2025-03-21
පුවත් කාණ්ඩ : පුවත්
මාර්තු 19 සිට 22 දක්වා ශ්‍රී ලංකාවේ සිව්දින නිල සංචාරයක නිරතව සිටින වියට්නාම් සමාජවාදී ජනරජයේ ජාතික සභාවේ ගරු උප සභාපති (නියෝජ්ය කථානායක) නුයෙන් ඩක් හායි (Nguyen Duc Hai) මහතා ඇතුළු පාර්ලිමේන්තු දූත පිරිසක් 2025.03.20 දින පාර්ලිමේන්තු පරිශ්‍රයේදී ගරු කථානායක වෛද්‍ය ජගත් වික්‍රමරත්න මහතා හමුවිය.
ගරු කථානායක වෛද්‍ය ජගත් වික්‍රමරත්න මහතාගේ ආරාධනයකට අනුව මෙරටට පැමිණි මෙම දූත පිරිසට වියට්නාම් ජාතික සභාවේ පාර්ලිමේන්තු මන්ත්‍රීවරුන් සහ නිලධාරීන් පිරිසක් ඇතුළත් වූ අතර විවිධ ක්ෂේත්‍ර ඔස්සේ දෙරට අතර සහයෝගීතාව වැඩි දියුණු කිරීම මෙම සංචාරයේ අරමුණයි.
1970 දී පිහිටුවන ලද ශ්‍රී ලංකාව හා වියට්නාමය අතර ද්විපාර්ශ්වික සම්බන්ධතාවය තවදුරටත් ශක්තිමත් කිරීම සඳහා වන එකිනෙකාගේ කැපවීම දෙපාර්ශ්වය විසින් මෙම හමුවේදී අවධාරණය කෙරිණි. ශ්‍රී ලංකාව සහ වියට්නාමය අතර අන්‍යෝන්‍ය ගෞරවය සහ වටිනාකම් මත පදනම් වූ දිගුකාලීන සහ සමීප සම්බන්ධතාවයක් පවතින බව ගරු කථානායක වෛද්‍ය ජගත් වික්‍රමරත්න මහතා මෙහිදී පෙන්වා දුන්නේය.
වියට්නාමයේ නිල සංචාරයක් සඳහා වියට්නාම ජනාධිපතිවරයා කළ ආරාධනය ශ්‍රී ලංකාවේ ගරු ජනාධිපති අනුර කුමාර දිසානායක මහතා පිළිගෙන ඇති බවත් එම නිල සංචාරය 2025 මැයි මාසයේදී සිදු කිරීමට නියමිත බවත් කථානායකවරයා මෙහිදී සඳහන් කළේය.
සංවර්ධන අංශයෙන් වියට්නාමය ලබා ඇති ජයග්‍රහණ ගරු කථානායක වික්‍රමරත්න මහතාගේ ඇගයීමට ලක්වූ අතර, වියට්නාමය සමඟ වෙළඳ, ආයෝජන සහ සංචාරක සබඳතා ඉහළ නැංවීම සඳහා ශ්‍රී ලංකාව අපේක්ෂා කරන බවද ප්‍රකාශ කළේය. ශ්‍රී ලාංකික ආයෝජකයින් දැනටමත් වියට්නාමයේ ඇමරිකානු ඩොලර් මිලියන 45 කට ආසන්න ආයෝජන සිදුකර ඇති බවත්, එමඟින් රැකියා 15,000 කට අධික ප්‍රමාණයක් නිර්මාණය වී ඇති බවත් කථානායකවරයා පෙන්වා දුන්නේය. වියට්නාම ආයෝජකයින්ට ශ්‍රී ලංකාව තුළ ආහාර සැකසීම, කෘෂිකර්මාන්තය සඳහා ශීතාගාර ස්ථාපිත කිරීම සහ කෘෂි තාක්ෂණය යන ක්ෂේත්‍රවල ආයෝජන අවස්ථා පිළිබඳ අවධානය යොමු කරන ලෙස කථානායකවරයා මෙහිදී ආරාධනා කළේය. එමෙන්ම මෙරට දැරිය හැකි මිලකට කෘෂිකාර්මික යන්ත්‍රෝපකරණ ලබා ගැනීම සඳහා අවස්ථා වැඩිදියුණු කිරීම සහ ඒ ආශ්‍රිත කුසලතා සංවර්ධනය කිරීම කෙරෙහි අවධානය යොමු කිරීම මගින් කුඩා පරිමාණයේ ගොවීන්ට තාක්ෂණික සහාය ලබා දීම සඳහා දෙරට අතර සහයෝගීතාව වැඩිකිරීමට මැදිහත් වන ලෙසද කථානායකවරයා ඉල්ලීමක් කළේය.
