔබ්බට ගිය වැඩ පිළිවෙලක් සකස් කරන ලෙසද අධිකාරියට දන්වන ලදී. විශේෂයෙන් වත්මන් බිත්තර මිල පාලනය පිළිබද කමිටුවේ අවධානය යොමුවිය. මේ අනුව වෙළද සහ කෘෂිකර්ම යන අමාත්‍යාංශවල ලේකම්වරු දෙදෙනා අදාළ නිලධාරීන් සම්බන්ධීකරණය කරගනිමින් දින පහක් ඇතුළත බිත්තරයක මිල තීරණය කිරීම සදහා මිල සූත්‍රයක් සැකසීම සහ ඒ අනුව බිත්තරයක් සදහා අදාළ පිරිවැය ගණනය කරන ලෙසත් උපදෙස් ලබා දීම සිදුවිය. ඒ පිළිබදව විමසීමට අමාත්‍යාංශ ලේකම්වරුන් ලබන බදාදා නැවත කැඳවීම ද තීරණය කෙරිණි.
3 - බිත්තර මිල තීරණය කිරීම සම්බන්ධයෙන් පවතින ගැටලු නිරාකරණයට යෝජනා
ජනතාවට සහනදායි මිලට බිත්තර ලබා දීමේ අරමුණින් බිත්තර ආනයනය කිරීමට රජය ගෙන ඇති තීරණයට පවතින බාධා නිරාකරණය කරගැනීම සදහා එහිදී විසදුම් ඉදිරිපත් කරන ලෙස ද මෙහිදී කාරක සභාව විසින් අමාත්‍යාංශ ලේකම්වරුන්ට දන්වන ලදී.
බිත්තර ආනයනය වැළැක්වීම මගින් මහා පරිමාණ බිත්තර ව්‍යාපාරිකයන් අතලොස්සක් වෙනුවෙන් මෙරට සමස්ත මහජනතාවට අසාධාරණයක් සිදුවීමට ඉඩදිය නොහැකි බවත්මේ අනුව සියලු ආයතන සම්බන්ධීකරණයෙන් බිත්තර සදහා අවම මිලක් තීරණය කිරීම හෝ බිත්තර ආනයනය සදහා පියවර ගත යුතු බවත් මෙහිදී අවධාරණය කෙරිණි.
බිත්තර සදහා පාලන මිලක් පවත්වාගනිමින් පාරිභෝගිකයා ආරක්ෂා කර ගැනීම සදහා මෙන්ම බිත්තර ආනයනය ඇතුළු කටයුතුවලදී පාරිභෝගික කටයුතු පිළිබඳ අධිකාරිය සහ අදාළ අනෙකුත් ආයතන මනා සම්බන්ධීකරණයෙන් ක්‍රියාත්මක වීමේ අවශ්‍යතාව මෙහිදී අවධාරණය කෙරිණි.
4 – පාරිභෝගික අධිකාරියට කඩිනමින් ස්ථීර අධ්‍යක්ෂක ජෙනරාල්වරයෙක්
පාරිභෝගික සේවා අධිකාරියට ස්ථිර අධ්‍යක්ෂ ජනරාල්වරයෙකු පත් කිරීම සදහා කඩිනමින් කටයුතු කරන ලෙස ද උපදෙස් ලබා දීම සිදුවිය. දැනට වසර ගණනාවක් සිට පත්කර ඇත්තේ වැඩබලන අධ්‍යක්ෂ ජනරාල්වරයෙකු බවද මෙහිදී අනාවරණය විය. හිටපු වැඩබලන අධ්‍යක්ෂ ජනරාල්වරයා පසුගිය දෙසැම්බර් මස විශ්‍රාම යාමෙන් පසු මෙම තනතුර පුරප්පාඩුව පවතින බවත් කමිටුවේදී හෙළිවිය. අධ්‍යක්ෂ ජනරාල්වරයකු නොමැතිවීම තුළ පනතේ ඇතැම් බලතල ක්‍රියාත්මක කිරීමට නොහැකි වන බවද විගණකාධිපතිතුමා මෙහිදී පෙන්වා දුන්නේය. කෝප් සභාපතිවරයා මේ අනුව උපදෙස් දුන්නේ කළමනාකරණ සේවා දෙපාර්තමේන්තුව සමග සාකච්ඡා කොට ආයතනයේ ප්‍රධානතම තනතුරක් වන අධ්‍යක්ෂ ජනරාල් ධුරයට බදවා ගැනීම සදහා කඩිනමින් අවශ්‍ය පියවර ගන්නා ලෙසයි.
එසේම සති දෙකක් තුළ වැඩබලන අධ්‍යක්ෂ ජනරාල්වරයෙකු පත් කරන ලෙසද අමාත්‍යාංශ ලේකම්වරයාට උපදෙස් දුන්නේය.