මෙහිදී අදහස් පළකළ වියට්නාම් ජාතික සභාවේ සභාපති (නියෝජ්ය කථානායක) ගරු නුයෙන් ඩක් හායි මහතා, ශ්‍රී ලංකාව මෑත කාලීනව ළගා කරගෙන ඇති ආර්ථික ප්‍රගතිය සහ දේශපාලන ස්ථාවරත්වය පිළිබඳව සිය සුබ පැතුම් එක් කළේය. දෙරට අතර ද්විපාර්ශ්වික සබඳතා වැඩි දියුණු කිරීම සඳහා වියට්නාමය කැපවීමෙන් කටයුතු කරන බව අවධාරණය කළ ඒ මහතා වෙළඳාම සහ ආයෝජන අවස්ථා පුළුල් කිරීමේ වැදගත්කමද පෙන්වා දුන්නේය. දෙරට අතර නිදහස් වෙළඳ ගිවිසුමක් ස්ථාපනය කිරීම සඳහා වියට්නාමය අපේක්ෂා කරන බවද වියට්නාම් ජාතික සභාවේ සභාපතිවරයා පැවසීය.
අවබෝධතා ගිවිසුමක් (MOU) හරහා දෙරටේ අන්තර් පාර්ලිමේන්තු සහයෝගීතාව වැඩි දියුණු කිරීම පිළිබඳ දෙපාර්ශ්වයේම එකඟතාවය මෙහිදී පළ කෙරිණි. ඩිජිටල්කරණය හරහා පාර්ලිමේන්තු ක්‍රියාදාමයේ කාර්යක්ෂමතාව වැඩි දියුණු කිරීම සඳහා තාක්ෂණය උපයෝගී කර ගැනීම පිළිබඳව ද මෙහිදී අදහස් පළවිය.
දූත පිරිස පාර්ලිමේන්තු පරිශ්‍රයේදී ගරු අග්‍රාමාත්‍ය (ආචාර්ය) හරිනි අමරසූරිය ද හමුවූ අතර අග්‍රාමාත්‍යධුරයට ඇයගේ පත්වීම පිළිබඳව සුබ පැතුම් පිරිනමමින් දෙරට අතර ද්වීපාර්ශවීය සබඳතා ශක්තිමත් කිරීම සඳහා වියට්නාමයේ කැපවීම නැවත අවධාරණය කළේය. එමෙන්ම දෙරට අතර දේශපාලන සබඳතා වැඩි දියුණු කිරීමට, ආර්ථික සහයෝගීතාව ඉහළ නැංවීමට සහ නිදහස් වීසා ක්‍රියාවලියක් සහ සෘජු ගුවන් ගමන් හඳුන්වාදීම පිළිබඳව අවධානය යොමු කිරීමට ද දෙපාර්ශ්වයම මෙහිදී එකඟතාව පළකළ අතර ඒ සඳහා යාන්ත්‍රණයක් ස්ථාපිත කිරීමේ වැදගත්කම ද අවධාරණය කෙරිණි.
මෙම පාර්ලිමේන්තු සංචාරයේදී ගරු නුයෙන් ඩක් හායි මහතා ශ්‍රී ලංකා පාර්ලිමේන්තුවේ නියෝජ්ය කථානායක ගරු (වෛද්‍ය) රිස්වි සාලි මහතා හමුවී සාකච්ඡා පැවැත්වූ අතර දෙපාර්ශ්වයම දෙරට අතර සබඳතා ශක්තිමත් කිරීම අවධාරණය කළහ.
දෙරට අතර අන්‍යෝන්‍ය ප්‍රතිලාභ සඳහා වෙළඳ හා ඩිජිටල් ආර්ථික අංශවල සහයෝගීතාවය සඳහා ඇති අවස්ථා සොයාබැලීමට නියෝජිත පිරිස ශ්‍රී ලංකාවේ වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන ගරු අමාත්‍ය වසන්ත සමරසිංහ සහ ඩිජිටල් ආර්ථික ගරු නියෝජ්ය අමාත්‍ය එරංග වීරරත්න යන මහත්වරුද හමුවිය.