5 – අධිකාරියේ පනත යාවත්කාලීන කිරීම පිළිබඳ පිළිබද ගෙන ඇති ක්‍රියාමාර්ග සතියක් තුළ දන්වන්න
2003 අංක 09 දරන පාරිභෝගික අධිකාරි පනත යාවත්කාලීන කිරීම පමාවී ඇති බැවින් ඒ සදහා සැලසුම් කරන ක්‍රමවේදය සතියක් ඇතුළත කෝප් කමිටුවට වාර්තා කරන ලෙසත් සහ ඒ සදහා අමාත්‍යාංශ මට්ටමින් කමිටුවක් පත්කොට කඩිනමින් අවශ්‍ය පියවර ගන්නා ලෙසත් උපදෙස් ලබා දුන්නේය. මෙහිදී අමාත්‍යාංශ ලේකම්වරයා විසින් පනත සංශෝධනය කිරීමේ ප්‍රගතිය පිළිබදව කමිටුවට දන්වා සිටියේය. මෙම පනත සංශෝධන කිරීම වසර 17 ක් පමණ පමා වී ඇති බැවින් එම කටයුතු කඩිනම් කිරීමේ අවශ්‍යතාව කමිටුව විසින් අවධාරණය කරන ලදී.
6 – උපාධිධාරීන් වඩාත් ඵලදායි ලෙස යොදවා ගැනීම සම්බන්ධයෙන් වැඩපිළිවෙලක්
අධිකාරියේ දැනට විවිධ වගකීම් දරණ උපාධිධාරීන් 400 කට ආසන්න ප්‍රමාණයක කාර්ය සාධනය සහ ඵලදායිතා මට්ටම් ඉහළ නැංවීම සදහා වන වැඩපිළිවෙලක් අදාළ පරිසාධන මට්ටම් දර්ශක සහිතව (KPIs) මාසයක් තුළ කෝප් කමිටුවට යෝජනා කරන ලෙසත් කෝප් සභාපතිවරයා අමාත්‍යාංශ ලේකම්වරයාට උපදෙස් දුන්නේය. එසේම පාරිභෝගික පැමිණිලි සදහා කඩිනමින් ප්‍රතිචාර දැක්වීම හා ක්‍රියාත්මක නොවීම සම්බන්ධයෙන් ද අවධානය යොමුවිය. ඒ අනුව මෙම උපාධිධාරිහු පිරිස වඩාත් ඵලදායි ලෙස යොදවා ගැනීම සම්බන්ධයෙන් කඩිනමින් ක්‍රියාත්මක වීමේ අවශ්‍යතාව කමිටුවේදී අවධාරණය කෙරිණි.
7 – මාස තුනක් තුළ අපේක්ෂිත සංශෝධිත පනතට අනුකූලව සංයුක්ත සැලැස්මක්
අධිකාරිය සදහා මේවන තෙක් සංයුක්ත සැලැස්මක් නොමැති බැවින් ශක්‍යතාවයෙන් යුතු සංයුක්ත සැලැස්මක්, සංශෝධිත පනතට අනුකූලව මාස තුනක් තුළ සකස් කොට කමිටුවට වාර්තා කරන ලෙසත් කෝප් සභාපතිවරයා මෙහිදී දන්වා සිටියේය. ආයතනයේ පවතින ගැටලු , පාරිභෝගික ප්‍රශ්න, වැටලීම් යනාදිය මෙන්ම ආයතනයේ දැක්ම, අරමුණු සහ මෙහෙවර ක්‍රියාත්මක කිරීම ඉලක්ක කරගනිමින් මෙම සංයුක්ත සැලැස්ම ක්‍රියාත්මක විය යුතු බවද පෙන්වා දෙන ලදී.
8 – පර්යේෂණ ඒකකයක් සහ දත්ත බැංකුවක අවශ්‍යතාව
පාරිභෝගික සේවා අධිකාරිය තුළ නිශ්චිත පර්යේෂණ ඒකකයක් ආරම්භ කරන ලෙසද මෙහිදී දැනුම් දුන්නේය. අධිකාරිය විසින් සිය වගකීම් ඉටුකිරීමේදී නිරතුරුව නිෂ්පාදනය, වෙළදපොළ සහ පාරිභෝගික දත්ත පදනම් වන බැවින් වඩාත් නිවැරදී තීන්දු තීරණ ගැනීම සදහා පර්යේෂණ ඒකකයක අවශ්‍යතාව පෙන්වා දීම සිදුවිය. එසේම ආනයනය, නිෂ්පාදනය සහ ව්‍යාපාරවලට අදාළව දත්ත බැංකුවක් පවත්වාගෙන යාමේ අවශ්‍යතාවද මෙහිදී සාකච්ඡා විය.
9 – පාරිභෝගික අයිතීන් සුරැකීම සදහා අධිකාරිය සහ ඒ හා සම්බන්ධ විවිධ ආයතන සම්බන්ධීකරණය සදහා කඩිනමින් වැඩපිළිවෙලක් ස්ථාපිත කලයුතු බවට යෝජනාවක්.
පාරිභෝගික අයිතීන් සුරැකීම සදහා අධිකාරිය සහ ඒ හා සම්බන්ධ විවිධ ආයතන සම්බන්ධීකරණය සදහා කඩිනමින් වැඩපිළිවෙලක් ස්ථාපිත කලයුතු බවට ද කෝප් කමිටුව විසින් දන්වන ලදී.