ශ්‍රී ලංකා-වියට්නාම් පාර්ලිමේන්තු මිත්‍රත්ව සංගමයේ සාමාජිකයින්ද වියට්නාම නියෝජිත පිරිස හමුවූ අතර දෙරට අතර රාජ්‍ය තාන්ත්‍රික සබඳතාවලට වසර 55 ක් පිරීම සනිටුහන් කිරීම සඳහා වියට්නාම් ජාතික සභාවේ උප සභාපතිවරයා ශ්‍රී ලංකා පාර්ලිමේන්තු පරිශ්‍රයේ පැළයක් ද රෝපණය කළේය.
වියට්නාම දූත පිරිස කථානායක ගැලරියේ සිට පාර්ලිමේන්තුවේ කටයුතු නැරඹීමට එක්වූ අතර ඔවුන් පාර්ලිමේන්තු පරිශ්‍රයේ සංචාරයකට ද සහභාගී විය.
මෙම අවස්ථාවන් සඳහා ශ්‍රී ලංකාවේ වියට්නාම් තානාපති ගරු ට්‍රින් ති ටම්, පාර්ලිමේන්තුවේ මහලේකම් කුෂානි රෝහණදීර, කාර්ය මණ්ඩල ප්‍රධානී සහ පාර්ලිමේන්තුවේ නියෝජ්ය මහලේකම් චමින්ද කුලරත්න සහ සහකාර මහලේකම් හංස අබේරත්න යන මහත්ම මහත්මීහු ද සහභාගී වූහ.
2025-07-28
අ.පො.ස උ/පෙළ විභාගයෙන් සියලුම විෂය ධාරා යටතේ විශිෂ්ටතා දැක්වූ සිසුන් 360කට රුපියල් ලක්ෂය බැගින් ප්‍රදානය කෙරේ ජනාධිපති අරමුදල මගින් ක්‍රියාත්මක කරන 2023/2024 අ.පො.ස (උසස් පෙළ) විභාගයේදී දිස්ත්‍රික් මට්ටමින් ඉහළ දක්ෂතා දැක්වූ විශිෂ්ටයන් ඇගයීමේ නැගෙනහිර පළාත් වැඩසටහන ගරු කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් ඊයේ (ජූලි 27) මඩකලපුව, ස්වාමි විපුලානන්ද සෞන්දර්ය පීඨයේදී පැවැත්විණි.මෙහිදී අම්පාර, මඩකලපුව හා ත්‍රිකුණාමලය යන දිස්ත්‍රික්කයන්හි 2023 හා 2024 වර්ෂවලට අදාළ අ.පො.ස උසස් පෙළ විභාගයේදී, විෂයධාරා 6 යටතේ උසස් ප්‍රතිඵල ලබාගත් සිසුන් 10 දෙනකු බැගින්, සිසුන් 360 දෙනකුට රුපියල් ලක්ෂය බැගින් වූ අනුග්‍රාහක දීමනාවක් සහ සහතික පත් ප්‍රදානය කිරීම සිදු කෙරිණි. මේ සඳහා ජනාධිපති අරමුදල වැය කර ඇති මුදල රුපියල් මිලියන 36කි.පළාත් අනුව ක්‍රියාත්මක වන මෙම වැඩසටහන පසුගියදා උතුරු පළාතෙන් ආරම්භ කෙරුණු අතර, එහි දෙවන වැඩසටහන දකුණු පළාතේ සහ තුන්වන වැඩසටහන නැගෙනහිර පළාතේදී ක්‍රියාත්මක කෙරිණි. ඉදිරියේදී අනෙකුත් පළාත්වලද වැඩසටහන ක්‍රියාත්මක කිරීමට ජනාධිපති අරමුදල කටයුතු සූදානම් කරමින් සිටී.