රාජ්‍ය අමාත්‍යවරුන් වන ගරු ජානක වක්කුඹුර, ගරු ලොහාන් රත්වත්තේ, ගරු ඉන්දික අනුරුද්ධ හේරත්, ගරු ඩී.වී චානක, ගරු ශාන්ත බණ්ඩාර, පාර්ලිමේන්තු මන්ත්‍රීවරුන් වන ගරු පාඨලී චම්පික රණවක, ගරු මහින්දානන්ද අලුත්ගමගේ, ගරු දයාසිරි ජයසේකර, ගරු නිමල් ලන්සා, ගරු ජගත් කුමාර සුමිත්‍රාආරච්චි, ගරු (මේජර්) සුදර්ශන දෙනිපිටිය, ගරු නීතිඥ ප්‍රේම්නාත් සී දොලවත්ත, ගරු උපුල් මහේන්ද්‍ර රාජපක්ෂ සහ ගරු නීතිඥ මධුර විතානගේ යන මහත්වරු මෙම අවස්ථාවට එක්ව සිටියහ.
එසේම වෙළද, වානිජ හා ආහාර සුරක්ෂිතා අමාත්‍යාංශයේ ලේකම් පී.එම්.බී. අතපත්තු, කෘෂිකර්ම අමාත්‍යාංශයේ ලේකම් ගුණදාස සමරසිංහ, පාරිභෝගික කටයුතු පිළිබඳ අධිකාරියේ සභාපති ශාන්ත නිරිඇල්ල යන මහත්වරු ඇතුළු නිලධාරීහු පිරිසක් මෙම මෙම කාරක සභා රැස්වීමට සහභාගී වූහ.
2025-11-08
ආබාධ සහිත පුද්ගලයන්ට ඔබ ලබාදෙන සේවාවෙන් ඔවුන් තෘප්තිමත් නම් සේවාව සපයන ඔබටත් තෘප්තිමත් විය හැකියි - ගරු පාර්ලිමේන්තු මන්ත්‍රී සුගත් වසන්ත ද සිල්වා මහතා ආබාධ සහිත පුද්ගලයන් සඳහා සේවා සැපයීම වැඩිදියුණු කිරීම පිළිබඳ දිස්ත්‍රික් මට්ටමේ උපදෙස් ලබාගැනීම සඳහා වූ විශේෂ වැඩසටහනක් ආබාධ සහිත වූවන් සඳහා වන පාර්ලිමේන්තු සංසදයේ මූලිකත්වයෙන් පසුගියදා (නොවැ. 04) කිලිනොච්චි දිස්ත්‍රික් ලේකම් කාර්යාලයේ හැකියා වර්ධන මධ්‍යස්ථානයේදී පැවැත්විණි. දසවැනි පාර්ලිමේන්තුවේ ආබාධ සහිත වූවන් සඳහා වන පාර්ලිමේන්තු සංසදයේ, “ආබාධිතභාවයට සංවේදී පාර්ලිමේන්තුවක්” යන අභිලාෂයට අනුව දිවයින පුරා ආබාධ සහිත පුද්ගලයින්ගෙන් සෘජු අදහස් ලබා ගැනීමේ වැඩසටහන් මාලාවක් සංවිධානය කළ අතර එහි පළමු අදියර මෙලෙස කිලිනොච්චි සහ මුලතිව් දිස්ත්‍රික්ක කේන්ද්‍ර කරගනිමින් පැවැත්විණි.ආබාධ සහිත වූවන් සඳහා වන පාර්ලිමේන්තු සංසදයේ සභාපති ගරු පාර්ලිමේන්තු මන්ත්‍රී සුගත් වසන්ත ද සිල්වා මහතාගේ ප්‍රධානත්වයෙන් පැවති මෙම විශේෂ වැඩසටහන සඳහා එම සංසදයේ නියෝජ්ය සම-සභාපති ගරු පාර්ලිමේන්තු මන්ත්‍රී (වෛද්‍ය) පත්මනාදන් සත්‍යලිංගම් මහතා ද සහභාගී විය. මේ අතර, කිලිනොච්චි දිස්ත්‍රික් ලේකම් එස්. මුරලිදරන්, මුලතිව් අතිරේක දිස්ත්‍රික් ලේකම් සතීසන් මන්ජුලාදේවි යන මහත්ම මහත්මීන්, පළාත්පාලන ආයතනවල මහජන නියෝජිතයන්, ප්‍රාදේශීය ලේකම් කොට්ඨාසයන්හි ප්‍රාදේශීය ලේකම්වරුන් ඇතුළු ප්‍රාදේශීය රාජ්‍ය ආයතන නියෝජනය කරන නිලධාරීන්, සෞඛ්‍ය අංශ නියෝජනය කරන නිලධාරීන්, පොලිස් නිලධාරීන්, කිලිනොච්චි සහ මුලතිව් දිස්ත්‍රික්කවල ආබාධ සහිත වූවන් නියෝජයන කරන සංවිධානවල නියෝජිත පිරිස් සහ අබාධ සහිත පුද්ගලයන් ඇතුළු 100 කට ආසන්න පිරිසක් මෙම වැඩසහටනට සහභාගී වූහ. ඕස්ට්‍රේලියානු රජයේ සහයෝගයෙන් කිලිනොච්චි සහ මුලතිව් දිස්ත්‍රික් ලේකම් කාර්යාල සමඟ ඒකාබද්ධව මැතිවරණ ක්‍රමය සඳහා වූ ජාත්‍යන්තර පදනමේ (IFES) අනුග්‍රහයෙන් මෙම වැඩසටහන පැවති අතර, එම පදනමේ වැඩසටහන් නිලධාරිනී අනෝජිතා සිවාස්කරන් මෙනවියද මෙම අවස්ථාවට එක්ව සිටියාය. මෙහිදී අදහස් දක්වමින් සංසදයේ සභාපති ගරු පාර්ලිමේන්තු මන්ත්‍රී සුගත් වසන්ත ද සිල්වා මහතා පැවසුවේ සේවාවන් ලබාගැනීම සඳහා තමන් ඉදිරියට පැමිණෙන අබාධ සහිත පුද්ගලයන්ට මානුෂීයව සලකා ඔවුන්ට අවශ්‍ය සේවාවන් ලබාදෙන ලෙස සියලුම රාජ්‍ය නිලධාරීන්ගෙන් ඉල්ලා සිටියේය. අබාධ සහිත පුද්ගලයන්ගේ අවශ්‍යතා හඳුනාගැනීමට ඔවුන්ගේ ස්ථානයේ සිට බැලීමෙන් ඔවුන්ට සැබැවින්ම අවශ්‍ය වන්නේ කුමක්දැයි නිවැරදිව හඳුනාගත හැකි බවත්, එලෙස සේවාවන් ලබාගැනීමට පැමිණෙන අබාධ සහිත පුද්ගලයන්ගේ සිනහවෙන් ඔබගේ රැකියාවේ තෘප්තිය දැකගත හැකි බවත් හෙතෙම සඳහන් කළේය. මේ අතර, දැනට පවතින අබාධ සහිත තැනැත්තන්ගේ අයිතිවාසිකම් ආරක්ෂා කිරීමේ පනත සංශෝධනය කිරීම සඳහා පියවර ගෙන ඇති බවත්, එයට පසුගිය දශක දෙකක පමණ වෙනස්කම් සැලකිල්ලට ගෙන ඇති බවත් සංසදයේ සභාපතිවරයා පැවසීය. තවද, මෙම පනත් කෙටුම්පත සඳහා ආබාධ සහිත පුද්ගලයින්ගේ අයිතිවාසිකම් පිළිබඳ එක්සත් ජාතීන්ගේ සම්මුතියේ (UNCRPD) පවතින 25 කට අධික අයිතිවාසිකම් ඇතුළත් කිරීමට කටයුතු කරන බවත්, එයට සමගාමීව ආබාධ සහිත පුද්ගලයින් පිළිබඳ ජාතික ප්‍රතිපත්තිය සහ ජාතික ක්‍රියාකාරී සැලැස්ම ද කෙටුම්පත් කිරීමට පියවර ගෙන ඇති බවත් හතෙම පෙන්වා දුන්නේය. මෙහිදී අදහස් දැක්වූ සංසදයේ නියෝජ්ය සම සභාපති ගරු පාර්ලිමේන්තු මන්ත්‍රී (වෛද්‍ය) පත්මනාදන් සත්‍යලිංගම් මහතා, ආබාධ සහිත පුද්ගලයන්ගේ අවශ්‍යතා වැඩි වශයෙන් පවතින උතුරු පළාතේ මෙවැනි වැඩසටහනක් පැවැත්වීම ඉතා වැදගත් බවත් දසවැනි පාර්ලිමේන්තුවේ ආබාධ සහිත වූවන් සඳහා වන පාර්ලිමේන්තු සංසදය දේශපාලන භේදයකින් තොරව ආබාධ සහිත ප්‍රජාවන්ට අදාළ නීතිමය සහ ප්‍රතිපත්තිමය ප්‍රතිසංස්කරණයන් වෙනුවෙන් පෙනී සිටින බවත් සඳහන් කළේය. ආබාධ සහිත පුද්ගලයන් පිළිබඳ ජාත්‍යන්තර දිනයට අදාළ ජාතික වැඩසටහන මෙවර යාපනය දිස්ත්‍රික්කයේ පැවැත්වීමටද අවශ්‍ය කටයුතු සලසා ඇති බවද ඒ මහතා පෙන්වා දුන්නේය. එසේම මාර්ග අනතුරු අවම කිරීමට සහ මාර්ග නීති පිළිපැදීමේදී, මාර්ග නීතිය ක්‍රියාත්මක කිරීමේදී පොලිසියේ සහයෝගය තවදුරටත් අවශ්‍යවීමේ වැදගත්කමද හෙතෙම පෙන්වා දුන්නේය. මේ අතර කිලිනොච්චි දිස්ත්‍රික් ලේකම් එස්. මුරලිදරන් සහ මුලතිව් අතිරේක දිස්ත්‍රික් ලේකම් සතීසන් මන්ජුලාදේවි යන මහත්ම මහත්මීන් ද අදහස් දැක්වූ අතර, ආබාධ සහිත තැනැත්තන් සඳහා රජයෙන් ලබාදෙන ප්‍රතිලාභ ඔවුන්ගේ අවශ්‍යතාවයන් සම්පූර්ණයෙන් ඉටු කිරීමට ප්‍රමාණවත් නොවන බවත්, ඉදිරියේදී එම ප්‍රතිලාභයන් වැඩි කිරීම සඳහා ප්‍රතිපත්තිමය තීරණය ගැනීමේ අවශ්‍යතාවයත් ඔවුහු පෙන්වා දුන්හ.