මෙහිදී අදහස් දැක්වූ කතානායකවරයා සඳහන් කළේ මේ වන විට ජනාධිපති අරමුදල එහි සහාය අවශ්‍ය කිසිවකු අතහැර නොමැති බවත්, එහිදී රටේ දරුවන්ගේ අධ්‍යාපනය කෙරෙහි විශේෂ අවධානයක් යොමු කර ඇති බවත්ය. ජනාධිපති අරමුදල කිසිවකුගේ පෞද්ගලික අරමුදලක් නොවන අතර, එය රටේ ජනතාවගේ දායකත්වයෙන් ක්‍රියාත්මක වන අරමුදලක් බව පෙන්වා දුන් කථානායකවරයා එබැවින් එහි ප්‍රතිලාභ සැලසිය යුත්තේ රටේ ජනතාවගේ අභිවෘද්ධිය සඳහාම පමණක් බවද සඳහන් කළේය.වරප්‍රසාදලත් පංතියේ අය වෙනුවෙන් වෙන් වී තිබූ ජනාධිපති අරමුදල පුනරුද යුගයේදි ජනතාව වෙනුවෙන් කැපවූ ආයතනයක් බවට පත් කළ බව විදේශ කටයුතු සහ විදේශ රැකියා ගරු නියෝජ්ය අමාත්‍ය අරුන් හේමචන්ද්‍ර මහතා මෙහිදී අදහස් දක්වමින් කියා සිටියේය.නැගෙනහිර පළාත් ආණ්ඩුකාර ජයන්ත ලාල් රත්නසේකර මහතා සහ ජනාධිපති ජ්‍යෙෂ්ඨ අතිරේක ලේකම් සහ ජනාධිපති අරමුදලේ ලේකම් රෝෂන් ගමගේ මහතාද මෙහිදී අදහස් දැක්වූහ. පාර්ලිමේන්තු මන්ත්‍රී කන්දසාමි ප්‍රභූ, නැගෙනහිර විශ්වවිද්‍යාලයේ උපකුලපති මහාචාර්ය පරරාජසිංහම් ප්‍රදීපන්, මඩකලපුව දිස්ත්‍රික් ලේකම් ජේ.ජේ. මුරලිදරන් යන මහත්ම මහත්මීහු සහ ජනාධිපති අරමුදලේ ජ්‍යෙෂ්ඨ නිලධාරීන්, නැගෙනහිර පළාතේ රාජ්‍ය නිලධාරින්, ආරක්ෂක අංශ ප්‍රධානින්, දෙමාපියන් සහ සිසු දරුවන් ඇතුළු පිරිසක් මෙම අවස්ථාවට එක්ව සිටියහ.
2025-07-28
පාර්ලිමේන්තු ක්‍රියාදාමය ශක්තිමත් කිරීම සඳහා නවක මන්ත්‍රීන් සහ පාර්ලිමේන්තු නිලධාරීන් උදෙසා පැවති වැඩසටහන සාර්ථක බව එම වැඩසටහන ක්‍රියාත්මක කළ බ්‍රිතාන්‍ය පාර්ලිමේන්තු නියෝජිත පිරිස ගරු කථානායක වෛද්‍ය ජගත් වික්‍රමරත්න මහතා හමුවී පැවසූහ.පසුගිය 22 සිට 24 දක්වා දින 3ක් පුරා පැවැත්වූ මෙම වැඩසටහනෙන් පසු එහි ප්‍රගතිය සම්බන්ධයෙන් කථානායකවරයා දැනුවත් කිරීම සඳහා පසුගිය 24 වැනිදා පාර්ලිමේන්තුවේදී හමුවූ අවස්ථාවේදී එම නියෝජිත පිරිස මේ අදහස් පලකළහ.ශ්‍රී ලංකා පාර්ලිමේන්තුව සමඟ සහයෝගයෙන්, පාර්ලිමේන්තු ක්‍රියාදාමය ශක්තිමත් කිරීම සඳහා උදෙසා, එක්සත් රාජධානියේ මහජන මන්ත්‍රී මණ්ඩලය,පොදුරාජ්‍ය මණ්ඩලීය පාර්ලිමේන්තු සංගමයේ එක්සත් රාජධානියේ ශාඛාව (CPA UK) සහ ප්‍රජාතන්ත්‍රවාදය සඳහා වූ වෙස්ට්මිනිස්ටර් පදනම (WFD) හා එක්ව පැවැත්වූ මෙම වැඩසටහන වෙනුවෙන් කථානායකවරයා සිය ස්තූතිය පළකළේය.