ඒ අනුව කිලිනොච්චි සහ මුලතිව් දිස්ත්‍රික්කවල අබාධ සහිත පුද්ගලයන් මුහුණ දෙන අභියෝග සහ ගැටලු නිරාකරණය කර ගැනීමට අදාළ ප්‍රාදේශීය මට්ටමේ රාජ්‍ය ආයතනවලින් සැපයිය හැකි සේවාවන් සහ ඒවා වැඩිදියුණු කිරීමට අදාළ යෝජනා පිළිබඳ මෙහිදී දීර්ඝ ලෙස සාකච්ඡා කිරීම සිදුවිය. එසේම, සමාජ සේවා නිලධාරීන් නොමැතිකම, ආබාධ සහිත පුද්ගලයින් සඳහා ජාතික වශයෙන් පිළිගත් හැඳුනුම්පතක් තිබීමේ අවශ්‍යතාවය, රැකියා අවස්ථා සුරක්ෂිත කිරීම, ආබාධ සහිත පුද්ගලයින් සෞඛ්‍ය සහ ප්‍රවාහන සේවාවන් ලබාගැනීමේ ඇති අභියෝග, ස්වයං රැකියාවල නියැලීමට හැකි ආබාධ සහිත පුද්ගලයින් සඳහා ඉඩම් අවශ්‍යතා සපුරාලීම, සංඥා භාෂා පරිවර්තන අවශ්‍යතා, ආබාධ සහිත පුද්ගලයින් සඳහා වාහන බලපත්‍ර නිකුත් කිරීමේදී පවතින ගැටලු, ආබාධ සහිත සිසුන් සඳහා පුහුණු ගුරුවරුන්ගේ අවශ්‍යතා සහ වඩා හොඳ පහසුකම් සහිත පාසල් ඇතුළු දිස්ත්‍රික්ක තුළ පවතින ප්‍රතිපත්තිමය සහ ප්‍රායෝගික අභියෝග කෙරෙහි මෙහිදී දීර්ඝ වශයෙන් සාකච්ඡා කෙරිණි.මෙහිදී ඉදිරිපත් වූ කරුණුවලට අදාළව සංසදය විසින් නිර්දේශ සහ විසඳුම් ඉදිරිපත් කිරීමද සිදු විය. මෙම අදහස් ලබාගැනීමෙන් අනතුරුව, අවශ්‍ය ප්‍රතිපත්තිමය වෙනස්කම් සඳහා පාර්ලිමේන්තු සංසදය විසින් අදාළ අමාත්‍යාංශ සහ පාර්ලිමේන්තුව සමඟ කටයුතු කරන බව සංසදයේ ගරු සභාපතිවරයා පැවසූ අතර දිස්ත්‍රික් මට්ටමේ සේවා සැපයීමේදී ඒවා නිවැරදිව ක්‍රියාත්මක වීම සහතික කිරීම වැනි කටයුතු පිළිබඳව දිස්ත්‍රික් ලේකම් කාර්යාලය පසු විපරම් කිරීම කෙරෙහි මැදිහත් වන බව පැමිණි නිලධාරීහු පැවසූහ.
2025-11-08
පාර්ලිමේන්තු මන්ත්‍රීවරියන්ගේ සංසදය සහ එක්සත් ජාතීන්ගේ සංවර්ධන වැඩසටහන (UNDP) එක්ව සංවිධානය කරයි ශ්‍රී ලංකාව පුරා කාන්තා නායිකාවන් සම්බන්ධ කරන සබඳතා ජාලයක් ගොඩනගමින් කාන්තා නායකත්වය ප්‍රාදේශීය මට්ටමෙන් ශක්තිමත් කිරීම සඳහා විශේෂ වැඩසටහනක් පසුගියදා යාපනයේදී පැවැත්විණි. කාන්තා නායකත්වය ශක්තිමත් කිරීමේ නව පියවරක් සනිටුහන් කළ මෙම වැඩසටහන පාර්ලිමේන්තු මන්ත්‍රීවරියන්ගේ සංසදය සහ එක්සත් ජාතීන්ගේ සංවර්ධන වැඩසටහන (UNDP) ඒකාබද්ධව සංවිධානය කර තිබිණි.මෙහිදී පාර්ලිමේන්තු, පළාත් පාලන, අධ්‍යාපන සහ ව්‍යාපාරික වැනි අංශ කිහිපයක් නියෝජනය කරන ජාතික සහ ප්‍රාදේශීය නායිකාවන් එක්ව සිය අත්දැකීම් බෙදා ගැනීම සිදුවිය. ඒ අනුව එහිදී ඔවුන්ට පවතින බාධක, අභියෝග සාකච්ඡා කිරීම සහ කාන්තා නායකත්වය ශක්තිමත් කිරීම සඳහා ප්‍රායෝගික විසඳුම් හඳුනා ගැනීම සිදුවිය.මෙම වැඩසටහනට කාන්තා හා ළමා කටයුතු ගරු අමාත්‍ය සහ පාර්ලිමේන්තු මන්ත්‍රීවරියන්ගේ සංසදයේ සභාපතිනිය වන සරෝජා සාවිත්‍රි පෝල්රාජ් මහත්මිය, සංසදයේ සාමාජික මන්ත්‍රීවරියන් වන ගරු නියෝජ්ය කාරක සභා සභාපතිනි හේමාලි වීරසේකර, ගරු පාර්ලිමේන්තු මන්ත්‍රීනී හසාරා ලියනගේ, තුෂාරි ජයසිංහ, අනුෂ්කා තිලකරත්න සහ එම්.ඒ.සී.