එක්සත් රාජධානියේ මහජන මන්ත්‍රී මණ්ඩලයේ මන්ත්‍රී, ප්‍රජාතන්ත්‍රවාදය සඳහා වූ වෙස්ට්මිනිස්ටර් පදනමේ සභාපතිනිය යස්මින් කුරේෂි (Yasmin Qureshi) මහත්මියගේ ප්‍රධානත්වයෙන් යුතු මෙම නියෝජිත පිරිසට එක්සත් රාජධානියේ මහජන මන්ත්‍රී මණ්ඩලයේ මන්ත්‍රීන් වන ජේමි ස්ටෝන් (Jamie Stone), පෝලට් හැමිල්ටන් (Paulette Hamilton) ඇන්ඩෲ ස්නෝඩන් (Andrew Snowden) යන මහත්ම මහත්මීන් ඇතුළු නියෝජිත පිරිසක් එක්ව සිටියහ.මෙම වැඩසටහන තුළදී නව මන්ත්‍රීවරුන් සහ පාර්ලිමේන්තු නිලධාරීන්ට එම නියෝජිත පිරිස සමග ඔවුන්ගේ දැනුම හා අත්දැකීම් හුවමාරු කරගනිමින් පාර්ලිමේන්තු ක්‍රමවේද පිළිබඳව පුළුල් අවබෝධයක් ලබාගැනීමට අවස්ථාව සැලසිණි.නව මන්ත්‍රීවරුන්ට පාර්ලිමේන්තුව නියෝජනය කිරීමට ලැබෙන අවස්ථා සහ මන්ත්‍රී භුමිකාවේ අභියෝග,පාර්ලිමේන්තු ක්‍රියාවලිය හා ක්‍රමවේද, පාර්ලිමේන්තු නිලධාරීන්ගේ භූමිකාව, කාරක සභා විමර්ශන ක්‍රියාවලිය, කාරක සභා වාර්තා සකස් කිරීම, ආචාර ධර්ම සහ ප්‍රමිතීන්, අයවැය හා මූල්‍ය පාලනය , සම්පත් සහ ඩිජිටල් මෙවලම් පිළිබඳව, මහජන සන්නිවේදනය හා සහභාගීත්වය සහ විශ්වාසය ප්‍රවර්ධනය කිරීම සඳහා ප්‍රජා සම්බන්ධතා ක්‍රියාකාරකම් භාවිතා කළ හැකි ආකාරය පිළිබඳව මේ තෙදින වැඩටහන පුරා දැනුම හා අත්දැකීම් බෙදාගැනීම සිදු විය.තවද මෙම වැඩසටහන තුළ පාර්ලිමේන්තු මන්ත්‍රීවරියන්ගේ සංසදයේ සභාපති ගරු අමාත්‍ය සරෝජා සාවිත්‍රි පෝල්රාජ් මහත්මිය , නියෝජ්ය සම සභාපති සමන්මලී ගුණසිංහ මහත්මිය ඇතුළු සාමාජික මන්ත්‍රීවරියන් සමගද සාකච්ඡා පවත්වමින් අදහස් හුවමාරු කරගත්හ. එමෙන්ම විවෘත පාර්ලිමේන්තු මූලාරම්භය සඳහා වන පාර්ලිමේන්තු සංසදයේ සම සභාපති ගරු පාර්ලිමේන්තු මන්ත්‍රී ෂානක්කියන් රාජපුත්තිරන් රාසමාණික්කම් මහතා, සාමාජික ගරු මන්ත්‍රීවරයන් ඇතුළු නිලධාරීන් සමගද සාකච්ඡා පැවැත්වූහ. එහිදී විවෘත පාර්ලිමේන්තු ක්‍රියාවලිය හා ජනතා විශ්වාසය වර්ධනය කිරීම උදෙසා ශ්‍රී ලංකාව විවෘත රාජ්‍ය හවුල්කාරිත්වයේ සාමාජිකත්වය සක්‍රීය කරගැනීමේ වැදගත්කම ද සංසදයේ සම සභාපතිවරයා මෙහිදී සිහිපත් කළේය.මෙම වැඩසටහ සඳහා පාර්ලිමේන්තුවේ මහ ලේකම් කුෂානි රෝහණදීර, පාර්ලිමේන්තු කාර්යමණ්ඩල ප්‍රධානී සහ නියෝජ්ය මහලේකම් චමින්ද කුලරත්න, සහකාර මහ ලේකම් හංස අබේරත්න යන මහත්ම මහත්මීන් මෙන්ම පාර්ලිමේන්තුවේ දෙපාර්තමේන්තු ප්‍රධානීන් ඇතුළු නිලධාරීහු පිරිසක් සහභාගිවුහ.