එස්. චතුරි ගංගානි යන මහත්මීහු සහභාගී වූහ. එසේම එක්සත් ජාතීන්ගේ සංවර්ධන වැඩසටහනේ (UNDP) ශ්‍රී ලංකා නේවාසික නියෝජිත අසූසා කුබෝටා මහත්මිය, එක්සත් ජාතීන්ගේ සංවර්ධන වැඩසටහනේ පාර්ලිමේන්තු සහ මාධ්‍ය විශේෂඥ චතුරංග හපුආරච්චි මහතා, උතුරු පළාතේ ජ්‍යේෂ්ඨ රජයේ නිලධාරීන් පිරිසක් මෙන්ම යාපනය විශ්ව විද්‍යාලයේ නියෝජිත පිරිසක් ද මෙම අවස්ථාවට එක්ව සිටියහ.මෙම වැඩසටහනේ ප්‍රතිඵලයක් ලෙස තිරසාර උපදේශක ජාලයක් නිර්මාණය කිරීම සහ උතුරේ කාන්තා නායිකාවන්ගේ අදහස් සහ නිර්දේශ අන්තර්ගත කරමින් වාර්තාවක් සකස් කිරීමට තීරණය විය. නායකත්වයේදී කාන්තාවන් මුහුණ දෙන අභියෝග ජය ගැනීමටත් ශ්‍රී ලංකාව තුළ අන්තර්කරණය ශක්තිමත් කරමින් ප්‍රතිපත්තිමය තීරණ ඉදිරියට ගෙන යාම සඳහා කාන්තා පාර්ලිමේන්තු මන්ත්‍රීවරියන්ගේ සංසදයට මෙම වාර්තාව සහාය වනු ඇත.
2025-11-08
රුහුණු විශ්වවිද්‍යාලයේ සම සෞඛ්‍ය පීඨයේ 17 වන කාණ්ඩායමේ සිසුන්ගේ අධ්‍යයන කටයුතු, තාවකාලික පදනමින් හෝ අවශ්‍ය මානව සම්පත ලබාගෙන ආරම්භ කිරීමට අවශ්‍ය කටයුතු සිදු කරන ලෙස අධ්‍යාපනය, ශ්‍රම බලකාය සහ මානව ප්‍රාග්ධනය පිළිබඳ ආංශික අධීක්ෂණ කාරක සභාව විසින් රුහුණු විශ්වවිද්‍යාලයේ වැඩබලන උපකුලපතිවරයා ඇතුළු අධ්‍යාපන අමාත්‍යාංශ නිලධාරීන්ට උපදෙස් ලබාදෙන ලදී.2023 අ.පො.ස. (උසස් පෙළ) විභාගයට පෙනී සිට විශ්වවිද්‍යාල වරම් ලැබූ ශිෂ්‍යයන්, රුහුණ සම සෞඛ්‍ය පීඨයට තේරී පත්වී වසරකට අධික කාලයක් ගත වී තිබෙන නමුත් සම සෞඛ්‍ය පීඨයේ පවතින මානව සම්පත් හිඟය හේතුවෙන් මේ දක්වා එකී ශිෂ්‍ය කණ්ඩායම වෙනුවෙන් අධ්‍යයන කටයුතු ආරම්භ කිරීමට අපොහොසත් වී ඇති බවද විශ්වවිද්‍යාල බලධාරීහු පැවැසුහ.මේ පිළිබඳ කරුණු සාකච්ඡා වූයේ අධ්‍යාපනය, ශ්‍රම බලකාය සහ මානව ප්‍රාග්ධනය පිළිබඳ ආංශික අධීක්ෂණ කාරක සභාව එහි සභාපති ගරු පාර්ලිමේන්තු මන්ත්‍රී හේෂා විතානගේ මහතාගේ සභාපතිත්වයෙන් 30.10.2025 වන දින පාර්ලිමේතුන්වේදී රැස්වූ අවස්ථාවේදීය. මෙම රැස්වීම සඳහා ගරු විපක්ෂනායක සජිත් ප්‍රේමදාස මහතාද එක්ව සිටියේය. මෙහිදී අදහස් දක්වමින් විශ්වවිද්‍යාල බලධාරීහු රුහුණ සම සෞඛ්‍ය පීඨයේ පවතින මානව සම්පත් හිඟය පිළිබඳව කාරක සභාවට කරුණු ඉදිරිපත් කළහ.කෙසේ වෙතත් තමන්ට අවශ්‍ය මානව සම්පත ලබාදීමට මේ වනවිට අවශ්‍ය කටයුතු සිදුවෙමින් පවතින බවත් එම නිලධාරීහු පැවසුහ.මෙහිදී අදහස් දක්වමින් ගරු විපක්ෂනායක සජිත් ප්‍රේමදාස මහතා උද්ගතවී ඇති ගැටලුව හේතුවෙන් සිසුන් 250 ක පිරිසක් දැඩි පීඩාවකට පත්ව ඇති බවත් එම ගැටලුව නිරාකරණය කිරීමට තාවකාලික පදනමින් හෝ අවශ්‍ය මානව සම්පත ලබාගෙන අධ්‍යන කටයුතු ආරම්භ කිරීමේ වැදගත්කම අවධාරණය කළේය.ඒ අනුව අධ්‍යාපන අමාත්‍යාංශය සමග සාකච්ඡා කර අදාළ පියවරයන් කඩිනමින් ක්‍රියාත්මක කර සම සෞඛ්‍ය පීඨයේ 17 වන කාණ්ඩයේ සිසුන්ගේ අධ්‍යයන කටයුතු ආරම්භ කිරීමට අපේක්ෂා කරන බව විශ්වවිද්‍යාලයේ නිලධාරීහු පැවසුහ.මේ අතර 2025 වර්ෂය සඳහා අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය, යෞවන කටයුතු සහ ක්‍රීඩා යන අමාත්‍යාංශ වල අයවැය යෝජනාවල මූල්‍ය හා භෞතික ප්‍රගතිය සහ 2025.12.31 දක්වා අපේක්ෂිත ප්‍රගතිය ද මෙදින කාරක සභාවේදී සලකා බලන ලදී. එහිදී අදාළ අමාත්‍යාංශවල මූල්‍ය හා භෞතික ප්‍රගතිය පොදුවේ බලපාන ගැටලු කාරී තත්ත්වයන් කිහිපයක් හේතුවෙන් අපේක්ෂිත මට්ටමට ළඟා කරගැනීමට නොහැකි වූ බව අමාත්‍යාංශ ලේකම්වරු පෙන්වා දුන්හ. ප්‍රසම්පාදන ක්‍රියාවලිය සහ ගොඩනැගිලි ඉදිකිරිමේදී පවතින ගැටලු හේතුවෙන් අදාළ ප්‍රගතිය ලබාගැනීමට අපොහොසත් වී ඇති බවත් මේ වසරේ තවත් කෙටි කාලයක් පවතින බැවින් අදාළ ප්‍රගතීන් වැඩි කරගැනීමට අපේක්ෂා කරන බවත් පැවැසුහ.මේ අවස්ථාව සඳහා ගරු පාර්ලිමේන්තු මන්ත්‍රීවරුන් වන සුගත් වසන්ත ද සිල්වා, සුනිල් රාජපක්ෂ, චානක මාදුගොඩ යන මහත්වරුන්, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය, යෞවන කටයුතු සහ ක්‍රීඩා යන අමාත්‍යාංශවල ලේකම්වරුන් ඇතුළු නිලධාරීන්, විශ්වවිද්‍යාල ප්‍රතිපාදන කොමිෂන් සභාවේ සභාපති, රුහුණු විශ්වවිද්‍යාලයේ වැඩබලන උපකුලපති, සම සෞඛ්‍ය පීඨයේ පීඨාධිපති හා ආචාර්ය මණ්ඩලයේ සමාජිකයින් ඇතුළු පිරිසක් සහභාගී වූහ.
2025-11-06
චීන මහජන දේශපාලන උපදේශන සමුළුවේ (CPPCC) ජාතික කමිටුවේ සාමාජික සහ එහි ආර්ථික කටයුතු කමිටුවේ අධ්‍යක්ෂ ගරු වැන්ග් ගුෂෙන්ග් (Hon. Wang Guosheng) මහතාගේ නායකත්වයෙන් යුත් ඉහළ පෙළේ චීන නියෝජිත පිරිසක් අද (නොවැ. 06) ශ්‍රී ලංකා පාර්ලිමේන්තුවේ කාරක සභා කිහිපයක සාමාජිකයන් හමුවී සාකච්ඡා පැවැත්වූහ.ඒ අනුව, නියෝජිත පිරිස පාර්ලිමේන්තු පරිශ්‍රයේදී ක්‍රම සහ විධි පිළිබඳ කාරක සභාවේ සහ ආර්ථික සංවර්ධනය සහ ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සාමාජිකයින් ඇතුළු පාර්ලිමේන්තු මන්ත්‍රීවරු පිරිසක් හමුවූහ.ගරු නියෝජ්ය කථානායක වෛද්‍ය රිස්වි සාලි මහතා සමග දිවා භෝජන සංග්‍රහයකට ද නියෝජිත පිරිස එක් වූ අතර දෙරට අතර ද්විපාර්ශ්වික සබඳතා තවදුරටත් වැඩිදියුණු කිරීම පිළිබඳව මෙහිදි සාකච්ඡා විය.මෙම සාකච්ඡාවලදී ද්විපාර්ශ්වික සහයෝගීතාව ශක්තිමත් කිරීම සඳහා චීනයේ කැපවීම නියෝජිත පිරිස නැවත තහවුරු කළ අතර බහුවිධ අංශ හරහා ශ්‍රී ලංකාව තුළ චීන ආයෝජන දිරිමත් කිරීමේ සිය අපේක්ෂාව පිළිබඳව ද සඳහන් කළහ.ක්‍රම සහ විධි පිළිබඳ කාරක සභාවේ සභාපති ගරු පාර්ලිමේන්තු මන්ත්‍රී විජේසිරි බස්නායක, ආර්ථික සංවර්ධනය සහ ජාත්‍යන්තර සබඳතා පිළිබඳ ආංශික අධීක්ෂණ කමිටුවේ සභාපති ගරු පාර්ලිමේන්තු මන්ත්‍රිනි (නීතිඥ) ලක්මාලි හේමචන්ද්‍ර, ගරු පාර්ලිමේන්තු මන්ත්‍රීවරුන් වන රවී කරුණානායක, (නීතිඥ) සුජීව සේනසිංහ, සුජිත් සංජය පෙරේරා, රුවන් මාපලගම සහ චතුර ගලප්පත්ති යන මහත්ම මහත්මීහු මෙම සාකච්ඡාව සඳහා සහභාගී වූහ. එසේම පාර්ලිමේන්තුවේ මහලේකම් කුෂානි රෝහණධීර, ව්‍යවස්ථාදායක සේවා අධ්‍යක්ෂ හා සන්නිවේදන අධ්‍යක්ෂ (වැඩ බලන) එම්. ජයලත් පෙරේරා යන මහත්ම මහත්මීහු ද පාර්ලිමේන්තු නිලධාරීන් පිරිසක් ද මෙම රැස්වීමට සහභාගී වූහ.