2025-07-25
රාජ්‍ය සේවා කොමිෂන් සභාවේ සාමාජික ධුරයක ඇතිවී තිබෙන පුරප්පාඩුව පිරවීම සඳහා සුදුසුකම් ලත් තැනැත්තන්ගෙන් අයැදුම්පත් කැඳවීම ආරම්භ කර ඇත.ඒ සඳහා වූ අයදුම්පත්‍ර, ශ්‍රී ලංකා පාර්ලිමේන්තු වෙබ් අඩවියෙහි ‘රාජ්‍ය සේවා කොමිෂන් සභාව සඳහා සාමාජිකයකු පත්කිරීම’ නමැති ක්ෂණික සබැඳි යටතේ පළකර ඇති ආකෘතිය අනුව සකස් කර, සම්පූර්ණ කරන ලද අයැදුම්පත්‍ර 2025 අගෝස්තු 01 දින හෝ එදිනට පෙර යොමුකළ යුතුය.අදාළ අයැදුම්පත්‍ර, ආණ්ඩුක්‍රම ව්‍යවස්ථා සභාවේ වැඩබලන මහ ලේකම්, ආණ්ඩුක්‍රම ව්‍යවස්ථා සභා කාර්යාලය, ශ්‍රි ලංකා පාර්ලිමේන්තුව, ශ්‍රි ජයවර්ධනපුර, කෝට්ටේ, යන ලිපිනයට ලියාපදිංචි තැපෑලෙන් හෝ constitutionalcouncil@parliament.lk යන විද්‍යුත් ලිපිනයට යොමු කළ යුතුය. ලියුම් කවරයේ ඉහළ වම් කෙළවරේ/ විද්‍යුත් ලිපියෙහි විෂය වශයෙන් ‘රාජ්‍ය සේවා කොමිෂන් සභාව සඳහා සාමාජිකයකු පත්කිරීම’ යනුවෙන් සඳහන් කළයුතුයසබැඳිය: https://www.parliament.lk/si/secretariat/advertisements/view/334
2025-07-25
ශ්‍රී ලංකා විදුලිබල (සංශෝධන) පනත් කෙටුම්පත දෙවනවර කියවීමේ විවාදය අගෝස්තු 6 පාර්ලිමේන්තුව අගෝස්තු 5, 6 සහ 7 රැස්වෙයි ටී. එම්. ඩබ්ලිව්. දේශබන්ධු තෙන්නකෝන් මහතා, 2002 අංක 5 දරන නිලධරයන් ඉවත් කිරීමේ (කාර්ය පටිපාටිය) පනතේ 17 වගන්තිය ප්‍රකාරව පොලිස්පති ධුරයෙන් ඉවත් කිරීම සඳහා වන යෝජනා සම්මතය ලබන අගෝස්තු 5 වැනිදා විවාද කිරීමට පාර්ලිමේන්තු කටයුතු පිළිබඳ කාරක සභාවේදී තීරණය වූ බව පාර්ලිමේන්තුවේ මහලේකම් කුෂානි රෝහණදීර මහත්මිය පැවසුවාය.ගරු කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් ඊයේ (ජූලි 24) පස්වරුවේ පැවති පාර්ලිමේන්තු කටයුතු පිළිබඳ කාරක සභාවේදී මේ බව තීරණය වී ඇත. මේ අනුව අගෝස්තු 5,6 සහ 7 තෙදින පාර්ලිමේන්තුව රැස්වීමට නියමිතව ඇති අතර අගෝස්තු 8 වැනි සිකුරාදාට යෙදී ඇති නිකිණි පොහොය හේතුවෙන් එදින පාර්ලිමේන්තුව රැස් නොවේ.මේ අනුව අගෝස්තු 05 වැනි අඟහරුවාදා පෙ.ව. 9.30 - පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත. පෙ.ව. 10.00 – 11.00 කාලය වාචික පිළිතුරු අපේක්ෂා කරන ප්‍රශ්න සඳහා වෙන් කර ඇති අතර පෙ.ව. 11.00 - 11.30 කාලය ස්ථාවර නියෝග 27(2) යටතේ ප්‍රශ්න සඳහා වෙන් කර තිබේ. අනතුරුව පෙ.ව. 11.30 සිට ප.