මෙහිදී ක්‍රම සහ විධි පිළිබඳ කාරක සභාවේ සභාපති ගරු පාර්ලිමේන්තු මන්ත්‍රී විජේසිරි බස්නායක මහතා, ශ්‍රී ලංකාව සහ චීනය අතර පවතින දිගුකාලීන මිත්‍රත්වය අවධාරණය කළ අතර, මෙම සංචාරය එම ද්විපාර්ශ්වික සබඳතා තවදුරටත් ශක්තිමත් කරන බව සඳහන් කළේය. විවිධ ක්ෂේත්‍ර ඔස්සේ චීනය ලබා දෙන අඛණ්ඩ සහයෝගයට ඔහු කෘතඥතාව පළ කළ අතර, ගරු ජනාධිපති අනුර කුමාර දිසානායක මහතාගේ මෑත කාලීන චීන සංචාරය මෙම සබඳතා තවදුරටත් වැඩිදියුණු කළ බව ඔහු පෙන්වා දුන්නේය.සාකච්ඡාවේදී අදහස් දැක්වූ ගරු වැන්ග් ගුෂෙන්ග් මහතා, ශ්‍රී ලංකාව චීනයේ සමීප මිතුරෙකු ලෙස සඳහන් කළ අතර සංචාරක, වෙළඳාම සහ ආයෝජන ඇතුළු විවිධ ක්ෂේත්‍රවල සහයෝගීතාව ඉදිරියට ගෙන යාම සඳහා චීනය කැපවන බව සඳහන් කළේය. ශ්‍රී ලංකාව තුළ තවත් චීන ආයෝජන දිරිමත් කිරීමට අපේක්ෂා කරන බව ද ඔහු පැවසීය.ආර්ථික සංවර්ධනය සහ ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සභාපති ගරු පාර්ලිමේන්තු මන්ත්‍රීනි (නීතිඥ) ලක්මාලි හේමචන්ද්‍ර මෙනවිය මෙහිදී අදහස් දක්වමින්, ශ්‍රී ලංකාවේ කර්මාන්ත අංශය ඉදිරියට ගෙන යාම සඳහා චීන සහාය අපේක්ෂා කරන බව සඳහන් කළ අතර, තිරසාර ආර්ථික සංවර්ධනය සහ තාක්‍ෂණය මත පදනම් වූ සංවර්ධනය සඳහා ශ්‍රී ලංකාව කටයුතු කරන බව අවධාරණය කළාය. මීට මාස කිහිපයකට පෙර චීනයේ සංචාරයක නිරත වූ ඇය ඇතුළු ශ්‍රී ලංකා නියෝජිත පිරිසට දැක්වූ ආගන්තුක සත්කාරය පිළිබඳව කෘතඥතාව ද ඇය මෙහිදී පළ කළාය.මෙහිදී අදහස් දැක්වූ ගරු පාර්ලිමේන්තු මන්ත්‍රීවරුන් වන රවී කරුණානායක සහ ගරු (නීතිඥ) සුජීව සේනසිංහ යන මහත්වරුන්, දෙරට අතර ආර්ථික සහයෝගීතාව වැඩිදියුණු කිරීමේ සහ ශ්‍රී ලංකාව තුළ නිෂ්පාදන කර්මාන්ත වැඩිදියුණු කිරීමේ අවශ්‍යතාවය අවධාරණය කළහ.චීන මහජන දේශපාලන උපදේශන සමුළුවේ (CPPCC) ජාතික කමිටුවේ සාමාජික සහ නියෝජ්ය අධ්‍යක්ෂ ගරු ෆු ෂිෆැන්ග්, CPPCC ආර්ථික කටයුතු කමිටුවේ සාමාජික ගරු මාඕ ඩිග්ෂි, CPPCC ආර්ථික කටයුතු කමිටුවේ කාර්යාලයේ අධ්‍යක්ෂ ලියු හුවාන්සිං සහ CPPCC ආර්ථික කටයුතු කමිටුවේ මූල්‍ය හා ආර්ථික අංශයේ අධ්‍යක්ෂ ෂැං ජින්ජි යන මහත්වරු චීන නියෝජිත පිරිසේ සාමාජිකයින් අතර වූහ. එසේම ශ්‍රී ලංකාවේ චීන තානාපති චී ෂෙන්හොං මහතා ද මෙම අවස්ථාවට එක්විය.ශ්‍රී ලංකාව සහ චීනය අතර සහයෝගීතාව වැඩිදියුණු කිරීම සඳහා දෙපාර්ශ්වයම තම කැපවීම නැවත තහවුරු කරමින් රැස්වීම අවසන් විය.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