ව. 4.00 දක්වා පොලිස්පති ටී. එම්. ඩබ්ලිව්. දේශබන්ධු තෙන්නකෝන් මහතා, 2002 අංක 5 දරන නිලධරයන් ඉවත් කිරීමේ (කාර්ය පටිපාටිය) පනතේ 17 වගන්තිය ප්‍රකාරව එම ධුරයෙන් ඉවත් කිරීම සඳහා වන යෝජනා සම්මතය විවාදයට ගැනීමටත් ප.ව. 4.00ට අදාළ ඡන්ද විමසීම පැවැත්වීමටත් මෙහිදී තීරණය වී ඇත. අනතුරුව ප.ව. 4.15 සිට ප.ව. 5.30 දක්වා ප්‍රපාතන විරෝධී සහ ප්‍රතිතෝලන බදු පනත යටතේ නියෝග සහ අධිකරණ සංවිධාන පනත යටතේ නියෝග විවාදයට ගෙන අනුමත කිරීමට ද එකඟත්වය පළ වී ඇත. ඉන්පසු ප.ව. 5.30 සිට ප.ව. 6.00 දක්වා විපක්ෂය විසින් ගෙනෙනු ලබන යෝජනාවකට අනුව සභාව කල්තබන අවස්ථාවේ යෝජනාව විවාදයට ගැනීමට නියමිතව තිබේ.අගෝස්තු 06 වැනි බදාදා පෙ.ව. 9.30 - පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත. පෙ.ව. 10.00 – 10.30 කාලය අග්‍රාමාත්‍යතුමියගෙන් අසනු ලබන ප්‍රශ්න සඳහා ද පෙ.ව. 10.30 - පෙ.ව. 11.00 කාලය වාචික පිළිතුරු අපේක්ෂා කරන ප්‍රශ්න සඳහා ද වෙන් කර ඇත. පෙ.ව. 11.00 -11.30 කාලය ස්ථාවර නියෝග 27(2) යටතේ ප්‍රශ්න සඳහා වෙන් කර තිබෙන අතර අනතුරුව පෙ.ව. 11.30 සිට ප.ව. 5.00 දක්වා ශ්‍රී ලංකා විදුලි බල (සංශෝධන) පනත් කෙටුම්පත (දෙවැනිවර කියවීම), දුම්කොළ බදු පනත යටතේ නියමය සහ තේ (අපනයන බදු සහ පාලන) පනත යටතේ නියෝග විවාදයට ගැනීමට නියමිතව ඇත.අනතුරුව ප.ව. 5.00 සිට ප.ව. 5.30 දක්වා සභාව කල්තබන අවස්ථාවේ ප්‍රශ්න සඳහා කාලය වෙන් කර ඇත.අගෝස්තු 07 වැනි බ්‍රහස්පතින්දා පෙ.ව. 9.30 - පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත. පෙ.ව. 10.00 – 11.00 කාලය වාචික පිළිතුරු අපේක්ෂා කරන ප්‍රශ්න සඳහා වෙන් කර ඇති අතර පෙ.ව. 11.00 - 11.30 කාලය ස්ථාවර නියෝග 27(2) යටතේ ප්‍රශ්න සඳහා වෙන් කර තිබේ. අනතුරුව පෙ.ව. 11.30 සිට මධ්‍යහ්න 12.00 දක්වා විනිමය පත්‍ර (සංශෝධන) පනත් කෙටුම්පත (දෙවැනි වර කියවීම) විවාදයකින් තොරව සම්මත කිරීමට මෙහිදී තීරණය වී ඇත. අනතුරුව මධ්‍යහ්න 12.00 සිට ප.ව. 5.30 දක්වා ආණ්ඩු පක්ෂය විසින් ගෙනෙනු ලබන යෝජනාවකට අනුව “රටේ වර්තමාන ආර්ථිකය” පිළිබඳව සභාව කල්තැබීමේ විවාදය පැවැත්වීමටත් නියමිතව තිබේ.
පාර්ලිමේන්තු අත්පොත
ශ්‍රී ලංකාවේ මැතිවරණ ක්‍රමය
පාර්ලිමේන්තුවේ කටයුතු සිදුවන ආකාරය
පාර්ලිමේන්තුවේ කටයුතු
© ශ්‍රී ලංකා පාර්ලිමේන්තුව.
සියලු හිමිකම් ඇවිරිණි.
නිර්මාණය සහ සංවර්ධනය TekGeeks
